2002 шиная шихунмай Лакрал райондалий аьдатравун багьну бур интеллектуал тIуркIу «Брейн-ринг». Мунил сакиншинначитал бур райондалул администрациялул ОьрчIащалсса ва жагьилтуращал­сса даврил ва туризмалул отдел, КIулшиву дулаврил управление ва Магьирлугърал къатта.

Лакрал райондалул «Гъази-Гъумучи» команда гьарца шинал гьуртту шай­ссар республикалул тIуркIулийгу.
«Брейн-ринг» тIуркIулул сий райондалий ялу-ялун хъунна хъанай дур. Уттигъанну Гъумучиял клубраву хьунни райондалул щархъал дянивсса тIуркIу. Муний гьуртту хьунни жагьилтурая ва бугьараминная сакин хьусса 9 команда: Гъумучиял 3 команда, ЧIарттал, КIундиннал, Кьубиял, Хъунайннал, ГьунчIукьатIрал, Ккурккуллал.
ТIуркIулул хIасиллайн бувну, 1-мур кIану бувгьунни ларгсса шиналгу ххув хьусса ЧIарттал командалул, 2-мур кIану – Гъумучиял командалул, 3-мур кIану – Хъунайннал командалул. Хьхьи­чIунми тIуркIучитуран лайкь бунни АхIмадов Кирамуттин ва ХIажимирзаев Замир (ЧIарттал командалувасса); Кьурбанов Рустам ва Багъиров Шамил (Гъумучиял командалувасса); Аьшаев Салим (Хъунайннал командалувасса).
Ххув хьуминнан буллунни дип­ломру ва арцуйнусса бахшишру.