Февральданул 26-нний Дарбантлив тарихрал-архитектуралул ва художествалул музей-заповедникраву хьунни «Государственная культурная политика по сохранению многообразия и самобытности культур народов России» цIанилусса конференция. Му хьунни дунияллул халкьуннал дянивсса культуралул ва тарихрал «Дербент на перекрестке цивилизаций» фестивальданул лагрулуву, цувгу хас дурсса Дарбантуллан 2000 шин шаврин.
Конференция сакин бувну бия Аьрасатнал Федерациялул Культуралул министерствалул, Дагъусттан Республикалул Культуралул министерствалул, ДР-лул Культуралул министерствалучIасса Республикалул Халкьуннал творчествалул къатлул, Дарбантуллал тарихрал-архитектуралул ва художествалул музей-заповедникращал цачIуну.
Мунивух гьурттушинна дунни АьФ-лул ПрезидентначIасса Культуралул ва искусствалул советрал член, ДР-лул культуралул министрнал хъиривчу, ДР-лул Культуралул Министерствалул Республикалул Халкьуннал творчествалул къатлул директор Марита МухIадовал, музей-заповедникрал директор Аьли Ибрагьимовлул, «Первая галереялул» директор Жамиля Дагъировал, Азирбижаннал ва Табасараннал театрдал директортал Ядулла Гьашимовлул ва Аьлимурад Аьлимурадовлул, искусствоведтал Татьяна Петенинал ва Мариян МахIаммадова-Чалабовал ва мукунма чIявусса цайминналгу. Мукунма гьуртту хьунни республикалул шагьрурдал ва районнал культуралул управлениярттал бакIчитал, миннавух – Ккуллал райондалул Культуралул управлениялул хъунмур Марина Ибрагьимовагу, махъсса ппурттуву жулла республикалий тIивтIусса Аьрасатнал халкьуннал аслийсса культуралул центрдал бакIчитал, пишакарталгу.
Ва конференция бачин бувну бия Марита МухIадова.
— ХIакьину жува нахIакьдан бакъару Дарбантлив хьусса. Жунма бувчIлай бур культуралул аьдатру, Дагъусттаннал ляличIишиву ва Дарбантуллал культурардал чIярушиву дуруччин жуйвасса бурж бушиву. ХIакьину жулва цинявнналвагу, гьарцаманалгу буржри хъиннура хъуннасса жаваблувшиннаращал бурган аслийсса культура дуруччаврихгу, уттизаманнул культуралул суккушиннарахгу. Жура культуралул политика сакин дурсса куццуя хъар хъанахъиссар жулла даврил хIасиллугу. Жущава шаймур буван аьркинссар культуралулмур политика общество хьхьичIуннай дачаврил махъсса вайми ххуллурдал двигательну хьуншиврул, — увкунни Марита Велихановнал.
Гихунмайсса ихтилатраву ванил кIицI лавгунни культуралух ва искусствалухсса паччахIлугърал чулухасса ургъилгу къачIивисса бушиву, кьамул бувшиву «Основы государственной культурной политики», Дагъусттан Республика хьхьичIуннай давриву культуралул бугьлагьисса кIану ккаккан бувну бушиву «Человеческий капитал» приоритет проектраву, Республикалул БакIчинал сипталийн бувну, муниципал сакиншиннардаву тIивтIушиву Аьрасатнал Халкьуннал аслийсса культуралул центрду.
Аьли Ибрагьимовлулмур ихтилат бия Дарбантуллал тарихрал ва культуралул ирсирал объектру буруччавриясса. Мунал, мукунма, бувсунни шагьрулул кIицI лаган нанисса юбилейрайнсса хIадуршиннарая, мунил хьунийн дуллалисса давурттая. Ванал оьвкунни халкьуннал канил пишардал усттартурайн, цалла давурттив Нарин-Къалалий дикIантIисса выставка-продажалий дишин.
Жамиля Дагъировал бувсунни Дарбантлив дунияллул культурардал ва диннал Дагъусттаннал музей баврия.
Мариян МахIаммадова-Чалабовалмур доклад бия Аьрасатнал халкьуннал аслийсса культурардал Центрдал хьхьичI бавцIусса масъаларттаясса, миннул гихунмайсса ххуллурдаясса. Ванил цилва докладраву кIицI лавгунни ми Центрдавасса чIявуминнуву жагьилтал хъунмасса гъирарай багьну бушиву миллатирттал къавтIавурттахун, балайрдахун, миннул хъуниминнаягу хъар хъанай бушиву чIявусса затру, анжагъ къавтIаву дишаврийну щаллу къавхьуну, миллатрал костюмрал тарих лахьлай, балайлул, къавтIаврил хьхьичIавасса элементру цIулаган буллай дуллалисса давурттайну.
Гихунмай Аьрасатнал халкьуннал аслийсса культуралул центрдал каялувчитурал бунни ихтилатру цалла дуллалисса давурттаясса, хьунадакьлакьисса захIматшивурттаясса.
Ва батIаврил ахирданий цинявппагу бувккунни музейравух.
