Уттигъанну Р. ХIамзатовлул цIанийсса Миллатрал библиотекалуву хьунни ДР-лул Культуралул министерствалул ва мунил биялдаралусса идарарттал дурсса давурттал хIасиллу дуллалисса батIаву.
Бадрижамал Аьлиева
Мунивух гьуртту хьунни ДР-лул Халкьуннал Мажлисрал председатель Хизри Шихсаидов, ДР-лул Счетная палаталул председатель Билал ЖахIпаров, ДР-лул ХIукуматрал председательнал цалчинма хъиривчу Анатолий Карибов, ДР-лул миллатрал политикалул министр Татьяна Гамалей, ДР-лул Халкьуннал Мажлисрал миллатирттал арардал, жяматийсса иширттал ва диндалул сакиншиннардил комитетрал председатель Камил Давдиев ва м.ц..
Ва заседаниялул дайдихьулий Аьрасатнал Федерациялул ва Дагъусттан Республикалул паччахIлугърал наградартту дуллунни культуралул цаппарасса зузалтран. Дагъусттаннал БакIчинал чулухасса барчаллагьрал чагъарду буллунни Хизри Шихсаидовлул, ДР-лул ХIукуматрал чулухасса «За сохранение многонациональной культуры и многолетний добросовестный труд» ХIурматрал грамотартту дуллунни Анатолий Карибовлул ва Культуралул министерствалул чулухасса грамотар­ттугу дуллунни ДР-лул культуралул министр Зарема Буттаевал.
Гихунмай Зарема Ажуевнал бувсунни ДР-лул Культуралул министерствалул ларгсса шинал лажиндарай дурсса давурттая, миннувугу бацIаву дунни пишакарсса искусство, аслийсса миллатрал культура, культуралул ирсирал объектру буруччаврилми, паччахIлугърал байранну, юбилейрал мероприятияртту хIадур даврилми ва цаппарасса цаймигу давурттай. Министрнал дакIнийн дирчунни Культуралул шинал дурсса агьамми давуртту: Щалвагу Аьрасатнал культуралул ва инвестициялул форум «Культура и экономика региональной политики в современных условиях» цIанилусса, 8 чил хIукуматраясса ва Аьрасатнал 12 региондалиясса хъамалгу гьурттуну хьусса фольклорданул ва аслийсса культуралул «Горцы» фестиваль, аслийсса культуралул фестиваль «Цамаури», Аьра­сатнал халкьуннал дусшиврул форум «Традиция», «Кавказ – единая семья» фестиваль, миллатирттал культуралул фестиваль «Наследие» ва чIярусса цаймигу.
Министрнал дакIнийн бувтунни ларгсса шинал паччахIлугърал къавтIаврил «Лезгинка» ансамбль, ДР-лул ПаччахIлугърал хор ва М. Къажлаевлул цIанийсса гьунар бу­сса оьрчIансса школданул оьрчIал хор лайкьну гьуртту хьушиву Сочилий XXII Олимпий ва Паралимпий ТIуркIурду тIитIлатIисса ва лакьлакьисса шадлугъирттавух, Сочилий жулва халкьуннал канил пишардал стенд ва выставка тамашачитуран хъинну ххуй бивзшиву, «Кавказские игры – 2014» фестивальданий лайкьну ккаккан бувшиву Да­гъусттан (ва фестиваль 2015 шинал МахIачкъалалив дуван дакIний бур). Бувсунни щалвагу билаятран агьамшиву дусса даталун ккаллийсса – Дарбантуллан 2000 шин хъанахъисса ппурттуву дуршиву культуралул ва тарихрал фестиваль «Дербент на перекрестке цивилизаций», аслийсса культуралул фестиваль-выставка «Голос вечности», музыкалул фестиваль «Шелковый путь» ва выставка «Кавказский базар», фестиваль «Созвучие», Дагъусттаннал луттирдал выставка-ярмарка «Тарки-Тау – 2014», акция «Ночь искусств», республикалул конкурс-фестиваль «С песней к Победе», Дагъусттаннал кьинирду Москавлив ва Волгоградрай, АьФ-лул ПаччахIлугърал Думалуву.
ПаччахIлугърал Ссихьрал театрданул Брянск, Мытищи, Тула шагьрурдайнсса аьрххирду хьуну бур тIайлабацIусса, Астраханнай Ссихьрал театрдал фестивальданувух гьуртту хьуну, кIива дипломран лайкь хьуну бур. Муниярдагу хъуннасса ххувшавуну хьуну дур ва театр Финляндиянаву хьусса фестиваль-конкурсрай кIива номинациялуву ххув шаву.
Гихунмай Зарема Буттаевал бувсунни гьунар бусса оьрчIру ялун личин баву, миннал чIарав бацIаву мурадрай Республикалул методический центрданул, Республикалул Халкьуннал творчествалул къатлул, М. Къажлаевлул школалул, Да­гъусттаннал паччахIлугърал филармониялул дурсса чIярусса давурттая, фестиваллая ва конкурсирдая, ларгсса шинал щаллу дурсса проектирдая, республикалул шагьрурдай ва районнай тIивтIусса Аьрасатнал халкьуннал аслийсса культуралул центрдая, культуралул идарарттал материально-технический база цIакь буван дурмуния, культуралул зузалтрал чIаравбацIаву, миннал даврин багьайсса кьимат бищаву мурадрай дуллусса премиярттая ва чIявусса цаймигу иширттая.
Ва батIаврил ахирданий коллегиялул кьамул дунни цаппарасса рекомендацияртту ва цIакь дунни ва шинал дувансса давурттал план.