ЧАРИННУЛ АРС ЧАРИНОВ МАММЕД
Махъсса ппурттуву, цукссава бунагьиртталун багьлай буссарив жул Вихьуллал жямат, цаннияр ца аьсивсса, жагьилсса инсантал дунияллия лаглагисса чIявусса ишру хъанай бур шяраву.
Ниттихъал, ссурваврал, кулпатирттал чурххардий дягъулул яннарду гьарза хъанай дур. Жагьилсса кулпатирттайн, дахьа ччаннай бацIлацIисса оьрчI-душварайн ящусса чIумал, дакI шишикIама дагьлай дур. Ци тIунссарив, дунияллия лавгманал гъанминнахь цукунсса мукъурттий гайннал дакIру паракьат дулланссарив къакIулну банд лаглагисса ишру чIяву хъанай бур. Вана уттигъанну щалла Ккуллал райондалун хъинну дакI тIиртIусса, чIявусса оьрчIан тарбия дуллусса Вихьуллал шяраваллил школалул учитель Чаринов Чарин ХIасановичлул арс Маммед, апатI нясив хьуну, ахиратравун лавгун, жул Вихьуллал жямат цIунилгу банд лаган бунни.
Маммед увссар Чариннул ва БарцIулавхъал тухумраясса Сиясатлул кулпатраву 1981-ку шинал. 1999-ку шинал, школа бувккуну махъ, Маммед дуклан увххуна Народный хозяйствалул институтрал финансы ва кредит факультетрайн. Га къуртал бувайхту, аьралуннаву къуллугъ буван увцуна Плесецкаллал космодромрайсса космосрал аьралуннавун. Армиялия учIайхту кулпатгу бувну, цалла касмулий Москавлив зий уссия. Маммедлул бия 2 душ.
Маммед уссия дакI хъинсса, цала ляхъиндалул ялун учIан къахьурчагу, телефондалувух чIявуну ихтилатру буллалисса, аякьа дусса жагьил. Цибанссар, цахъи цала цува урувччуну ивкIссания, бюхъайва хатIа къахьунгу. Жува яла укун балглан бикIару, хатIа хьуну махъ, цамур тIунсса бакъахьувкун. Вихьуллал шяравусса, шагьрурдай яхъанахъисса жямат кьурчIишиву кIидачIлай бур Маммедлул нитти-буттахь, кулпатрахь, цинявппагу гъан-маччанахь. РухI кIукIлуний хьуннав. Аьпа буваннав.
Вихьуллал жямат
—————————————-
МАХIАММАДОВА (ХIАЖИЕВА) СУЛТIАНАТ АЬБДУЛЛАГЬЛУЛ ДУШ
Тамансса хIаллай къашавайгу бивкIун, 23-мур мартрай аьпалувух бивхьунни Хьурттал шяраву бувсса, КIямашрал шяравун щар хьуну, бусраврай, гьарцанначIа хIурмат лавайну, цалва шяравудушнияр хъис личIи бакъа ххирану бивкIсса МахIаммадова (ХIажиева) СултIанат Аьбдуллагьлул душ.
СултIанат бувну бур Хьурттал шяраву 1936 шинал. Школагу къуртал бувну, бувххун бур дуклан зунттал душварал институтравун.
Му къуртал бувну махъгу, яла лараймур кIулшиву ласун, ялагу дуклан бувххун бур. Зун бивкIун бур ДГУ-рал физикалул кафедралий, яла зун бивкIун бур Автодорожный техникумраву физикалул дарсру дихьлай, 20-хъул шиннардий. СултIанатлул язи увгьусса оьрмулул дус, мусил магъи ия КIямашрал шяраватусса, чIявусса лагма щархъиячIагу хIурмат лавайсса инсан, дяъвилул ветеран, аьпабиву, МахIаммадов МахIаммадмирза МахIаммадлул арс.
СултIанат чил шяраватусса бунугу, щилчIав къаучайва кIа цамур шяраватуссар увкуну, ххишалану хIурматрай бикIайва цилла инсаншиву, ласнал ляхъиндалул, шяравунал, хъамаллурал хIурмат лавайсса бушиврийну, маслихIат-насихIат бусан кIулсса, мазрай цIу бусса буну. Мукунма хIурматрай бикIайва архIал зузиминначIа, чIахху-чIарахначIа, кIулначIа.
Дия СултIанатлул даврия дуллусса ХIурматрал грамотарттугу, дурккуна цайми бахшишругу.
СултIанатлул бивкIулул кьурчIишиву кIидачIлай, жижара буллай буру арснахь АхIмадлухь, душнихь Асиятлухь, куявнахь ХIасаннухь, арснал щарнихь Анжелахь, вайнная бивзминнахь, СултIанатлул Хьурттал шяравасса уссурссуннахь, МахIаммадмирзал ссурахъаврахь, кIирагу шяраваллил гъанчунахь.
Махънал оьрмулий барачат бишиннав. СултIанатлул бунагьирттал аьпа баннав, гьав нурданул дуцIиннав, алжаннул ххари баннав.
КIямашрал
ва Хьурттал жямат
———————————————-
МАХIАЙЛ ДУШ ХIАСАНОВА (МАХIАДОВА) БАТIАЛ
КьюлтIну ххарарххусса азаруннища ххассал буван къабювхъуну, мартрал 31-нний ахиратрал хьунни хIакьсса зунттал лакку хъамитайпа, ас-намусрал , дакI хъиншиврул, яхI-къириятрал хъун бутIа биривсса, ниттилва зун-захIмат буллан кунма бувсса, ххаллилсса инсан ХIасанова (МахIадова) БатIал МахIайл душ.
Ва оьрмулуцIа шаврил кьурчIишиву кIидачIлай, дакIнийхтуну жижара буллай буру БатIаллул, цила лякьлуя къабизарчагу, яла хIакьмур, ххаллилмур хъамитайпалулнияргу ялттуну нинушиву дурну, хъунма бувну, дуккин бувну, оьрмулувун буккан бувну, къатлий бивтсса душнихь Саидахь, куявнахь, уссил душварахь, арсурваврахь, махъсса гъан-маччаминнахь.
Оьрмулуву ванинуксса захIматшивуртту къаккакканнав. Ванияр ччяни ахиратрал хьунмур ялун къабияннав, яла язимур, кIумур бивкIу ва хьуннав. Бала-апатIирттал хьхьичI бацIаннав. Махъминнал оьрмурдай барачат бишиннав. БатIаллунгу алжан нясив баннав.
МахIайл ва Маллил душ БатIал бувссар 1927-ку шинал Ккуллал шяраву. БатIал дунияллийн буккавува бахтти-талихI чансса хьуну бур. Бакуй ппугу ивкIуну, оьрмулул дахьва 3 барз хьусса БатIал миски-гъаривсса кулпатраву ниттихун багьну бур. БатIаллунгу, къатлул кушурду буллай, ччяни канил захIмат нахIу лавчIун бур. Арулва класс бувккуну, колхозрал фермалий ризкьилуха къуллугъ буллан багьну бур ванин.
Хьуну бур захIматрал фронтрайгу. «Къатлува инсан гьан аьркинссар тIий буну, нину гьан дитаяр, лавгссара къанаврду дуклан. ХIурахъ, Щамххаллай хьхьу-кьини къакуну зий, 4 зуруй ккаркссар диялсса захIматшиву, бувхIуссар ккашигу. Янна-усгу щаллуну дакъа, къаккавк къаливчIссар ттун. Мунияр ххишала, 1943-ку шинал Бакресливгу гьан бувну, ттулва яруннин ккавкссар дяъвилул бувсса балардугу. Немец гичча лихъан бувну, ливтIуминнал жаназарду, дяъвилул ярагъру, ппив-ххив бувсса сарайрду, чабанкарду», — тIун бикIайссия аьпабиву.
Ганияр махъ БатIал, цилва оьрмулул 55 шин хьуннинцIа, дакI марцIну зий бивкIссар колхозрал дояркану. Цал комсомолка, хъирив коммунистка хIисаврай, хъинну чялишну гьуртту хьуссар жямат политикалул иширттавухгу. БувчIуну буссия КПСС-рал райкомрал членну, 22-мур ва 29-мур республикалул партконференциялул, республикалул хъаннил 30-мур съездрал делегатну. Цимилгу ванил сурат лархъун дуссия райондалул ХIурматрал улттуйн, хьхьичIунсса доярка хIисаврай.
Ва бия цIанихсса балайчи, пасихIсса мукъул ва чIунил усттар. Цилва гьунарду райондалул фольклорный фестиваллай ва цаймигу даккавурттайгу ккаккан бувну, барчаллагьирттан лайкь хьуссар. БатIал дакIнийн бутлай, ца укунсса ишираягу кIицI къабувну къабучIир. Аллагьнал ванин цилва лякьлуя оьрчI кьисмат хьуну бакъая. Амма лагабургъилгу гъили байсса кунма, оьрмулул ссут гъан хьуну махъ, нясив хьусса ташулий, лув душнил шинайнвагу къабивсса душ Бакуя бувцуну, хьхьурду уттара дуллай, хъунма бувну, оьрмулувун буккан баврищал, мукуна Ттуплислия лув арснал арс увцуну, хъуна увну, дуккин увну, къатлуй ивтссар яла ххаллилмур, хIакьмур ниттилнияр ялттуну. Вайгу, хаснува душ, буржирай къаливчIунни. ЦичIанма бувцуну, ххирасса нину кунма аякьалулун лавсун, къуллугъ бувуна оьрмулул махъра-махъсса кьинилийннин. Саратовуллал областьрая лавсун бувкIун жаназагу, буттал аьрщарай Ккулув бувччунни, байсса ххуллуххагу бувну.
ХIалал дурссар БатIаллул чIярусса бахшишругу – 10 орден-медаллу, грамотартту. Амма махъра-махъмур бахшиш – юбилейрал медаль кьамул даннинсса гьантта ванин Аллагьнал къабуллуссар. КутIану учин, БатIаллул цилва 88 шинайсса оьрму чIявучин бусравну, хIакьсса зунттал хъамитайпалул кунма бувтссар.
Бунагьирттал аьпа баннав цил. Амин.
Ккуллал ва Ваччиял
жяматирттал цIания
Гьарун ХIасанов
