Щалвагу миллатрал пахруну хьусса, ххаллилсса шаэртал бувксса Хъусращиял шяравасса Сибирбаг Кьасумовлун Республикалул БакIчи Рамазан АьбдуллатIиповлул, лахъа-хъунну, Дагъусттаннай Литературалул шин тIитIлатIисса шадлугърай дуллунни Халкьуннал шаэрнал цIа. Ххи хьунни лакрал миллатраву ттигу ца халкьуннал шаэр.
П. Рамазанова
Сибирбаг Кьасумовлул поэзия ччарча пасихIшиврул даража лавайсса, ччарчагу темарду авадансса, мяъна-мурадрал куртIсса, бюххансса бур.
Мунал мукъурттий балайрду учай лакрал цIа дурксса сайки циняв балайчитурал. Ми балайрду лакрал агьалиначIа кьиматрай бур, ччянива ххира хьунугу бур. Гьунар бусса чичу Казбек Мазаевлул тIийкун, Лакку билаят бачIва хъанахъаврил, жулла щархъурду эяллай дацIлацIаврил къювугу Сибирбаглуща бювхъуну бур «ккалаккиманал бакIрай чIарарду дацIан данну» ялун личин дан.
Усттарну чичай Сибирбаглул дагъусттанналгу, хасну лакралгу литературалуву нажагь дакъа хьунакъадакьайсса, сатиралул зумунусса хъянсса назмурду ва эпиграммардугу.
Авадансса ва яргсса дур мунал творчествалул дуниял.
Сибирбаг Кьасумов чIявусса луттирдал авторди, «Исакь-лелуххи» тIисса шеърирдай чивчусса кьиссалуву Сибирбаг Кьасумов чIирисса зунттал шяраваллия буслай, Хъун дяъвилул шиннардий щалагу совет билаятрайн дурккун диркIсса лухIи кьини чIалачIи дуллай ур. Лак цIусса миналийн бизан баврил темалиясса «ЛухIи кьини» тIисса, Сибирбаг авторсса пьесагу, мунал цайми пьесардугу ккаккан бувссар Лакрал театрданул личIи-личIисса шиннардий.
Сайки зувирахъул шиннур Сибирбаг Кьасумовлул Дагъусттаннал луттирду итабакьай идаралул лакку мазрайсса литературалул редакторну зий. Му даврий зузиссаксса хIаллай чIявусса лакрал чичултрал луттирду дунияллийн буккан бувссар Сибирбаг Кьасумовлул.
Барча дуллай буру Халкьуннал шаэрнал цIа. Уттиния тихунмайгу цIу-цIусса луттирду итабакьлай, миллат ххари буллансса цIуллушиву дулуннав, дуллалимуницIун Занналгу кабакьиннав.
