Аьрасатнал МИД-рал МахIачкъалаливсса Вакил­ханалул-прессалул къуллугърал баян бувсса куццуй, АьФ-лул Президент В.В. Путиннул ХIукмулийну, жула ватанлув, Аьрасатнал Федерациялул чил билаятирттал иширттал министерствалул жаваблувсса зузала Азим ЯрахIмадов ивтун ур Эритрея ПаччахIлугъравусса Аьрасатнал Федерациялул Илчину (Чрезвычайный и Полномочный Посол).

Ва утти Дагъусттаннал тарихраву кIилчинсса ишри, дагъусттанлув чил билаятрал илчину ивтсса. Чил билаятрал илчину ивтсса цалчинма да­гъусттанлув хьуссар ДР-лул БакIчи Рамазан ХIажимурадович АьбдуллатIипов, га чIярусса шиннардий зий ивкIссар Таджикисттаннайсса Аьрасатнал илчину.
Аьзим Аьлауттиновичлухь барча тIий буру цIусса къуллугърай итаву.
ЯрахIмадов Аьзим Аьлауттинович увссар 1960 шинал Кьасумккантлив. 1983 шинал къуртал бувссар Краснодардал политехнический институт, 1989 шинал – ДГУ, 1998 шинал – Аьра­сатнал МИД-рал Дипломатическая Академия, политический элмурдал кандидатри, кIулссар туркнал ва ингилиснал мазру.
Аь. Аь. ЯрахIмадов зий айив­хьуссар 1983 шинал Ма­хIач­къалаллал ремонтно-мон­таж­ный завод­рал участокрал мастерну. 1983 шинал ивтссар Избербашуллал ччатI шашай заводрал хъуна-хъунама инженерну. 1984-1990 шиннардий зий ивкIссар бувчIавурттайнусса комсомолданул ва партиялул давурттай. 1990 шинал увчIуну ивкIссар ДР-лул Верховный Советрал депутатну, Социальный политикалул комитетрал председательнал хъиривчуну. 1991-1993 шиннардий зий ивкIссар ДР-лул КьатIаллил экономикалул иширттал комитетрал председательнал хъиривчуну.
1993 шиная шинай цIанасса чIумалнин зий ур Аьрасатнал МИД-рал системалуву. 1993-1997 шиннардий – Азирбижаннайсса Аьрасатнал Илчиханалул советникну, 1998-2003 шиннардий – Таджикисттаннайсса Аьрасатнал Илчиханалул советникну, 2006-2010 шиннардий – Худжанда шагьрулийсса (Таджикисттан) Аьрасатнал генеральный консул.
ХIадур бувссар
ХI. Аьдиловлул