Февральданул 27-нний Пятигорскалий, АьФ-лул Президентнал Ухссавнил Ккавкказуллал Федерал округрайсса вакилнал хъиривчу Михаил Ведерниковлул каялувшиннаралу, хьуну дур Дарбантуллан 2000 шин шаврил юбилейрайнсса хIадуршиннаран хас дурсса совещание.

Мунивух гьуртту хьуну бур АьФ-лул Президентнал Ух­ссавнил Ккавкказуллал Федерал округрайсса вакилнал кумагчи Алексей Семенов, АьФ-лул Президентнал СКФО-райсса вакилнал аппаратрал виваллил политикалул масъаларттал департаментрал советник Мария Строганова, ДР-лул культуралул министр Зарема Буттаева, ДР-лул печатьрал министр Азнаур Аджиев, ДР-лул жагьилтурал иширттал министр Заур Кьурбанов, Дарбант шагьрулул администрациялул бакIчинал хъиривчу Сави Ханукаев ва цаймигу.
Азнаур Аджиевлул бувсун бур юбилейрайн хIадур хъана­хъаврил иширттавусса информациялулмур щаллушиннарацIун дархIуми давурттая. Байрандалуйнсса хIадуршиннаравух жагьилтал хIала баврия, миннащалми давурттая бувсун бур Заур Кьурбановлул. Зарема Буттаевал бувсун бур Дагъусттан Республикалул властьрал органну цукун хIадур хъанай буссарив ва иширайн.
— Дагъусттан Республикалул Культуралул министерствалул хъуннасса даву дуллай бу­ссар Дарбант шагьрулул юбилейрайннин. ЧIяру-чIярусса мероприятиярттал ккаккан дувантIиссар цуксса авадансса ва ранг-рангсса дуссарив Аьрасатнал халкьуннал миллатирттал культура, халкьуннал творчество. Дуван дакIнийсса давурттаву агьамсса кIану бугьлагьиссар Дагъусттаннал ва Дарбантуллал Культуралул кьинирду Парижлив даврил. Сакиншиннарал даврийн багьайсса масъалартту жу щаллу буллай буру АьФ-лул Культуралул министерствалущал, ЮНЕСКОлул иширтталсса бувайсса Аьрасатнал Федерациялул Комиссиялущал, му Комиссиялул Да­гъусттанналмур отделениялущал, Дагъусттаннал материальный бакъасса культуралул ирсирал комитетращал, ЮНЕСКОлул Аьрасатнал Федерациялул Парижливсса Муданмасса Вакилханалущал цачIуну, — бувсун бур Зарема Ажуевнал.
Гихунмай мунил бувсун бур Дагъусттаннал Кьинирду Парижлив даврил хIукму хIадур бувну бушиву ДР-лул Культуралул министерствалул, бушиву сакиншиннарал комитет, зузи группа, дуллай бушиву выставка, концертрал программа, сувенирдал продукция, мукунна печатьрал продукция ва цамургу хIадур даврийн дагьайсса совещаниярду, АьФ-лул Культуралул министерствалущал дачин дурну душиву субсидияртту итабакьаврищал дархIусса давурттив.
ЧIал къавхьуну Парижлив най бусса бур сакиншиннарал комитетрал вакилтал, цаппарасса масъалартту щаллу буван. Цирда Кьинирдурив дуван дакIний бусса бур ва шинал ахирданий, декабрь зуруй, му кьинилия мяълумну кIул хьун­ссар вай Парижлия махъунмай бувкIукун.
ДР-лул культуралул министр­нал ялагу бувсун бур дуван дакIнийсса цаймигу давурттая: дунияллул халкьуннал дянивсса халкьуннал музыкалул фестиваль «Каспий – берега дружбы» (июнь зуруй), дунияллул халкьуннал дянивсса музыкалул фестиваль «Зори Дербента» (июль зуруй), балайрдал халкьуннал дянивсса фестиваль «Европа – Россия –Дербент – Азия» (август зуруй). Мукунна миллатрал музыкалул культуралул фестиваль-кросс «Созвучие», Дарбантуллан 2000 шин шаврин хасну, рирщусса суратирттал выставка, мукунна чIярусса цаймигу давурттив. Зарема Ажуевнал бувсун бур къалалул чIиртту лайкьсса даражалийн буцлаци­сса давурттив ва шинал августрал дязаннив бияннин дурну къуртал дуван дакIний бушивугу.