Ваччатусса Муслимов Юнус – Хъун дяъвилул гьурттучи, аьпалувух ивхьуну гьашину 11 шин хъанай дур. Цими шин гьарчагу, Ваччиял жяматран, ванащал даврий архIал зий бивкIминнан хъамакъаитантIиссар. Ганал ужагърай цIу-цIанпир, ганал аьпа ябуллай, ганал ххаллилшиврия гьарцаннахь буслай, тай оьсса дяъвилул шиннардий ганал дурсса къучагъшивурттая буслай, ялапар хъанай бур кулпат Нурижат.

Гьарца шинах 9-мур майрал кьини НурижатлучIан бучIай Юнус хъамакъаивтми, культуралул зузалт, чIаххул ва ганащал цачIу зий бивкIми. Ххувшаврил байран барча учин бувкIсса агьалигу Нурижатлул кьамул бувай ненттабакI тIивтIуну, хIурматрай. Мунияту бухьун­ссар Ваччиял шяраву ва лагма щархъаву Нурижатлул лавайсса хIурмат бусса.
КутIану бусанна Юнуслул оьрмулул ххуллия. Увну ур Юнус 1922-ку шинал Ваччиял шяраву. Юнус хъанай ур ЧIяйннал дянивмур даражалул школалул цалчинсса выпускравасса ца.
Школа къуртал бувну махъ Юнус увцуну ур армиялийн. БакIрайва ванал армиялий був­ккуну бур хIаписартал шайсса училище. Цалчин дяъвилул цIаравун Юнус бакIрайн агьну ур Сухумскаллал дяликIулий. Га ппурттуву немецнал чапхунчитал махъаллил буллай ва къагъ хьуну госпитальданийн агьну ур. Махъ хъин шайхту Юнуслул сайки 8 шин хьуну дур дяъвилуву, га къуртал хьуну махъ къуллугъ буллай. Ванал НурижатлучIа лирчIсса аьрали кительданий хъунама лейтенантнал погонну дур. Цинярдагу 20-ннийн дирсса орденну ва медаллу дур кительданий. Миннувух дур орден «Красной звезды», «Бу­ттал КIанттул цIанийсса дяъвилул орден», «За отвагу», «За оборону Кавказа», «За Победу над Германией» ва цаймигу медаллу.
Дуручлай ивкIссар Санчарскаллал, Марухскаллал лахъазанну. Буслан икIайва Юнус Марухскаллал лахъазаннай хьу­сса къизгъинсса талатаврия. Хъуниминнал амру бувкIун бур: «ЦукунчIав душман зунттавунай куртI хьун маитару», — тIисса. Юнус командирсса минаметрал расчетраву бивкIун бур Гъумучатусса Маннаров МахIаммадрасул, ЦIуйшатусса МахIаммадов МахIаммад, ШавкI­ратусса ХIасанаьлиев МахIмуд, Аьбдулкарин.
Юнуслул минаметрал взводрал кумаграйну, хьхьичIунмай лавгсса бахьттагьалтрал полкраща бювхъуну бур фашистурал зун­ттаву талатавуртту дуллан хIадур бувсса цIа дурксса «Эдельвейс» дивизиялул ца кьюкьлул талаталт ххит буван. Га талатавриву Юнуслул взводрал ясир увну бур 38 немецнал солдат ва хIаписар. «Гиккуя ттун цалчин сагъсса душмантал, немецнал чапхунчитал янин ккавксса», — тIий бусайва Юнуслул. Ва ца дяъвилул лахIза бур аьраличу Муслимов Юнуслул дяъвилул ххуллурдай бивтсса.
Юнус шавайн дяъвилия зана хьуссар 1948-ку шинал. Муния махъ дуклан увххун ур Дагъус­ттаннал шяраваллил хозяйствалул институтравун ветеринариялул факультетрайн.1954-ку шинал му бувккуну махъ зун ивкIун ур Ккуллал райондалий. Институт ЯтIул дипломращал къуртал бувсса Юнус най унува Ваччавсса райондалул ветуправлениялул хъунаману ивтун ур.
Давриву дурсса хьхьичIу­н­найшивурттахлу Юнус лайкь хьуну ур «Дагъусттаннал цIанихсса гъаттарал хIакин» хIурматрал цIанин ва цаймигу чIярусса бахшиширттан.
Юнуслул цалчинсса ташу бувну бур цала шяравасса Аьйшат тIисса чIунархIал душнищал. Вайннал Зайнаб ва Мая тIисса душру бувну бур. Зайнаб, буттал касму дургьуну, Ростоврай зий бур. Мая тIимур душ, Медициналул институт къуртал бувну, МахIачкъалалив оьрчIал невропатологну зий бур. Душру хъуни шайхту, Аьйшат къашавай хьуну, ахиратравун лавгун бур. Муния махъ 1970-ку шинал Юнуслул бувссар кIилчинмур ташу – 1-мур ЦIувкIратусса Кьадиаьлил ва Аьйшатлул душнищал Нурижатлущал. Ванил дуки-хIачIия дувайсса касмулул училище къуртал бувну махъ 30 шин дурссар Ваччавсса столовайлуву цIигьурну, хъунмурну зий. Аллагьутааьланал вайннан оьрчI-душ буллуну бакъар.
Арулла шин дурссар Нурижатлул канихун агьсса Юнуслуха къуллугъ буллай. Муксса хIурмат-изатрай бикIайвахха Нурижат Юнуслуха, захIматри, кIури къаувкуну, зумату буккайхтува, аьркинмур дузал дувайва. ХIакьинусса кьинигу Нурижат аьпа тIийнма бур цила ххирасса ласнаха, Хъун дяъвилул гьур­ттучинаха.
Гъан хъанай дур Бюхттулсса Ххувшаву ларсун 70 шин там шаву. Барча, Нурижат, Бюхттул­сса Ххувшаврил шадлугъ.
Арсен Аьбдуллаев