«Молодежь Дагестана» кказитрал редакциялий аьдатравун дагьну дур Хъунмасса Буттал КIанттул цIанийсса дяъвилул участниктуращалсса ва ветерантуращалсса хьунабакьаву.
А. Аьбдуллаева
Шиная шинайн дяъвилий талай бивкIминнал, дяъвилул сипат ккаркминнал кьюкьри ххялтIа дуклай дур. ХIакьину жунма миннал бусласимур, цуппа ца махъ лях гьан къабивтун, личIлулну вичIидирхьуну, хъирив нанисса никирттайнгу биян бан багьлай бур.
Итни кьини кказитрал редакциялий лахъа-хъунну, хIурматрай кьамул бунни Дагъусттаннал Ветерантурал советрал председатель МахIаммад Каримов бакIчину бувкIсса дяъвилул участниктал ва ветерантал. Ибрагьим-Паша Садикьов, Аьли НурбахIандов, ХIажи Инчилов, Анатолий Селезнев, Ленинградуллал блокадалуву бивкIсса Мария Бессалова, концлагерь ккавксса Зинаида Савельева.
«Молодежь Дагестана» кказитрал редактор Абаш Абашиловлул ветерантал Ххувшаврил байрандалущал барчагу бувну, барчаллагь увкунни шай-къашай къаувкуну, багьана къабувну цайнува цивппа, ккаккан дурсса чIумуй ва хьунабакьаврийн бучIаврихлу. Дагъусттаннал Ветерантурал советрал председатель МахIаммад Каримовлул журналистал ветерантуращалгу кIул бувну, кутIасса ихтилат бунни.
Ванал бувсунни хIакьинусса кьини Дагъусттаннай 415 участник ливчIун ушиву, миннава 150 МахIачкъалалив, 7 Москавлив, 2 Къазаннай, 2 Украиннаву, 2 Израиллай ялапар хъанай ушиву. Ми бакъассагу, Дагъусттаннай ушиву 18 азара Буттал КIанттул цIанийсса дяъвилул ветеран, къинттуллух зий бивкIми. Бувсунни хIакьинусса кьинигу ветерантал республикалул оьрмулул иширттаву хIала-гьурттуну бушиву, ялун нанисса ник Ватан ххирану тарбия дан хъуннасса даву дуллай бушиву. Хъирив ветерантуралгу бувсунни Бюхттулсса Ххувшаву ласун цукун талай ва захIмат буллай бивкIссарив.
Вай дакIнийхтунусса ихтилатирттава чIалай бия вайннан ккавкцири, хъазамраву ларчIсса медаллал буслай бия Ватан дуручлай дурсса къучагъшивурттая.
РутIуллаясса Ибрагьин-Паша Садикьов ивкIун ур автоматчиктурал отделениялул командир. Дяъвилий ккаккан дурсса къучагъшиврухлу дуллусса кIира Славалул орден дур Ибрагьин-Пашанал. Май зурул 7-нний ва леххантIиссар Москавлив, Ххувшаврил байрандалий гьуртту хьун.
ХIажи Инчилов гьуртту хьуну ур Ккавкказ буручлачисса ва цаймигу талатавурттаву. Зий ивкIун ур Гъуниннал райкомрал 1 секретарьну, МВД-лул ва прокуратуралул системалуву жаваблувсса къуллугъирттай. Ванал аьрали наградарттаву дур кIира Орден Трудового Красного знамени, орден Отечественной войны 1 степени. Ва лайкь хьуну ур республикалул яла бюхттулмур наградалунгу – «За заслуги перед республикой» ордендалун.
Социалист захIматрал Виричу «За заслуги перед республикой» ордендалул кавалер МахIаммад Махулов Хъунзахъиял райондалиясса ур. Декабрь зурул 26-нний ванал оьрмулул 100 шин хьуну дур.
Ленинградуллал шалклуву бивкIсса Бессалова Мариял бакIрачIан чIявусса бувкIун бур. Ладога микI лавчIун, инсантал эвакуировать буллалисса чIумал, чIивисса Мария Адыгейнавун багьну бур. Миччагу Краснодардал крайрайсса детдомравун. Аькьлу-кIулши хьуну махъ нитти-буттах луглан бивкIсса чIумал, Мариян кIул хьуну бур нину диркIушиву, буттагу цамур щарсса дурцуну, цамур кулпатраву ушиву. Дагъусттаннайн Мария багьну бур кказитрайсса баян баврий (объявлениялий) зун бувкIун.
Савельева Зинаида концлагерьдануву бивкIсса бур. Дяъви къуртал хьуну махъгу 10 шинай каний концлагерьдануву бивщусса номерданущал занай бивкIун бур. 27 шинай хъунмур бухгалтерну зий бивкIун бур. Зинаидал чичай шеърирду. Бур миннувух дяъвилул шиннардияссагу. КIулли щащангу, дуруххангу.
1940 шинал цала шяравусса комсомолтурал организациялул секретарьну ивтсса Аьли НурбахIандовлул комсомол билетращал бивтун бур Ккавкказнава Чехословакиянавун ияннинсса дяъвилул ххуллу. Дяъви къуртал хьуну махъгу чIярусса шиннардий госбезопасностьрал органнаву комсомолданул секретарьну ивкIун ур.
Анатолий Селезнев увну ур Рязаннал областьрай. Дяъви байбивхьусса чIумал ванан 15 шин диркIун дур, 2 шинава лавгун ур дяъвилийн. Талай ивкIун ур маршал Рокоссовскийл каялувшиннаралусса Белоруссиянал фронтрай.
