Вай гьантрай «Молодежь Дагестана» кказитрал конференц-залдануву хьунни совет заманнай хъинну сийлий бивкIсса ва билаятрал оьрмулуву хъунмасса кIану бугьлай бивкIсса хьхьичIвасса комсомол обкомрал зузалтрал ва хIакьинусса «Я Помощник Президента» сакиншиннарал гьурттучитуращалсса хьунабакьаву.

З. АьбдурахIманова
Хьунабакьаву тIитIлай, «МД» кказитрал хъунама редактор Абаш Абашиловлул кIицI лавгунни, кIивагу заманнай сий дусса суккушиннардал чялишсса гьурттучитал цаннащал ца хьунабавкьуну, цаннащал ца цала жагьилтуращал дуллай бивкIсса ва цIана дуллалисса давурттал опыт кIибачIаву ххуйсса, мюнпатсса иширан ккалли бан бучIишиву.
Ва хьунабакьаву цурдагу хас дурну дия Аьрасатнаву февральданул 23-нний Ватан дуруччултрал кьинину кIицI ларгсса байрандалун.
Совет заманнай жагьилмур ник тарбия давриву хъунмасса бутIа комсомолданул бивхьушиврия буслай, комсомолданул областной комитетрал цалчинма секретарь АьбдуллатIип ХIажиевлул бувсунни таний жагьилмур ник ватан ххирану тарбия давриву цалла дуллай бивкIсса давурттая. Ванал мукунма кIицI лавгунни хIакьинугу республикалул бакIчи вай давуртту цIулаган даврия тик­рал буллай ушиву.
— Жун тани вузру, профтехучилищарду, техникумру къуртал бувсса, буллалисса гьарцагу жагьилнал оьрму жулами кунма язину бия. КIулшивуртту дулай учрежденияртту къуртал буллалисса гьарцагу жагьилнан кIулссия цивппа хIукуматрал кьакъабитантIишиву, даврил ва яхъанансса кIанттул щаллу бувантIишиву. Му дия та заманнул агьаммур тIалавшин. ХIакьину тIурча вузру ва цаймигу учрежденияртту къуртал бувсса выпускниктурал так 10-15 % давурттал щаллу хъанай бур. ЛивчIмигу букансса ччатI лякъинсса оьванмасса пишардай зий бур. Дакъар вайннащал дачин дурсса тарбиялул давурттив. Дакъар вайннал оьтту-ттурчIаву Ватандалухсса ччаву тIисса зат. Ва жулгу, хъунмур никиралгу, гъалатIри, –- увкунни АьбдуллатIип ХIажиевлул.
Комсомолданул областной комитетрал секретарьну зий ивкIсса ХIажимурад МахIаммадовлул жагьилтурахь бувсунни цува рес­публикалий каялувшиву дуллай ивкIсса студентътурал кьюкьрал (студотряды) билаятрай дуллай бивкIсса хъунисса давурттавухсса гьурттушиннарая. Бувсунни целиналий, БАМ-рай, Ссивирнаву ва цаймигу хъуни-хъунисса давурттавух гьурттушинна дурсса жулла студотрядру личIи-личIисса наградарттан, бахшиширттан, занази ЯтIул Ттугъан лайкь хьуну зана шайсса диркIшиву.
Тай шиннардий Областной комитетрал инструкторну зий ивкIсса Зайнуттин Окмазовлул цалла дакIнийнбичавурттаву кIицI лавгунни, Дагъусттаннал гьарцагу шагьрулий, щархъаву комсомолданул даву яла лахъмур даражалий сакин дурну диркIшиву. Комсомолданувун кьамул бувсса жагьилтурая эбрат ласлай, мивун уххансса хIарачат буллай ивкIшиву гьарцагу жагьил. Мивун буххаву бакъасса, гьарнан цалва буржну чIалай бивкIшиву Ватандалун мюнпатну, Ватандалул пахру банну къуццу тIун аьркиншиву.
Шикку мукунма цалла хIакьину жагьилтуращал дачин дурсса давурттая бувсунни «ЯПП» су­ккушиннарал гьурттучитуралгу. Вайннал бусаврийну, хIакьину хъуннасса къулагъас студентътал-жагьилтал дуллай бусса бур Хъунмасса Буттал КIанттул цIанийсса дяъвилул ветерантуращал хьунабавкьуну, миннан багьайсса ка-кумаг буллалаврих, республикалул сий-бусрав гьаз буллалисса давурттавух гьуртту шаврих.
Хьунабакьаврил ахирданий кIирагу никирал суккушиннардал икьрал дурунни вания гихунмайгу ччя-ччяни цаннащал ца ва кIулшивуртту дулаврил учреждениярттавусса жагьилтуращал хьунабакьлан, хъунмур никирал дакIнийнбичавурттая ва хIакьину дуллалисса давурттая цаннахь цаннал буслан.