Уттигъанну Москавлив хьусса «Не забудем! Не простим!» цIанилусса шествие-митингравух гьуртту хьунни «Матери России» жяматийсса суккушиннарал Дагъусттаннайсса вакилталгу. Му сакин дурну дур «Антимайдан» суккушиннарал.

Щалвагу Аьрасатнал «Матери России» суккушиннарал колонна, мунил каялувчи Валентина Пет­ренкол каялувшиннаралу, був­ккун бур Москавуллал агьамми кIичIирттавасса цаннивун. Да­гъусттанная ми давурттавух гьуртту хьуссар «Матери России» суккушиннарал ДР-лийсса председатель, «Единая Россия» партиялул политсоветрал член Таиса МахIаммадова, цилгу дартIсса 130 азарда къулбас ООН-далул Генеральный секретарь Пан Ги МуннучIансса обращениялуву, «Дети имеют право на жизнь» акциялуву. Му акция тIайла дурну дур Украиннавусса ва цаймигу кIанттурдайсса дяъвирду бацIан баврийн.
Аьрасатнал регионнаву му акциялуву яла чIяруми къулбасру дур Дагъусттанная.
Москавлив хьусса шествие-митингравухсса гьурттушиннарая буслай, Таиса Билаловна тIий бур:
— На цал архIал ххарину ва пахрулий бивкIра ттущава Дагъусттаннал халкьуннал цIания, жулва лидер Валентина Петренкощал ва Аьрасатнал цайми регионнаясса ттулва даврил уртакьтуращал, Украиннавусса дяъвилийн къаршину буккан бюхъаврия. Жун къачру дяъви, жун къачру фашизм. Жулва бутта­хъал ва ттаттахъал цалва оьрмурду буллуссар Аьрасатнал инсантурал оьрмурдахлу, талихIиннарахлу, дакьаврихлу. Ва жу – миннал оьрчIал, оьрчIал оьрчIал ва оьрчIал оьрчIал оьрчIал – къадитантIиссар жулла Аьрщарайн фашизм кIилчингу дучIан. Муна муниятура на ттулва даврил уртакьтуращал ца кьюкьлуву хьу­сса, муниятура на «Матери России» ВОД-лул колонналуву бу­ссагу, — буслай бур Таиса Билаловна.
Ва кьини Революциялул майдандалив, муниннин баян бувну бивкIсса 10 азара инсаннан кIанай, увккун ур 50 азара инсан.