Ва нюжмардий МахIачкъалаллал администрациялий хьунни Жагьилтурал иширттал, спортрал ва туризмалул комитетрал ларгмур шинал дурсса хIасиллан хасъсса батIаву.
Шикку гьуртту хьунни шагьрулул бакIчинал хъиривчу Рафик Буттаев, Шагьрулул Собраниялул хъунаманал хъиривчу Аьдилбаг Мурзаев, Жагьилтурал иширттал, спортрал ва туризмалул комитетрал хъунама Муса Оьмаров ва цаймигу.
2014 шинал цала Комитетрал дурсса давурттая буслай, Муса Оьмаровлул кIицI лавгунни ларгмур шин цалла комитетран хьушиву тIайлабацIусса ва жагьилтуращал дурсса мероприятиярдал, акциярдал буллугъсса.
Мукунма ванал кIицI лавгунни, спортрал клубру щурущи буваврицIун, шагьрулул жагьилтурал командартту билаятрал, республикалул личIи-личIисса бяст-ччаллаву хьхьичIунсса кIанттурдан лайкь хьушиву, гьарза хьушиву вайннал ларсъсса ххувшавуртту. Масалдаран, жула жагьилтурал ххуйсса хIасиллу ккаккан дурну дур щалва Аьрасатнал даражалий дувайсса «Машук», «Селигер», «Каспий» форумирттай. Гьуртту хьуну бур Олимпий тIуркIурдайн хIадур хъанахъийни щалва билаятрайх олимпий цIу ларсун нанисса эстафеталуву.
Комитетрал хъунаманал бувсунни вай хIасиллу цал давриву хьун дан хъуннасса гьурттушинна, хIарачат бувшиву шагьрулул администрациялул ва бакIчи МахIаммад Сулайманов чIарав ацIаврийну.
ХьхьичIуннайшивурттая бакъасса, Муса Оьмаровлул бувсунни ва давриву цанна хьунадаркьусса чIярусса диялдакъашивурттаягу.
Масалдаран, шагьрулул спортшколарду бусса бур хъинну лащинсса даражалий, диял къахъанай дусса дур шиву ишла дувансса спортрал инвентарь, бакъасса бур бяст-ччаллу бувансса аьркинссаксса заллу.
Рафик Буттаевлул, ва масъалалий чIурчIав дуллай, бувсунни 2015 шинал шагьрулул администрациялул хIарачат бувантIишиву спортрал заллу ва площадкарду чIяву бан.
ДР-лул физический культуралул ва спортрал министрнал хъиривчу МахIаммад Рабадановлул кIицI лавгунни, СКФО-рал регионнай гьар шинах бувайсса «Кавказские игры» тIисса спортрал бяст-ччаллу 2015 шинал МахIачкъалалив бувантIишиву ва умуд бивхьунни ва давривугу МахIачкъалаллал спортрал ва туризмалул комитетрал хъуннасса гьурттушинна дувантIишиврийн.
Мукунма шикку кIицI лавгунни гьашину Аьрасатнаву Ххувшаву ларсун 70 шин хъанахъисса юбилейрайнсса хIадуршиннараву МахIачкъалаллал жагьилтурал хъунмур хъар ласунтIишиву, мукунма Дарбантуллал юбилейрайн хIадур хъанахъисса давурттавухгу хъуннасса гьурттушинна дувантIишиву.
