ЦIуну бувсса школа ТIюхчардал шяраваллил жяматрал оьрмулуву хъинну агьамшиву дусса ишну хьунни. Школа тIитIаврил ххаришиву шяраваллил жяматращал кIидачIин ва кьини ТIюхчарав бувкIун бия бусравсса хъамал: ДР-лул ХIукуматрал ва Республикалул БакIчинал администрациялул хъунаманал хъиривчу Мусалан Тахманов, ДР-лул финансирттал министр Аьли Исламов, ДР-лул Халкьуннал Мажлисрал депутат Зайнулла Мирзоев, ГУП «Новострой» дирекциялул хъунама МахIаммадсани Мяндиев, ЦIуссалакрал райондалул бакIчи МахIаммадхIажи Айдиев.

ЦIу-цIусса къатри дуллай, шиная шинайн гьарта-гьарза хъанай най дур цIусса миналийн дизан дурсса шяраваллу. Новостройрайсса ТIюхчардал шяраваллил оьрчIан ххаллилсса бахшишну хьу­нни цIусса дуккаврил шинайн ва шяраву 315 оьрчIансса, уттизаманнул технологиярттайну бувсса ва цIусса оборудованиялул дузалсса ххаллилсса школа тIитIаву.

А. Аьбдуллаева
И. САИДОВА
ЦIусса школа ва аьдатравун дагьсса кIулшивурттал кьини тIитIлай, ихтилат бунни ЦIуссалакрал райондалул бакIчи МахIаммадхIажи Айдиевлул.
— Ххирасса оьрчIрув, хIурмат бусса хъамал, ТIюхчардал жямат! ХIакьину ва шяраву цIусса школа тIитIаврийну ЦIуссалакрал райондалул тарихраву цIусса лажин ххи хьуссар.
ЦIуссалакрал агьлу цIусса миналийн бизан баврил программалул лагрулуву дурсса чIярусса ххуй-ххуйсса давур­ттавасса ца ва школа тIитIавугу хъанахъиссар.
Ванийнугу исват хъанай бур республикалул каялувчитал бизан баврил масъалалух къулагъас чан дуллай бакъашиву. Щак бакъар, захIматшивурттах къабурувгун, республикалул хъуниминнал бизан баврил программа ччясса чIумуй щаллу дантIишиврий. ЦIуссалакрал райондалул агьалинал цIанияту барчаллагь тIий ура Даг­ъусттаннал БакIчи Рамазан АьбдуллатIиповлухь ва ДР-лул ХIукуматрал председатель Аьбдуссамад ХIамидовлухь. Ттизаманнул тIалавшиннардаха лавхьхьусса, циняр шартIру дузал дурсса вай къатри ччясса чIумул мутталий дурну къуртал дурну тIий, барчаллагь тIий ура мукуна ГУП «Новострой» дирекциялул хъунама МахIаммадсани Мяндиевлухь, подрядчик МахIаммад Аьриповлухь. Дуклаки оьрчIахьрив ттун ччива учин: зун дуклансса циняр шартIру дузал дурну дур. Умуд бур, ва школалий ххуйсса кIулшивурттугу ларсун, цIанихсса ТIюхчардал школалул ва шяраваллил цIа-кьини бюхттул дансса пишакартал хьунссар зуяту тIисса. Учительтураннив на чIа тIий ура жаваблувсса ва бигьа дакъасса тарбиялул давриву тIайлабацIу ва ссавур, — увкунни М-ХI. Айдиевлул. Хъирив дуклаки оьрчIру ва учительтал барча буллалисса ихтилатру бунни хъамаллурал.
Аьли Исламов, ДР-лул финансирттал министр:
— Ххирасса оьрчIрув, ни­ну-ппухърув, учительтал! ДР-лул БакIчи Рамазан Аьб­дуллатIиповлул, ДР-лул ХIуку­матрал председатель Аь. ХIами­довлул цIания барча буллай ура зу хIакьинусса байрандалущал.
Сентябрь зурул 1-сса кьини жучIара мудангу бусравну, бюхттулну тIайла дуккайсса байранни. Жунма цинявннан дакIнийссар цалчин школалийн бувкIсса кьини, жухьра дарс дирхьусса учительтал. Школалийри жува кIулшивурттал гьану бизайсса, школар кIулшивуртталгу, тарбиялулгу бакIщаращи. Шикку лавхьхьумур гихунмайсса зул оьрмулуву чIявуну бучIи лякъинтIиссар. ДакIнийхтунусса барчаллагь сентябрь зуруйннин вай къатри къуртал дан хъунма­сса захIмат бивхьусса подрядчиктуран, цинявппагу ва давриву гьуртту хьуминнан.
ХIакьинусса кьини республикалий 10 цаймигу цIусса школарду тIитIлатIиссар. ЖучIара кIулшивурттах мудангу ххишаласса къулагъас дуллай буссар. ХIакьинусса кьини республикалул бюджетрал хъунмасса бутIа – сайки 30% кIулшивуртту дулаврин харж буллай буссар. Цуксса аькьлу-кIулши дусса, итххярх­сса дурив ялун нанисса ник, муксса чаннасса бикIантIиссар жулва бучIантIимур.
Мусалан Тахманов, ХIу­куматрал ва Республикалул БакIчинал Администрациялул хъунаманал хъиривчу:
— ХIакьину щалвагу билаят­рай цинявппагу дуккаврил заведениярттаву кIицI лаглай бур КIулшивурттал кьини. Зун ва кьини дакIний личIан тIий дур цамургу ххарисса иширайну. Дуккаврил шин зу дайдишин най буру вай авурсса, ттизаманнул тIалавшиннардай дурсса цIусса къатраву. Вай къатри чIирисса чIумул дянив дурну къуртал дан бюхъаврилгу бусласиссар бизан баврил программа республикалий чялишну най душиврия.
Республикалул БакIчинал Администрациялул ва ДР-лул ХIукуматрал чулуха бахшиш буллай буру зул школалун музыкальный центр ва школалул биб­лиотекалун биялсса луттирду.
МахIаммадсани Мяндиев, «Новострой» ГУП-рал дирекциялул хъунама:
— ХIакьину ТIюхчардал шяраву тIитIлатIисса ва школа цIусса миналий тIитIлатIисса 7-мур школа хъанахъиссар. Утти­гу жунма кIива школа тIитIин ливчIссар. Ца Гьамиящиял, ца ЦIуссачIурттащиял шяраву. Ми школардугу уттинин бувминнуяр ххуйсса бикIантIиссар. ЦIусса миналий гьашину тIитIинтIиссар шанма школа. Му бакъассагу, Чапаевалий байбишинтIиссар буллай детсад. ЯлунчIил 4-5 детсад бансса пикри буссар.
Республикалул каялувчитурал хъуннасса къулагъасралун ларсун дур бизан баврил программа. Мунийну жу дуллалимунингу лябукку хъанай бур.
ОьрчIан оьрмулуву ва ду­ккавриву тIайлабацIу чIа тIисса ихтилат бунни чIярусса шиннардий школалий зий ивкIсса бусравсса учитель Идрис Идрисовлул.
Ихтилатру къуртал хьуну махъ МахIаммадсани Мяндиевлул дуллунни школалул кIулли директор ШайхахIмад Дадаевлухьхьун. Ванал дакIнийхтуну барчаллагь увкунни школалул къатри чIумуй къуртал дан махъсса 2-3 зуруй хьхьу-кьини къакуну зий бивкIсса подрядчиктурахь, строительтурахь, «Новострой» ГУП-рал дирекциялухь.
Цалчин школалийн бувкIсса мюрщултрал назмурду дурккуну махъ, школалул къатравун­сса ххуллу тIитIлай, хъамаллурал кьувкьунни ятIул лента. Бувххунни шиккун дуккаврил ххуллий цалчинсса шаттирду ласласисса, хьхьичIва-хьхьичI школалийн бувкIсса мюрщи оьрчIру. Вайннан личIи бувну бия яла чаннамур, яла чIюлумур класс. Гьашину цIусса школалий дуккаврил шин дайдихьлахьи­сса, цалчин школалийн бувкIсса оьрчIру бахтти бусса бухьунссар. Цалчинсса дуккаврил кьини вайннал хьунадаркьунни цIусса къатраву, бусравсса хъамаллуращал. Му бакъассагу, утти вай оьрчIан лагма щархъайсса школардайн занан къабагьантIиссар. Ва кьинисса ТIюхчардал жямат­рал байран лахъа-хъун дунни райондалул культуралул зузалт­ралгу.