Гужсса марч бивщуну, январьданул 25-26-нний, МахIачкъалаллал халкь ттукI бакъа ливчIсса аварасса иширан хасну хъиривмур кьинива МахIачкъалаллал бакIчиначIа хьунни жаваблувсса цаппара структурардал каялувчитал ва пишакартал гьурттусса агьамсса батIаву.
БатIаву тIитIлай МахIаммад Сулаймановлул кIицI лавгунни, уттигъанну Республикалул БакIчинал дурсса Рисалалуву кусса гьарца махъ уттиния гихунмай иширайну, давурттайну щаллу бавриха, МахIачкъалаллал халкь цIуру-кIуру буллали къабувансса хIарачатрай зун аьркиншиву шагьрулул гьарцагу идара.
Хъирив январьданул 25-26-нний Дагъусттаннай гужсса марч бищуншиврия бувсун бивкIсса МЧС-рал баянбаврийн шагьрулул коммунал идарартту цукун хIадур хьуну бивкIссарив бусласисса махъ лавхъунни бакIчинал хъиривчу Камил Изиевлул. Ванал бусаврийну, тIабиаьтрал, гьавалул тагьарданул цал ялагу чIалачIи бувну бур шагьрулул хозяйствалул яла хьхьарами, лащинми кIанттурду. Хъуншагьрулул чIявусса кIичIирттаву чани бакъашивруцIун ххи хьуну бур гъилишиву, щин дакъасса ишругу. Яла-яла авара хьуну бур МахIачкъалаллал зума-къирагърай ялапар хъанахъисса халкь. Халкьуннал рязибакъашивуртту, миннаясса телефондалувухсса оьвчавуртту, лагьу-лахъунтту баяйсса бур ттукIрал, щинал заллушиву дан ихтияр дакъасса МахIачкъалаллал администрациялун. Масалдаран, шагьрулул электросетирдал заллухъру хъанай бусса бур Ухссавнил Ккавкказуллал МРСК. Камил Изиевлул тавакъю бувунни ва идаралул каялувшиннарайн, халкь аьрзарду буллай, цIуру-кIурулий къабуклан, цалла даву низамрайн дуцин.
Вава иширая буслай, «Единая дежурно-диспетчерская служба» МКУ-рал директор Тельман Сулаймановлул бусаврийну вай лавгсса бигьалагай гьантрай администрациялул «Горячая линия» телефондалийнсса 1425 оьвчаврива 690 дусса дур ца ттукI бакъар цачIа тIисса аьрзирайсса. Вай хъанай дусса дур Семендерданиясса, Сепараторныйлиясса, Туралилиясса, Кяхулайраясса, ЦIумур Хушетраясса, Ахъушинскийл цIанийсса ва цаймигу кIичIирттаву ялапар хъанахъисса халкьуннаясса оьвчавуртту. Шикку ванал чIурчIав дунни халкь ттукIрал щаллу буллалисса подстанциярду бух хьусса, лащинсса тагьарданий бушиврий. Мугу Роспотребнадзорданул миннул жаваблувминнахьхьун кIинтнил-ссутнил чIумуйн подстанциярду хIадуршиву тасттикь буллалисса паспортгу буллуну буна.
Шагьрулул кIичIирттаву ттукIрал ххаллу ва цаймигу давурттив дуллай бушиву бувсунни «Дагэнерго» ОАО-лул хъунама инженер МахIаммад ХIанипаевлул.
БатIаврил хIасиллу дуллай, МахIаммад Сулаймановлул чIурчIав дунни цува хъинну къарязийну ушиврий шагьрулул коммунал идарарттал дуллалисса даврия. Бувсунни чIал къавхьуну кьювкьу багьлий дарххусса коммунал предприятиярду шагьрулун махъуннай зана дуллантIисса давурттив дайдишинтIишиву, миннул цIаний суд-диваннайх лечлантIишиву.
Мукунма бакIчинал шагьрулул Архитектуралул ва градостроительствалул управлениялул хъунаманахь тавакъю бунни, «пробкарду» къахъанан, шагьрулул ххуллурдал масъала чанссавагу къулай бансса мурадрай, МахIачкъалаллал зума-къирагърай хъунмасса мизит бувансса аьрщи ккаккан дан.
