Вай гьантрай жулла республикалул шагьрурдай ва районнай хьунни Интдайдихьулул байран, яни Навруз, хьунадакьлакьисса тяхъашивуртту, батIавуртту. Му байрандалул шадлугъ хьунни Каспийскалийгу, Аьрасатнал халкьуннал аслийсса культуралул къатлуву, мунил директор Башикар Вагьабовал каялувшиннаралу.
Бадрижамал Аьлиева
Интнил байрандалувух гьуртту хьун бувкIсса хIурмат бусса хъамаллуравух бия Каспийскаллал шагьрулул администрациялул Культуралул иширттал ва жагьилтурал политикалул управлениялул начальник Пайзанат Абачараева, Каспийскаллал кадетътурал школа-интернатрал директор Оьмар Оьмаров, ОьрчIал творчествалул къатлул директор Гульнара Селимханова ва мукунма цаймигу.
Ва шадлугъ дачин дурну бия ОьрчIал творчествалул къатлул тарбиячитал. Миннал бувсунни ва байрандалия, ванил мархри ча наниссарив. Навруз байрандалул тарихрая бувсунни цилва Башикар Вагьабовалгу. Цукун, ци-ци дукрарду дурну хьунадакьайсса диркIссарив буттал буттахъая шихуннайра нанисса ва байран. Бувсунни лакралми аьдатирттая, му байран хьунадакьин чара бакъа дувайшиву бартри, бувсунни Интдайдихьулул байрандалул ца лишанну хъанахъисса ва инсаннал цIуллу-сагъшиврун хъунмасса мюнпат, хайр бусса хьхьахьхьари бувайсса куц.
Ва байран цалла къавтIавурттайну чIюлу дунни Инженерный колледжрал хореографиялул коллективрал.
Столлай дия ва байрандалий дикIайсса дукрарду, ва миннувугу дия ва байрандалул лишантру – бартри ва хьхьахьхьари, ххишала бакъа нахIусса.
