Дагъусттаннал паччахIлугърал ссихьрал театр хъунмасса тIайлабацIулущал гьуртту хьунни ва зурул 15 – 19 – нний Финляндиянал Турку шагьрулий хьусса «INSPIRATION» тIисса дунияллул халкьуннал конкурс-фестивальданий. Цила даврих бунияла эшкьи хьусса лавайсса даражалул пишакар, Аьрасатнал искусствалул лайкь хьусса деятель, театрданул каялувчи Аминат ЯхIияевал ва Украиннава увкIсса режиссер Михаил Урицкийл каялувшиннаралу бивхьусса Андерсеннул классикалул магьлуясса «Дюймовочка» спектакльданул хIайран бувну бур фестивальданул жюригу, кьатIаллил билаятирттал тамашачиталгу. Ссихьрал театрдал коллективрдаву бувгьуну бур цалчинмур кIану ва ялагу ххув хьуну бур «Лучшая режиссерская работа» ва «Лучшее художественное офомление» номинациярдаву.

Зулайхат Тахакьаева
Санкт-Петербурграясса художник-постановщик Вера Задорожнаял эскизирттая ссихьри дурну дур дагъусттаннал художник Барият Умаровал.
Финляндиянал машгьурсса драматургтал: Сами Раннила ва Пека Сааристо; Санкт-Петербургуллал «Петрушка» театрданул каялувчи Игорь Кутков, Латвиянал драматург Сергей Коротков гьурттусса жюрилун лап ххуй бивзун бур дагъусттаннал актертурал – ДР – лул лайкь хьусса артистка Екатерина Касабовал, Зульфия Умаровал ва Мурад Амагаевлул тIуркIу.
Дунияллул халкьуннал фестивальданул президент Светлана Мюхкердул кIицI ларгун дур да­гъусттаннал актертурал ларайсса устталугъ.
«Спектакль цуппа оьрус мазрай биширчагу, ххаллилсса костюмирттайну, актертурал чIурдайну финнал тамашачитуран бувчIунни спектакльданул мурад ва мунин лавайсса кьимат бивщунни. Жюригу зуйн ва спектакльданухлу барчаллагьрай бур. Барчаллагь ва фестивальданий гьуртту шаврихлу,» — куну, ванил оьвкуну бур ялунчIил август зуруй хьунтIисса фестивальданийгу гьуртту хьун.
INSPIRATION фестиваль хьуну дур 2010 шинал академический, эстрадный ва халкьуннал творчествалул фестиваллу дуллалисса дунияллул халкьуннал магьирлугърал организациялул кьулчинсса проектну ва Аьрасатнал, Украиннал, Польшанал, Латвиянал, Эстоннал, Швециянал, Финляндиянал ссихьрал театрду ва ТЮЗ – ру гьуртту хьусса цалчинсса фестивальну.
Гихунмай Дагъусттаннал Ссихьрал театр гьуртту хьун тIий бур октябрь зуруй МахIачкъалалив хьунтIисса Ухссавнил Ккавкказнал республикарттаясса ва ЛухIи хьхьирил ва Каспи хьхьирил регионная­сса оьрус театрдал фестивальданий; вава зуруй гьуртту хьун тIий бур «Каспийский берег» тIисса дунияллул халкьуннал фестивальданий. Миккугу ккаккан бан тIий бур спектакль «Дюймовочка». Вава зуруй театр гьан тIий бур Брянск шагьрулийн «Тайна персиковой косточки» спектакльданущал, ноябрь зуруй – Москавлив Образцовлул цIанийсса дунияллул халкьуннал фестивальданийн «Айболит» спектакльданущал.
Шиккува кIицI бан, Дагъус­ттаннал Ссихьрал театрданул творческий союз дунияллул театрал сообществалул итталун ччянира дагьну дур, Аьрасатнал ва дунияллул лагрулийсса фестиваллайсса яргсса гьурттушиннардайну.Аьрасатнал Халкьуннал артист, «Театр кукол – ХХI век» тIисса Аьра­сатнал ассоциациялул президент, ЮНЕСКО – лучIасса UNIMA — лул хъунама секретарьнал маслихIатчи Станислав Железкин ур Дагъус­ттаннал Ссихьрал театр Аьрасатнал хьхьичIунсса ацIва Ссихьрал театр­данул сияхIравун багьлагьиссар, тIий. Театр Аьрасатнал ва дунияллул лагрулийсса фестиваллай чялишсса гьурттушинна дуллалаврийну республикалул цIагу гьаз хъанахъиссар.