Ххувшаврил 70 шин там шаврил юбилейрал хьунийн дяъвилул ветерантуран ва къинттуллух зий бивкIминнан дуллай бур «70 лет Победы в Великой Отечественной войне» тIисса юбилейрал медаллу. ХIакьинусса кьини Лакрал райондалий ливчIун ур увагу 4 ветеран: Ибрагьимов Жамалуттин ва Давудов МахIаммадхIажи (ГьунчIукьатIату), дяъвилул ветеран, шаэр, чичу Абакар Мудуновма вай гьантрай ахиратрал хьунни; Аьлиев Шяпи (Ттурцияту), Къардашов ХIусман (Убрату).
Февраль зурул 26-нний Лак­­рал райондалул бакIчи Юсуп МахIаммадов лавгунни ГьунчIукьатIрал шяравун, Ибрагьимов Жамалуттиннун ва Давудов МахIаммадхIажинан юбилейрал медаллу дулун. Ванащал ветерантурачIан бувкIун бия райондалул администрациялул бакIчинал хъиривчу Амсар Къажлаев, КIулшиву дулаврил управлениялул каялувчи Явсупи ХIамзаев, Агьали социалнийну буруччаврил управлениялул каялувчи МахIаммад Ссунгъуров, Ветерантурал советрал хъунама Сулайман ХIажиев, «Ххяххабаргъ» кказитрал редактор Мусалав Мусалаев, ГьунчIукьатIрал шяраваллил бакIчи МухIад Штанчаев.
Ветерантуран ва вайннал хъаннин Ибрагьимова Баянатлун ва Давудова ПатIиматлун медаллу дуллай, райондалул бакIчинал кIицI лавгуна юбилейрал медаллу дулаврийну Ххувшаврихлу талай бивкIминнал бюхттулсса гьунарданун кьимат бишлай бушиву. ЧIа увкуна цIакьсса цIуллушиву, дакьаву ва хъиншиву. Дяъвилул ветеранталгу бия хъамаллурахь хъамакъаритайсса дяъвилул шинну цIунила-цIунилгу дакIнийн дичлай.
Хъиривсса гьантрай райондалул администрациялул бакIчинал хъиривчу Соня Макьаева, Ветерантурал советрал хъунама Сулайман ХIажиевлущал лавгунни ШавкIуллал шяравун дяъвилул къинттуллух зий бивкIсса ветерантуран – Аьйшат Учуеван, Учи Учиевлун, Уза Сулайманован, ПатIимат Кьурбанован, Хизри Тумалаевлун, Гугьарша Тумалаеван, ПатIимат Будайчиеван, АьбдурахIман Аьбдуллаевлун, Буниямин Шихаьлиевлун, Мааьзат Сурхаеван, Зайнаб Рамазанован – юбилейрал медаллу дулун.
Райондалул контрольно-счетная палаталул хъунама ХIусайн Куччаевлул юбилейрал медаллу дуллунни Гъумук ялапар хъанахъисса ветерантуран – МахIаммад Аьлиевлун, Асват АхIмадован ва АхIмад АхIмадовлун.