МахIачкъалалив интнийнсса хIадуршинна дуллай, шагьрулул кIичIирттаву мурхьру, къатIри бугьлагьисса, ми бугьансса кIанттурду оьргъа буллалисса, бакьин буллалисса давурттив дайдирхьунни.
З. АьбдурахIманова
Гьашину ляличIисса, Ххувшаву ларсун 70 шинал юбилей кIицI лагантIисса, шингу духьувкун, хъуншагьрулул «Горзеленхоз» МУП-рал зузалт цIанава шагьрулул кIичIиртту духIиндарайн буцин хIадур хъанай бур.
ЧIявусса машинартту заназисса ца яла аварасса Насруттиновлул кIичIираву, масалдаран, цIанава байбивхьуну бур щюлли къатIри бугьлай, тIутIив дугьансса газонну дакьин дуллай.
Мартрал кIилчинмур декадалий МУП-рал зузалт МахIачкъалаллал сайки гьарцагу кIичIираву, паркирдаву ва сквердаву тIутIив дугьлай байбишинтIиссар.
«Горзеленхозрал» каялувчинал бусаврийн бувну, вай гьантрай вайннал бугьан тIий бусса бур азарваксса муданма щюллисса мурхьру ва къатIри, хьхьинякIсса ттарлил мурхьру ва туи.
ЧIал къавхьуну щюллишиву дугьлагьисса давурттив дайдишинтIиссар Ахъушинскийл цIанийсса кIичIиравугу.
