Дайдирхьунни цIусса дуккаврил шин. Сентябрьданул 1-нний жулла республикалий 1,5 азарва школалул нузру тIиртIунни дуклаки оьрчIал хьхьичI, миннуву партардах щяивкIунни 366 азара дуклаки оьрчI. Миннавугу 36 азара чIивитIу ур ва кьини цалчинмур классравун лавгсса.
Ва кьини жулла республикалул школарду оьрчIи-чIюлу бувну бия дуклаки оьрчIал, учительтурал,
нитти-буттахъал, вай махъсса зурдардий шануркьюну диркIсса школардал хIаятругу чантI учин дунни ххарисса оьрчIал чIурдал, 1-мур сентябрьданий, цикссагу ацIрахъул шиннардил дянив цIакь хьусса аьдатрайн бувну, хьусса шадлугърайсса линейкардал аьлагъужалул.
Вай махъсса шиннардий кунна, гьашинугу цIусса дуккаврил цалчинмур кьини хъуннасса къулагъас дуллай бия мюхчаншиву дуруччаврих. ДР-лул КIулшиву дулаврил ва элмулул министерствалуву баян бувсса куццуй, хьхьичI кьинива байбивхьуну бур школардал ялув бацIаву дуллай, кинологтурал ми багьайкун ххал бувну бур. КIулшивурттал кьини республикалул школардал мюхчаншиву дуручлай бивкIун бур 6 азарунния ливчусса полицейскийтал.
Аьрасатнал Федерациялул КIулшиву дулаврил ва элмулул министерствалул ккаккиярттайн бувну, Щалвагу Аьрасатнаву ва кьини школардайн лавгун бур сайки 19 миллион дуклаки оьрчIал, миннавагу миллион ва бачIи бур цалчинмур классравун лавгсса мюрщултрал.
ТIайлабацIусса шин хьуннав 2014-2015 дуккаврил шин цинявннаннагу.
