ЦIакь хьусса аьдатрайн бувну, АхIмадхан Султаннул виричунал цIа пахрулий ларсун нанисса Каспийскаллал шагьрулул 8-мур лицейраву ва кьини гьарца шинал шайссар батIавуртту.
Ва ххуллухгу чIава ахIмадхановцынал хIадур дурну дия хъамаллуран хъун дакъасса концерт. Муния махъ, цинявппагу бувккун, дирхьунни тIутIив школданул хIаятраву виричунан дацIан дурсса гьайкалданучIа. Хъирив бивунни виричунал цIа дусса аэропортрайнгу, дирхьунни тIутIив миккумур гьайкалданучIагу.
Вай шадлугъирттавух гьуртту хьунни «ДагПатриотЦентрданул» зузала МахIаммад ХIусайнхановгу. Мунал центрданул каялувшиннарал ва цалва чулуха барча бунни оьрчIру ва агьамсса кьинилущал, чIа увкунни миннан дуккавриву тIайлабацIу. Цалва ихтилатраву ванал чIурчIав дунни «аметхановец» цIанил хъуннасса агьамшиву душиврий ва му хъуннасса жаваблувшинна дусса махъ бушиврий, оьрчIругу хъунасса виричунал, цIанихсса летчик-испытательнал цIанин лайкьну къуццу тIун аьркиншиврий.
