Уттигъанну МахIачкъалалив Кировский райондалул администрациялуву хьунни шадлугърал тагьарданий паспортру буллалисса «Я – гражданин России!» цIанилусса батIаву. Му хIадур дурну дия Кировский райондалул администрациялул, Аьрасатнал Федеральный миграционный службалул Дагъусттаннаймур Управлениялул Кировский райондалийсса отделданущал ва ОьрчIан ялунсса кIулшиву дулаврил центрданущал цачIу.
Шадлугърал тагьарданий ва кьини 40 паспорт буллунни Кировский райондалул дуккаврил идарарттал активистуран, дуккавриву хьхьичIун ливчусса оьрчIан, мукунма ахIвал-хIал кIюласса ва оьрчIру чIявусса кулпатирттавассаннан.
Ва даврил сакиншинначитурал мукъурттийн бувну, паспортру ва кьяйдалий булаврил агьамми мурадругу бур оьрчIаву патриот асарду чантI учин баву, ми ватан ххирану тарбия баву, паччахIлугърал символикалухсса, лишаннахсса, жулва билаятрал гражданиннал агьаммур документрахсса миннал бургаву кIулши дусса дикIаву, миннаву жулла хIукуматрал законнахсса ва жяматраву кьамулсса духIи-дуциндарал кьараллахсса хIурмат лавай баву.
Кировский райондалул бакIчи СалихI Сагидовлул чулуха махъ лавхъунни ва райондалул КIулшиву дулаврил отделданул начальник Людмила Дубининал:
— ХIурмат бусса дустал, хъамал! ХIакьину жува гьуртту хъанай буру аьдатравун дагьсса батIаврий – Аьрасатнал чIава граждантуран паспортру буллалисса. Ихтияр дулара ттухьхьун СалихI Камаловичлул цIания зу барчагу бувну, чIа учин зун, кIикъаллайна, мудан яргну лавхъун, пархха тIий бикIаву, цанчирча, зу буну тIий жулва билаятрал бучIантIимур, му цукунсса бикIантIиссаривгу зуятур хъар хъанахъисса, — увкунни ванил.
ОьрчIал хьхьичI махъ лавхъунни Аьрасатнал Федеральный миграционный службалул Дагъусттаннайсса Управлениялул Кировский райондалийсса отделданул начальник МахIаммад Туручановлулгу.
ЧIава граждантал барча буван увкIун ия Кировский райондалул территориал избирательный комиссиялул председатель Рустам Бидашовгу.
Залданувун ва кьини бавтIун бия 200-ксса инсан – оьрчIал жяматийсса «Юный махачкалинец» организациялувасса оьрчIру, ва райондалийсса школардал дуклаки оьрчIру, педагогтал, нину-ппу.
БатIаврил ахирданий Кировский райондалул ОьрчIан ялунсса кIулшиву дулаврил центрданул тарбиячитурал ккаккан дунни концерт.
Гянджеви ХIажибалаев
Таржума
Бадрижамал Аьлиевал
