Мартрал 23-нний Дагъусттаннал БакIчи Рамазан АьбдуллатIипов хьунаавкьунни Аьрасатнал Федерациялул юстициялул министр Александр Коноваловлущал. Министр жулла республикалийн увкIун ия къуллугърал аьрххилий.

Хъунасса хъамаличунахь аьла-сса­ламгу бувну, Рамазан АьбдуллатIи­повлул бувсунни вихну ушиву федерал ведомствартталгу, региондалул исполнительный властьрал органналгу давурттавусса хIарачатру хъинчулийсса хIасиллайн букканшиврий.
«Дагъусттаннай най дур правалул прост­ранство уттара дуккан даврин хасъ­сса даву, цанчирча чIявуми ишру ва ин­сантал му хахлива бувккун бивкIун тIий. Бюхъайссар Дагъусттаннал чIяруми захIматшивуртту гьамин муницIун дархIуну дикIангу. Жул мурад бур правалул, законнал лагрулувун зана шаву, муниха зийгу буру», — увкунни Республикалул каялувчинал.
Рамазан АьбдуллатIиповлул мукъур­ттийн бувну, Дагъусттаннайн Аьрасатнал юстициялул министр учIаву – агьамсса ишри, му бюхъайссар хьун законшиврул ва аьдлу-низамрал бутIуву чIярусса хъинчулийсса даххашивурттал дайдихьуну.
Александр Коноваловлул увкунни: «Дагъусттан – Аьрасатнал ляличIисса регионни, му мукунма хъанай бур Ухссавнил Ккавкказуллал лишаннугу, цанчирча дунияллий чувчIав дакъар миксса чIявусса миллатругу, культурарттугу ваксса хъундакъасса аьрщарай. Шикку юридийсса власть дикIан аьркинссар мюнпатну зузисса ва тIайлашиврийсса. Му чIумал инсанталгу яхъанантIиссар закондалуцIун бавкьуну».
Федерал министрнал лавайсса кьимат бивщунни республикалий аьдлу-низам ва правалул лагру уттара даврил давур­ттан. «Жу Дагъусттан цирив ца «лухIисса къувилун» ккалли буллай бакъару. Ва Аьрасатнал нормальнайсса регионни, шиккугу дуссар цилла ххуйшивуртту ва лайкьшивуртту», — увкунни Александр Коноваловлул.
Ганал бувсунни республикалий мюнпатну зий бушиву Аьрасатнал Минюстрал Дагъусттаннал подразделение ва ведомствалул структурартту.
Хьунабакьаврил ахирданий Рамазан АьбдуллатIиповлул хъунасса хъамаличунан пишкаш бунни Расул ХIамзатовлул произведениярттал лу.