Лакрал театрданул каялувчитурал бунияласса къулагъас дуссар артистурал унгу-унгусса захIмат тIалавсса проектирдах. Канил ка дургьуну най дуссар ттизаманнул цIушиннардугу, бу­ттахъал аслийсса магьирлугъгу.
Спектакльлаву дунияллул театрал магьирлугърал цIу-цIусса кьяйдарду ишла дуллай бухьурча,
концерт­руми дайссар халкьуннал макьанная ва мукъурттия я къабувцун. Кьянкьасса тIалавшинна ду­ссар театрданул каялувчи Бадрижат МахIаммадхIажиевал балайчитурая фонограмма ишла къадан ва балайрду хъунмурчIин халкьуннал инструментирттахун учаван. ЧIун-чIумуй дайссар Дагъусттаннал халкьуннал инструментирттал оркестрданущалсса концертру. ЦIакьсса ялув бацIаву дуссар балайрдал мукъурттилгу, ми сайки кIурчIулттувух буккан байссар.
Зулайхат Тахакьаева
Спектакльлайн тамашачитал батIин захIматну бухьурчагу, ЦIусса шинан, Хъаннил байрандалун, Интнил хьхьунин хас дурсса концертирттайн ххагу-ххарину бучIайссар. Яла-ялагу тамашачитуран ххира­ссар «Интнил хьхьу», мунил программа хъиннура яргсса, авадансса дикIавай тIий.
Гьашинусса Интнил хьхьунил концерт хьунни лапра ляличIисса. Мунил ляличIишиву ссаву дия учирча, му так хъярч-махсарардал, тIуркIурдал, балайрдал ва къав­тIавурттал авадансса программа душивруву дакъаяча, сайки 3 ссятрайсса концерт дайдирхьуну къуртал хьунцIа балайчитурахун руцлай бия музыкантътал цивппа. Уттининсса концертирттай ца отделение халкьуннал инструментирттахун духьурча, кIилчинмур отделение дайва, балайчитал балайрду цивппа тIий бухьурчагу, минусовкардай чирчусса макьаннахун. Махъсса шиннардий Да­гъусттаннай, театрдал ва филармониялул дуллалисса концертру личIаннин, цинярдагу концертру фонограммардай дакъа дуллай бакъахьувкун, жулла республикалий халкьуннал макьанну кIулсса ва ми руцин бюхъайсса музыкантътал бухвалагавай бухьунссар тIисса буруккингу бикIайва дакIниву. Ва концертрай му буруккин дакIнива бувккунни. Концертрай руцлаци­сса цинявппагу музыкантътал бия лакрал цIадурксса музыкантътурал авладраясса, гьунаргу, миллатрал магьирлугърахсса ччавугу буттахъая ирсирай дирсса.
Лакрал театрдануву звукорежиссерну зузисса жагьилсса музыкант Саддам АхIмадов ия синтезаторданий руцлай. Саддамлул зюннавгу бищайссар лап усттарну. 2005 шинал «Щунудагъ» фестивальданий ванал кIиккун бавтIсса ил-аьлам хIайран бувссия, халкьуннал инструментирттай руцавриву оьрчIалмур номинациялуву бувгьу­ссия 1-мур кIану. ЧIявусса бавссар Лакрал райондалул Магьирлугърал къатлуву музыкантну зий ивкIсса аьпабиву ванал буттал Жавраиллул усттаршиврия. Хъунама уссу Ислам цIанихсса аранжеровщик машгьурну ва бусравну ур Чачаннаву.
Аккордеондалий руцлай ия ХIасанхIусайн Дибиров. Щинни къабавсса ванал буттая Зулпукьардуягу, уссурваврая ХIанипа ва Наби Дибировхъаягу.
Зюннаврай ва дачIуй руцлай бия Ссу­хъиятусса музыкантътурал наслу — Ися МухIадов (зюннав), ванал уссил цIанихсса гармунчи Оьмардул арс Мурад (дачIу). Мурад ва ванал уссу Марат цIанихсса дачIучитал буккантIишиву буслай бия хьхьичIунсса пишакартал шиннардил хьхьичIва «Щунудагъ» фестивальданий. Тани вайнналгу бувгьуссия 1-мур кIану халкьуннал инструментирттай руцаврил номинациялуву. КIиягу зий буссар «Лезгинка» ансамбльдануву.
Мяйжаннугу, лакрал учалалуву тIийкун, «ЧIалачIимурнияр чIалакъачIимур гьарзасса» бусса бур. Бур лакраву ттигу цимигу ник музыкантътурал хIадур дансса магьирлугърал усттартал. Барчаллагь хьуннав зун, лакрал музыкалул ирс хIурматрай ва кьиматрай буручлай бушиврухлу.
КIава учалалуву тIимур мяйжан бансса иш хьунни цамургу. ЦIуссаккуллал школалул 2-мур классрал дуклаки оьрчI ХIусманов Батирхан. Зун ккаккан хъина ва чIивитIу лакку мазрайсса назмурду ккалаккисса куц. ДакIнийн багьлай бакъар ванал гьунарданун лайкьсса махъру. Заннала ляхъан увсса артист. Ттун ва ккавкссия кIивахъул зурул хьхьичI вацаправу. Саният Рамазанова бия ва оьрчI лякъин ччива, «Интнил хьхьунийн» оьвчин, тIий. Мукунма ганах луглай бия щалва театр. Театрданунсса тIайлабацIулун Заннал цалла ка дургьуну бувцуну бур театрданул директор МахIаммад ХIусайнов ва завлит Гулизар Султанова ЦIуссаккуллал школалий ниттил мазрал кьинилун хас дурсса байрандалийн. Гиккусса хъамалгу цинявппа махIаттал-хIайран бувну бур Батирханнул. Батирсса чув изаннав вия, Батирхан! Вил гьунарданулгу, ниттил мазрахсса ччаврилгур лакку маз ябан кабакьу бантIисса.
Лакку маз ва лакрал магьирлугъ ядансса давурттацIун Лакрал театр мудангу луглай буссар гьунар бусса оьрчIах ва ми цалла давривун кIункIу буллай буссар. Цалла проектирдавух гьуртту хьун театрданул оьвчай лакраву бур увкусса балайчитурайн. Унгу-унгусса бахшиш дунни вайннал га концертрайгу, тамашачитал ччянияцIава мякь бувксса ПатIимат Аьлиевайн оьвкуну. Тамансса шиннуя ПатIимат Аьлиева сахIналийн къабувккун. Хъювуссулсса дакIнищал тIутIисса, оьсса кьадарданул кьаритан бувсса лакку щархъахасса ва ми щархъурдая киносурат ларсъсса Руслан Башаевлухасса ванил балайрдал гьулусан дуруна тамашачитурал дакIру.
Барчаллагьрай бия тамашачитал Лакрал театрданул каялувчитурайн Минажат Ухмачевайн ва ХIабибат Буттаевайн оьвчаврихлугу.
Концертраву гьурттуну бия театрданул сайки цинявппа артистал ва балетрал труппа. Концерт дачин дурну бия Дагъусттаннал лайкь хьусса артистал Шамсуттин Къапланов ва Саният Рамазанова.
Гьармудангу дакIнин малхIанну шайссар заманалуцIун бавкьусса, мяъна-мурадрал биялсса ХIажиаьли ХIажиаьлиевлул балайрду. ДакIнил синттайх ках тIисса бия Шамсу­ттин Къаплановлул хъярчийсса балайрду. ЦIарал лама кунасса Ямлихан ХIажиевлул балайрдаллив тамашачитурал дакIрура къавтIутIи дуллай дия. ЦIарал ламарал бущилийсса дия театрданул балетрал труппалул актертурал, Дагъус­ттаннал лайкь хьусса артистурал Арсен КьурбанмахIаммадовлул ва Бадрижат Абачараевал цыганнал къавтIаву. Да­гъусттаннал лайкь хьусса артистка Халисат Батырбековал чIунивурив асар хъанай бия интнил къув-аьслил гуж.
Дагъусттаннал лайкь хьусса артистка ПатIимат Давидовал ва театрданувун дахьва-дахьва зун бувкIсса жагьилсса актриса Зульфия Алхулаевал хавардалгу тамашачитал биялну тяхъа бувуна. Залдануву щябивкIцири циняв­ппагу буттахъан хас бувну увкуна Саният Рамазановал цила буттал оьрмулун 75 шин там шаврин хас бувсса балай. Цалва язими балайрду увкуна Дагъусттаннал лайкь хьусса артистка Юлиана МахIаммадовал ва Аьбдул Мурадовлул.
ЧIугу, дакIгу иминсса Луиза Шагьдиловал балайрдал тIурча хъамаритан дайссар заманалул аьратталшиву. Интнил хьхьуну дуккайсса дуаьртту дурккуна Дагъусттаннал халкьуннал артисткахъул Уди Аьлиевал, Жинасат ДинмахIаммадовал ва Ларина Оьма­ровал. Къуртал дуруна концерт балетрал къавтIалтрал аслий­сса лакку къавтIаврийну, «Къиссулийну».