Украиннавасса цикссагу инсантал бувкIунни Дагъус­ттаннайн, дяъвилул цIараща ххассал хъанай. Дяъвимур найнма бур, му буллалиманан бакъар цичIав бала, пик­ри цалва къатта-къуш, давурттив кьадиртун, вай-вайрттайх бувккун лавгсса инсантурал, кIулшивуртту ласун, 1-мур сентябрьданий школардайн гьан аьркинсса, дуклан аьркинсса оьрчIал ялув.

КIама бивщуну бур Украиннал халкь щалва Аьрасатнавух. Къачансса бур ми Дагъусттаннайгу. Дагъусттаннайн бувкIми лихъачалт­рал оьрчIругу сентябрьданул 1-мур кьини лавгунни цала чIумуйну (щиллив бюхъай оьрмулухунссагу) мина дурсса кIанттайсса школардайн.
Мукун, МахIачкъалаллал шагьрулул 12-мур школалийн лавгунни Украиннавасса 17 оьрчI. КIулсса куццуй, вай оьрчIал нину-ппу, мукунма Украиннавасса цаймигу лихъачалт къуш бивщуну бур «Дельфин» цIанилусса бигьалагай базалий.
Сентябрьданул 1-нний ва школалий хьусса шадлугърайсса батIавривух гьуртту хьунни ДР-лул ХIукуматрал председательнал цалчинма хъиривчу Анатолий Карибов. КIулшивурттал кьинилущал дуклаки оьрчIру ва учительтал барчагу бувну, ванал увкунни:
— КIулшиву дулаврил аралуву хIакьину чIярусса давурттив дуллай бур. Так ца Дагъусттаннай 1 азаллий 534 школалийн лавгунни 366 азаллий 352 дуклаки оьрчI. Ва хъанахъиссар кIулшивурттачIан хъита тIутIисса оьрчIал ва душварал хъунмасса армия. Аьрасатнал Федерациялий 1-мур сентябрьданий тIивтIуссар 55 школа, миннувагу жулла республикалий тIивтIуссар 11 школа. Школалийн бачиннин­сса кIулшиву дулавривугу жулла республикалий чIярусса давурттив дуллай бур. Ларгсса шинал бувссар школалийн бачиннинсса кIулшиву дулай­сса 25 идара. Миннун харж бувссар 2 миллиард 715 миллион къурушрал. ОьрчIал багъравун гьансса хIалу хьуссар 7 азара оьрчIал. Ва шиналгу буллай буссар 11 детсад, 1 азаллий 260 оьрчIансса. Ми цифрардал махърив дуссар хъинну хъуннасса даву ва ми цимурца дуллалиссагу Дагъусттаннал БакIчи Рамазан АьбдуллатIиповлул кIулшиву дулаврил аралух дуллалисса личIлулсса ургаврийн бувнур, — увкунни Анатолий Карибовлул.
Шагьрулул 12-мур школалул коллективрахь ванал увкунни:
— Зул школалул чIяву миллатирттая сакин хьусса, бавкьусса коллективраву ххи хъанай бур Украиннавасса оьрчIру ва душру. Вай жулла республикалий цаппарасса зурдардий бигьалавгунни, чансса бунугу, вардиш хьунни жулва шийхсса оьрмулийн ва хIакьину вай бухлай бур зул кулпатравун. Вай жулва хъамалли, жулва кунакталли, Дагъусттаннай тIурча кунак гъанчунаяргу гъанссар. Мунияту дакI дарцIуну ура вай оьрчIру шийх ххуйну дуклантIишиврийн, жува тIурча вайннан кумаг буванну кIанттул хьун. На чIа тIий ура зун авадан, чIяру дуллан зулла кIулшивуртту, цанчирча кIулшивуртталли зун кумаг бувантIисса дакI дарцIуну, кьянкьану къуццу тIун ва цIанасса бигьа дакъасса чIумал, — увкунни Анатолий Шамсуттиновичлул.
МахIачкъала шагьрулул Кировский администрациялул бакIчи СалихI Сагидовлул цалвамур ихтилатраву кIицI лавгунни цалла каялувшиву дуллалисса райондалул школардай дуклантIишиву Украиннавасса 25 оьрчI, миннавагу 17 оьрчI 12-мур школалий, цивппа ххарину бушиву Украиннавасса чIава дустурая ва умудрай бушиву педагогтурал ва дуклаки оьрчIал нахIусса коллектив миннан бавкьу­сса аьзизсса хьунтIишиврийн.
Дагъусттаннал школардайн тIурча ва дуккаврил шинал дайдихьулий лавгун бур Украиннавасса 59 оьрчI. Миннаватугу МахIачкъалаллал 51-мур, 40-мур, 42-мур ва Ленинккантрайсса 2-мур школардайн лавгун бур 10 оьрчI.
Къарабудахккантуллал райондалий «Леззет» базалий мина дирхьуми лихъачалтралми оьрчIру (16 оьрчI) лавгун бур Манасккант поселокрал школданийн.
Бигьалагай базардая школардайн ва махъунмай базардайн оьрчIру бувцуну занан най бур школалул автобусру. КIулшивурттал кьинилийннин Украиннавасса лихъачалтрал оьрчIан хIадур хьун кумаг бувну бур школарттал цалва. Миннал ми оьрчIан дуллуну дур школалул янна, портфеллу, тетрадьру, луттирду ва дуккавриву чара бакъа аьркин шайсса цамургу кьай-кьуй. Муниципал сакиншиннардил харжлугърацIух ларсун дур ми оьрчIансса усру.
Украиннавасса лихъачалтрая аьмну тIурчаннив, цIанасса ппур­ттуву Дагъусттаннай усса ур 521 инсан, миннавагу 141 оьрчI.
Щалвагу Аьрасатнаву тIурча 1-мур сентябрьданий школардайн лавгун ур Украиннавасса 16 азараксса оьрчI, миннавагу 4, 5 азара оьрчI – Москавуллал областьрайсса школардайн.