Цумацагу хIакиннал бияла, пишакаршиврул даража инсаннан хъиннува асар шайхьунссар кIул бакъа бала ялун бивну, нигьал ва хьуллил дянив ливчIсса чIумал. ЩинчIав ккаккан къабаннав. Мукунсса кьини жул кулпатрайхгу дурккунни. 2012 шинал май зурул 2-нний авария хьуну, кару-ччанну гъаргъун, захIматсса тагьарданий Къизлардал азарханалийн агьуна оьрмулул 23 шинавусса жул арс Сулайманов Аьли.
Му МахIачкъалалив увцуну бучIангу жуща къавхьуна, му ппур­ттуву шагьрулувун бухлахисса кIанттурдайсса пост пIякь учин бувну бия. КIира нюжмар хьуна арс Къизлардал азарханалий уттуивхьуну. ЦукунчIавсса къулайшиву чIалай дакъая.

Щавурду хъин къахъанай, ччюрк дацIлай дия. Шиккусса хIакинтурая пайда къахъанахъисса чIалан бивкIукун, жу ххуйсса хIакин ххал уллай хъирив бизлан бивкIру. Мукун бувкру жу МахIачкъалалив травматологиялул ва ортопедиялул кафедралий зузисса Къаллаев Нажмуттин Оьмаркьадиевичлуйн. Я Аллагь, цан дуниял тIитIиннав. Ванал ччаннай ацIан унни жул арс. Гъагъари хьусса ттаркIру мюрщиссагу, хъуниссагу касакру батIлай, ссят 11-нния байбивхьуну ссят 4 хьуннин лахъи лавгуна операция. Му операциягу, арс сукку ан бучIину бакъа, Наж­муттин Оьмаркьадиевич цува Къизлардайн увкIун, шиккува бунни. Му захIматсса операциялух хIакиннал ца кIапIикI къаларсунни жуяту.
Сентябрь зуруй арс увккунни азарханалия лялату ялавай аппарат бивхьуну. ДачIи шинай цал жу му увцуну букIлай бивкIру МахIачкъалалив Нажмуттин ОьмаркьадиевичлучIан. Занан­ссар тIисса вихшала кьувкьуну бивкIсса жул арс Нажму­ттиннул, ялув авцIуну хъин уллай, шанийн агьан къаивтун, занази унни. Ва ка сававсса, инсаншиврул бутIа буллусса хIакиннал къума-цIансса жул дакIру тирх учин дунни.
ХIурмат бусса Нажмуттин Оьмаркьадиевич! Хъунмасса барчаллагь тIий, дакI ххари дансса бакъа вил оьрмулуву цичIав къахьуннав, ина кунмасса хIакинтал чIяву баннав тIий дуаьлий буру.
Рамазан ва Хамис
Сулаймановхъул,
ш. Къизлар

Андриана Аьбдуллаева
Ва жулва редакциялийн бувкIсса лакрал кулпатрал тавакъюрайн бувну на хьунабавкьура Нажмуттин Оьмаркьадиевичлущал. Ва ия цала кафедралий студентътурал вив лавсун. ЩяивкIун ихтилат бансса мажал бунугу акъая.
Ци чулийгу, ва ххаллил­сса хIакинная къакIулнангу кIул хьувча тIий, оьрмулул ва захIматрал ххуллия цIухху-бусу бувссия.
Нажмуттин Оьмаркьадиевич увну ур 1942 шинал Бархъаллал шяраву 1970 шинал Дагъусттаннал медициналул институт къуртал бувну махъ, ва тIайла увккун ур Ульяновскаллал областьрайн. Мунияр шихунмай ванал щалва цалва оьрму агьалинал цIуллу-сагъшиву дуруччаврин хас бувну бур. ЦIубутIуй ва зий ивкIун ур участковый больницалул хъунама хIакинну, Ульяновск шагьрулул азарханалул ординаторну, яла травматологиялул отделениялул заведующийну. Мунияр махъ ивтун ур хъунама хIакиннал хъиривчуну ва Ульяновскаллал областьрал Травматологиялул ва ортопедиялул центрданул каялувчину.
Аьмну 36 шин дурну дур Нажмуттиннул Ульяновскаллал областьрай зий.
Ва хъанай ур Ульяновскаллал областьрал Травматологтурал ва ортопедтурал ассоциациялул президент. Медициналул элмурдал доктор, профессор Нажму­ттин Оьмаркьадиевич цIанасса чIумал зий ур МахIачкъалалив, травматологиялул, ортопедиялул ва военно-полевой хирургиялул кафедралий.
Медициналул аралуву бивхьусса захIматрахлу лайкь хьуну ур «АьФ-лул цIуллу-сагъшиву дуруччаврил отличник», «АьФ-лул лайкь хьусса хIакин» тIисса бусравсса цIардан. Му бакъа­ссагу, Нажмуттин ур Европанал ортопедиялул ахттаршиннардал ассоциациялул (ЕОPS) член. Аьрасатнал ва дазул кьатIув дурккун дур Нажмуттиннул чирчусса 220-нния лирчусса элмийсса давуртту. Ва цимилагу хьуну ур Аьрасатнал ва дунияллул халкьуннал дянивсса конгрессирдай.
Гъаргъсса ттаркI-базурду дарзуну, инсан ччаннай ацIан ан буниялагу хъунмасса пагьму-гьунар, паргалшиву аьркинни. Му цалла паргалшиврийну цикссагу инсантал чIатIи мурадирайн биян бувсса хIакин ур Нажмуттин.
Вихьлиясса Сулаймановхъал кулпат кунма ванахь барчаллагь тIутIиссагу цикссагу лякъин­ссар.
Хамис буслай бур цала арснан кунма, чIаххуврайсса яруссаннал кулпатравасса душнингу апатI хьуну, бурхIал ттурчIан зарал бивну буссия тIий. Му душнил буттал МутIаллиблул Москавлив зузисса цана гъансса хIакиннайн оьвкуну бур, шийх цума хIакинначIан лавгун хъин­ссар жун куну. Танал Нажмуттин ОьмаркьадиевичлучIан насияра, мунаща бюхъантIиссар зун кумаг бан куну маслихIат бувну бур. Мяйжаннугу, цайми хIакинтурал вихшала дишин къахьунссар тIисса душ ца зурул дянив ччаннай бацIан бувну бур Нажмуттиннул. — Вана укун гьунар ххисса хIакин ур жула лаккучу тIий, — рязину ва пахрулий буслай бур Хамис.
ЦIуллу-сагъшиву дуруччаврил аралуву зий бур Нажму­ттиннул кулпат ва арсгу. Кулпат ПатIимат зий бур Оьтту бутIайсса станциялий, донорский отделданул заведующийну. Ва СССР-нул цIуллу-сагъшиву дуруччаврил отличникри. Вайннал арс Тамерлан медициналул элмурдал кандидатри, Аьрасатнал Спорткомитетрал медициналул совет­рал членни. Вайгу, Нажмуттин Оьмаркьадиевич кунма, цалла даву ххуйну кIулсса, зузисса кIанттурдай хIурматрайсса инсантал бур.