Хъаннил байран Москавлив ялапар хъанахъисса да­гъусттанлувтурал ккурандалувугу кIицI ларгунни шадлугърал тагьардануву. Шадлугърал сакиншинна Покровка кIичIираву бивхьусса жулва муданмасса вакилханалий «Дагестан» Москавуллал Культуралул центрданул дунни.

Москавлив ялапар хъана­хъисса шиккун бувкIсса циняв хъами барчагу бувну, «Дагестан» центрданул чулуха вайннан дуллунни бахшишру ва тIутIал кацIру.
Душру-хъами барча буллалисса махъру лавхъминнавух бия «Дагестан» Культуралул центрданул президент Арсен ХIусайнов, ХIажи Аьли­ев, Рустам Беков, Апанни МахIаммадов, МахIаммад Якьубов, ХIажимурад Гусулаев, Даниял Шабанов, Заур Нахаев ва цаймигу.
Дуцири хъиншивуртту чIа тIисса барча бавурттал махъру кьамул бувминнавух бия аптекалул хъунмур Маржанат Аьлие­ва, экономикалул элмурдал доктор, Дагъусттаннал муданмасса вакилханалул каялувчинал маслихIатчи Зоя Ханова, ПатIимат Шамадова, Гюльшана Кьурбанова ва цаймигу.
Цинявннал цачIу хIурматрай щаллу дуварду Дагъусттаннал гимн ва мукунма лакрал халкьуннал балайрду. Яла-яла шадлугърал тIин-тIааьн ххуй бувну, ярг бувуна жула халкьуннал балайрду щаллу бувсса Зоя Хановал.
Хьхьудяризаннин лахъи ларгсса шадлугърая махъгу, циняв цаннах ца мякь бувккун, цанначIан ца биян мюхтажну бухьунссия, шаппа-шаппай къабачавай, центрданий мадара хIаллай ялагу ливчIунав.
Ахирданий, укунсса байран цанна пишкаш даврия рязийну, барчаллагьрал махъру увкуна хъаннилгу.
Интнил байрандалуцIун вания Москавлив ялапар хъана­хъисса цинявппагу жулва да­гъусттанлувтуран ххуйсса тяхъасса хьунабакьаву-шадлугъ хьуна.
М. Якьубов,
«Дагестан» Культуралул
центрданул вакил