Гьашину 15-мур шинни дунияллул халкьуннал Ниттил мазрал кьинилул байранну дуллай. ЦIусса миналийсса ЦIуссаккуллал школалийгу гьаршинах му байран сийлий, лахъа-хъунну дувай, чIявусса хъамаллурайнгу оьвкуну.

Ларгсса ххуллун кьинигу хъун­насса уттарашинна дия ЦIуссаккуллал школалий: хъунмасса спортзал, лакку маз кьимат­рай ябуллан аьркиншивриясса баннердугу лархъун, оьрчIи-чIюлу бувну бия. Спортзалданул ца чулух дия лакку дукрарду: шагьнал лачIал иникIмалул ххункIру, къячIив, ккурч, хьхьахьхьари, буркив, дукьрахIан, инил къяс-хIалахIу, ккунукрал ххункIру, нувщи ва кьаркь дикI, кIарттул ччатI. Тиннай ккаккан дурну дия жулва буттал буттахъалла ишла дуллай диркIсса тIахIни-кIичIу, лаххи-ликкия, ичIаллил кьай-кьуй. Душру-бавахъал хъатIайн-хъиншивурттайн лаххайсса бузма-гьухъул лагма лавгун бия, оьрмулул бугьарасса Гавзиева Аминат бия душваврахь ва бузма-гьухъа жалиндалул бакъухъ лавсун нанисса архIал хъаннил лаххайссия тIий. Ттизаманнай хъатIайрагу къа­ккаккайсса бузмардавугу бия душру, ми жалиндалул бакъухъ лавсун лагаврил аьдат ккаккан дан хIадур хьусса душру бивкIун бия.
ПатIимат Рамазанова
Гьаннайсса, жулла аьдатру дакIнийн дутлай, дюххансса назмурдах, асар багьансса лакку балайрдах вичIидихьлай, хъамаллурал пасихIсса лакку мазрая неъмат ласлай бия ЦIуссаккуллал жямат. Хъамалгу чIявуя, миннавух бия философиялул профессор Киров Султанов, магьирлугърал элмурдал кандидат, театрданул критик Гулизар Султанова, Лакрал театрданул хъунама ХIусайнов МахIаммад, «ЦIубарз» журналданул редактор, шаэр, прозаик ва публицист Руслан Башаев, лакрал чичултрал секциялий каялувшиву дуллалисса шаэр Илияс МахIаммадов, Дагъусттаннал лайкь хьусса балайчи, композитор Карин Кьадинаев, Дагъусттаннал лайкь хьусса балайчи Жанна Кьурбанова, «Аьрщи ва агьлу» передачалул автор Марианна МахIаммадова, ЦIуссалакрал райондалул Культуралул управлениялул хъунмур ХIабибат Буттаева, мукуна райондалул полициянал отделданул хъунама КьурбанмахIаммад Айгунов ва цаймигу бусравсса инсантал. Оьвкуну бия мукунма цIуссаккуллай аргъ дизаншиврул захIмат бувсса, давурттай хьхьичIунсса инсантурайнгу. Искусствовед Гулизар Султановал тIийкун, шяраваллил жяматгу тинмай къабавцIуну, чялишну гьурттушинна дуллай бия байрандалий.
Усттарну бачин бувна мажлис педагог-организатор Базанова Фаридал ва математикалул учительница Аьлилова Ханичал.
Найбунува кIицI лаганна хъамаллуралгу цIарду дурмур – хъинну авадансса дия байрандалул программа. Зунттаву къявхъ кусса щаращи кунма школалий сакин хьунни тIий бия Аьли Даудович каялувшиву дуллалисса къавтIалтрал ансамбль «Щаращи», ххуйя миннал къавтIавуртту, гурну хъатру ришлай бия залданувуцири. КIилчинмур классрал дуклаки оьрчIал хъин-хъинсса саннарду дурккуна, гьар шинах личIи-личIисса аьдатру ккаккан дувайсса дуклаки оьрчIал гьашину ккаккан дурна вилттили оьрчIан цIа дизаврил аьдат. Школалул бия цалва театргума – Зияуттин Айдамировлул чивчусса «ИлтIа шай дарув» тIисса хаварданувасса ца хIазсса бутIа ккаккан бувна 6-мур классрал дук­лаки оьрчIал. Лакрал чичултрал назмурду дурккуна Аьлие­ва Тамарал (6 класс), Сурхаева Зульфиял (5 класс), АхIмадова Сабинал (8 класс), АхIмадова Анисатлул (7 класс), ХIусайнова Шамсиятлул (10 класс) ва мукунма цайминнал. Ла­кку мазрай шеърирду ккалай, райондалул бяст-ччалливу хьхьичIунсса кIану бувгьусса, ЦIуссаккуллал 1-мур школалий дуклакисса Султанов Батирхангу увкIун ия чIава артистнал цIа цIакь дуван, 2-мур классраву дуклакисса Жабраилова Ххадижатлул «Ххачилаевлун» тIисса балай куна. Жяматрал чулуха балай увкуна Рамазанова Уммужигьаннул. Цуксса ччарчагу, къахьун­ссар циняв гьуртту хьуминнал цIарду кIицI лаган, на къабувсмур фотоотчетрал бусанссар, 4-5 ссят­рай лахъи ларгсса даврин кьимат бищайни, гьай- гьай, мудангу кумаг шай лагма- ялттуминнаягу. Учарухха «ккавкчу – кIулчури» куну.

Тамара Оьмаева, 1-мур ЦIувкI­ратусса:
— Педагог хIисаврай, ттул захIматрал ххуллу байбивхьу­ссар ЦIуссаккуллал школалий, вай хIакьинусса учительтуравугу чIявуми ттул учениктал бур. Ттущала му школалий зий ивкIсса чичу Руслан Башаевгу ккавккун ххарину бура. Ва школалий оьрчIру адаврай тарбия баврихгу, миннан цIакьсса ва куртIсса кIулшивуртту дулаврихгу хъуннасса къулагъас дур, лакку мазрахгу мукунна къулагъас душиву ва мероприятиялийнува чIалай бур. Лакку маз лахьхьин бавриву хъунмасса кIану бугьай фольклорданул, ччарча саннарду бавунни жунна, ччарча щакъалиххавай халкьуннал балайрдах вичIидишарду, ччарча аьрабнал хиджабру лахлахи заманнай, миннуяргу авурсса, жула кIанттунгу даркьусса, ниттил ниттихъал лаххайсса янналий тамаша барду. Мукунна хъамаритлай дур жулва миллатрал аьдатругу, мунияту жунма багьлай бур жущава шаймур буван, оьрчIан ва жагьилтуран аьдатру хъамакъаритан. ХIакьину ккарккунни оьрчIан цIа дизаврил аьдат. Учительницахъул чала­гъайрдаву балай тIутIийни бугьараминнангу жагьил замана дакIнийн багьхьунссар ттун кунма.

Татьяна Айгунова, директор:
— Винма хIисав хьухьунссар, лакрал гимнрая дайдихьу дурну махъ, Аьлиева Тамара тIисса дуклаки душнил лакку мазрал «нагу «ЯтIул луттирай» чичаракьай» тIисса леххаврийсса назмулия дайдирхьушиву ва байран. Халкьуннал шаэр Юсуп Хаппалаевлул леххаву нахIакьсса дакъар. Буниялттунгу, кьинилия кьинилийн тIиссакссагу, хъамабитлай бур жулвамур мазгу. Миллатрал тарих лахьхьинсса гъира бакъар ялун нанисса никиралгу.Тарих – му мяйжаннугу миллат­рал бурхIал ттаркIри (муниятур цалва миллатрал тарих къакIулма бурхIал ттаркI дакъасса, яъни бархI лавхIунувасса, яхI бакъасса икIайсса), музыка тIурча миллатрал рухIри, фольклор – му миллатрал мазри, ми шанма мархлуйри миллат бавцIунугу бусса. Жул коллективрал хIарачат бунни ми цимурца цачIун дурсса программа ккаккан дан.Ттун хаснува хъунмасса барчаллагь учин ччива хъин-хъинсса луттирдащал жучIанма бувкIсса хъамаллурахь. Гулизар АхIмадовнал, Руслан Башаевлул луттирдайну жул библиотека авадан хьуссар. Киров Абакаровичлулгу ххуйсса луттирду буллунни ссайгъат­ран. Ххарину буру миллатрал пахруну хьусса хъамал жучIанма бучIаврия, ххуйсса гьурттушинна дуваврия. Циняв ца хьунуру жува маз магьир буллангу, буручлангу аьркинсса.