Вай гьантрай Каспийскалив ЧIава натуралистътурал станциялул (СЮН) актовый залдануву хьунни щаллагу дунияллий мартрал 22-нний кIицI лагайсса Щинал кьинилул хьунийнсса республикалул конкурсрал шагьрулулмур этап. Мунил сакиншинначитал бия шагьрулул КIулшиву дулаврил управление ва шагьрулул ЧIава натуралистътурал станция.
Ва даву дайдихьлай, СЮН-рал методист Зурмут Маммаевал бувсунни укунсса даву даврил агьамми мурадругу бушиву цIанасса щинал масъаларттах, му чапал дуллалаврих дуклаки оьрчIал къулагъас дуван баву, хIавзру, зумарду марцI дуллалисса давурттавун махъа нанисса никгу кIункIу даву, дуклаки оьрчIаву экологиялул культуралул гьану бишаву, му аралувусса миннал кIулшивуртту куртI даву.
Хъирив махъ буллунни шагьрулул КIулшиву дулаврил управлениялул методист ПирахIмад ЯрахIмадовлухьхьун. Муналгу цалва ихтилатраву кIицI лавгунни хъуннасса агьамшиву душиву щинахсса къулагъасрал, инсан щинал кьадру буну икIан аьркиншиву, Аьрщарай цурда щин чан къахъанарчагу, марцIсса, дукралувун ишла дуван бучIисса щин чан хъанай душиву. Барчаллагь увкунни СЮН-рахь махъа нанисса ник экологиялул тарбия дуну хъунна дуллалаврихлу.
Конкурс цурда сакин хьуну дия ххюра номинациялия: «Научно-исследовательский проект», «Литературная», «Видеофильм», «Экологический вестник», «Плакат». Конкурсравух гьуртту хъанахъиминнан кьимат бишлай, жюрилуву бия: УО-рал методист ПирахIмад ЯрахIмадов, ЧIава натуралистътурал станциялул директор Зинаида СалихIова, «Дагестанский» заповедникрал экологиялул просвещениялул отделданул зузалт Мариян МахIаммадова ва Светлана Ченцова, «РусГидролул» Дагъусттанналмур филиалданул пресс-службалул каялувчи ПатIимат Хайбуллаева ва «Трудовой Каспийск» кказитрал корреспондент Зарипат ТIагьирова.
Конкурсрал хIасиллайн бувну цалчинсса кIану бувгьунни шагьрулул 9-мур школданул, кIилчинмур кIану кIибавчIунни шагьрулул гимназиялул ва ГИМХО-лул, шамилчинмургу — шагьрулул 1-мур ва 4-мур школардал. Ми цинявппагу, мукунма цирда-цирдалусса номинациярдаву хьхьичIун ливчумигу, лайкь хьунни шагьрулул УО-рал чулухасса грамотарттан. Миннавугу язими лайкь хьунни «РусГидролул» ва «Дагестанский» заповедникрал чулухасса бахшиширттан.
Ва даврил хIасиллу дуллай, Зинаида СалихIовал кIицI лавгунни чара бакъа аьркиншиву шагьру марцI буллалисса, щюлли буллалисса давурттавух, анжагъ СЮН-рал тарбиячитал бакъассагу, хIала буван шагьрулул цинявппагу школарттал дуклаки оьрчIругу, совет заманалул язими аьдатирттайн бувну. Ванил бувсунни укунсса сипталущал цивппа шагьрулул администрациялийн ва КIулшиву дулаврил управлениялийн буккан най бушиву. Зинаида Аьбдуллаевна дакI дарцIуну бур укунсса давурттал оьрчIру тарбия бавриву хъунмасса кIану бугьантIишиврий, цанчирча цалва марцI буллай бивкIсса шагьру, мунил кIичIиртту чапал буллан оьрчIру къасисин най буну тIий. ТIайлар, жучIава нажагьссанначIа бакъа бакъар цаманал захIматрал, чIаравманал каруннил дурмунил кьадру-кьимат. Шиккугу, хIатта муданма кунма, тIайлар цилла даву дакIнийхтуну дуллалисса ва му кIулсса, махъа нанисса жагьилтал тарбия бавриву хъунмасса захIмат бихьлахьисса Зинаида Аьбдуллаевна.
