Ва макьала дукIура дайдирхьуну дуссия чичлай, ттула дус Мяммаев Загьиди оьрмулул 79 шин бартлагаврищал барча уваншиврул. Амма Аллагьнал чичру цамур диркIун дия…

Амин Аьбдуллаев
ГьунчIукьатIрал Абачарахъал Мяммал арс Загьиди увну ур 23-мур апрельданий 1935 шинал. Паспорт ласайни, бакIрал чагъар бакъану, ванан увсса кьини 5-мур март 1935 шин дирхьуну дур.
Вана, ца барз кунна лерххун ларгунни, кIуллагу дакъа, щаллусса шин ххаллилсса зунтталчу, мяйжаннугусса аьлимчу Мяммаев Загьиди аьпалухьхьун лавгун. Ва акъая, цIана кунма, арцух школа къуртал бувну, медаль ларсъсса, диплом, кандидатнал ва докторнал диссертация дурурччусса. Ванал 1953-ку шинал цалва захIматрайну Гъумучиял дянивмур даражалул школа медальданий къуртал бувуна. Лавгун Москавлив, цалва захIматрайну Загьиди увххун ур Москавуллал гид­ромелиоративный институтравун. Мугу къуртал бувну, 1959 шинал ванан дуллуну дур квалификация инженер-гидротехник.
1959 шиная 1961 шинайннин Мяммаев Загьиди зий ивкIун ур прорабну Мосэнергостройрай. 1961 шиная 2014 шинал мартрай дунияллия гьаннин зий ивкIун ур Щаллагу Союзрал, цIана Щалагу Аьрасатнал, научно-исследовательский институтраву. Ва А. Н. Костяковлул цIанийсса гидротехникалул ва мелиорациялул институтраву Загьидинал лахъисса, захIматсса элмулул ххуллу бивтун бур, чIивима элмулул зузалая айивхьуну, хъунама элмулул зузалайн ияннин. Ва ия мелиорациялул ва культурно-технический давуртту механизироват дувайсса лабораториялул хъунама.
Мяммаев Загьидинал каялувшиннаралу бувну бур серийнийсса ва опытныйсса производствалий аьркинсса чIявусса мелиоративныйсса машинарду.
Загьидинал сакин дурсса технологияртту ва машинардал комплексру ишла буллай бивкIссар Нечерноземный зоналий Аьра­сатнаву, Балтий хьхьирицIсса республикарттай, Белоруссиянаву, Украиннай, Азирбижаннаву, Тюменский областьрай, Красноярский крайрай, Дальний Востокрай, Ухссавнил чулух ва АьсатIиннал ва Дагъусттаннал республикарттай. Ванал технология ишла даврийну даву дуваву ларай хьуну бур, даврил кьяйдарду ххуй хьуну бур, хъуннасса бигьашиву хьуну дур. 80-ку шиннардий Загьиди Мяммаев гьуртту хьуну ур ларайну даву щаллу дувайсса технологияртту ва машинарттал комплексру сакин бувну, ми кIинттулсса чIумал мелиоративный давурттай ишла буллай техника мюнпатрай зузи дуван. Ккаккан бувсса научно-технический проблема кутIасса чIумуй лавайсса даражалий щаллу бувну тIий, Мяммаев Загьиди Мяммал арс лайкь хьуну ур хIурматрал цIанин. СССР-данул Министртурал Советрал Премиялул лауреат (цалчинсса премия). «Заслуженный мелиоратор РСФСР» , «Отличник Минводхоза СССР», «Заслуженный деятель науки РД»
Мяммаев Загьиди гьуртту хьуну ур чил хIукуматирттайсса симпозиумирттавух. Ва ия цайнува цува хьусса лавайсса даражалул аьлимчу, техникалул элмурдал доктор, Элмурдал отраслевой Академиялул академик. Ванал рирщуну дур техникалул-элмулул 200 даву, итабавкьуну бур чIявусса статьярду цалла даврин хасъсса журналлай. Ванал дур 24 изобретения ва патент. Цалла ля­хъан дурсса давурттах ванан дуллуну дур 22 медаль, миннувух дур арцул ва мусил.
Мяммаев Загьидинал кIия арс ур, ларайсса кIулшивурттугу ларсун, ми Москавлий ялапар хъанай бур. Ца ишбажаранчи хьуну ур, цагу, техникалул элмурдал кандидат хьуну, элмулуха зий ур.
Оьрмулул 79 шинаву, хархавар бакъа, жуятува лавгунни хъунасса аьлимчу, буттал улчагу, ниттил мазгу, лакрал миллатгу ххирасса ххаллилсса зунтталчу Загьиди. Цув Аллагьнал алжаннуву ишиннав.