Вил аманатрайн хиянат къахьунну.
Шинал хьхьичI, сентябрь зуруй, ахиратравун ларгунни жул нину — Мавраева Написат ХIусайннул душ, я душваран, я арсурвавран захIмат къавхьуну, бигьану, бусравну. ДР-лул лайкь хьусса учитель,
Ккуллал ва Лакрал районнал школардай дарс дихьлай ивкIсса, инсантурал чIарав хъинну ацIайсса Мавраев Мусащал нахIуну-хIалалну бувтссар Написатлул цилва оьрму.

Мюрщисса оьрчIру бур куну, жул нину колхозравусса царагу даврия махъаллил къашайссия. Зий бивкIссар хьхьичIунсса звеньевойну. Жугу хIарачат байссия нину даврия дучIаннин жулва бигар биттур бан, ичIаллил давуртту дуван, ниттил дакI ххари даншиврул.
Ниттил чIявуну бусайва цилламур оьрчIшиврия, дяъвилул цIарава ппугу зана къавхьуну, хъинну захIматну ларгшиву. Мунияту жу хIарачат байссия ниттил бува увкумур кIийла тикрал къабаван.
Жул ниттил хъунмурчIинмур оьрму лавгуна духсса къатри цIулаган дуллай, пяп-чариха зий. Амма ялагу цIусса къатри дан багьуна. Гьарца къатлун аьркинмур, чартту личIаннин, тахта-тIама кьаниятуя ласайсса. Даврия нину нигьа къадусайва. Мунил учайва: «Инсан даврилнияр дардиралли утай­сса», — куну.
ЦIусса къатравун жалин дуцин ният дурсса хъунама арснал дард духIан багьуна жул нитти-буттангу, жунгу. Жард увкуна буттагу. Жун ккарккуна жулла бава, му лухIи дард дунигу, хъинну ссавур дурну, Заннайн ладизлай, ялуннай хъяй, вирдай аьтIий. Цила яла ххирама арснахсса ччаву гайми оьрчIан дуллай, хIарачат бувна.
Нину муданнагу душваран­сса эбратри давриву-дитавриву, учайсса мукъуву, бизайсса ша­ттираву. Щукру Аллагьнайн, Заннал кумаграйну, жущава шайкун хIарачат буллай буру жугу нитти-буттал бувсса захIмат дузрайн буккан бан.
Ниттил чIявуну маслихIатру байва жагьилсса хъаннин. Кулпатирттаву захIматшиву хьу­сса кIул хьурча, мунил учайва: «Арамтурайх мабукларду, ми битира, къатта-къуш байсса хъаннилли», -куну.
Инсан гьарца цалва мурад­райнгу ивну, цалва оьрчIал вив лавсун дунияллия лагаву ва заманнай хъунмасса иш бур, амма ялу-ялун асар хъанай бур, жулла яну-кIукIлусса, хъинсса нину чIарав дакъашиву кIул хъанай.
Шиккува хъинну хъунма­сса барчаллагь учин ччай буру жул бава дунияллия лагаврил кьурчIишиву кIидачIин, жижара бан, лякъин бигьабакъасса Степной поселокрайн бувкIцири ЦIувкIуллал жяматрахь ба­къассагу, махъсса цинявппагу агьулданухьгу. Зун давран шийва, дунияллийва, булуннав! Зул дакIнийцири мурадру щаллу хьуннав!

Бавай, аьзиз бавай,
Дури шин шавай
Ина жу кьабивтун
Ва дунияллий.

Шаймур буллай буру
Къабан хиянат,
Жул бавай, ина жуйн
Бувсса аманат,

«Ттул аьзизсса оьрчIрув,
Бавкьуну бикIи.
НахIушивур жулва
Оьрмулул гьану!».

Ина ххирацири циняв,
ш. 1-мур ЦIувкIул

——————————————

Хъуннасса кьурчIишиву кIидачIлай, жижара буллай буру КIямашрал шяравасса Даитбекова Халуннухь, ванил оьрчIахь, душварахь, ссурахъаврахь, вайнная бивзминнахь вайннал ххирасса арс, уссу,
Даитбеков АьбдулпаттахI МахIаммадлул арс
жагьилсса оьрмулий жуятува личIи шаврийн бувну.
АьбдулпаттахIлун къабуллумур оьрмулул бутIа муная бивзминнан, уссурссуннан буллуну лякъиннав Хъунасса Заннал.
РухI алжаннул ххари даннав, гьав нурданул дуцIиннав.
КIямашрал жямат
———————————————————————

Вай гьантрай, хъунмасса хIаллай къашавайгу бивкIун, рахIму бакъасса азаруннища ххассал хьунсса кьисмат къавхьуну, аьпалу­хьхьун лавгунни ххаллилсса лакку душ, дакIгу марцIсса, хасиятралгу иминсса, мазралгу пасихIсса, аькьлу-кIулшилулгу камилсса, яхI-къириятрал заллу, ТIаннул ЦIувкIуллал шяравасса хъамитайпа
Рамазанова Лианиза Аьзил душ.
Лианизал кьурчIисса бивкIулул къумашивугу кIидачIлай, жижара буллай буру ванил ниттихь Рукьижатлухь, ссурваврахь Имарахь ва Аьйшахь, уссурваврахь Айвазлухь, Мусахь ва Самирдухь, ссурахъаврахь, махъсса гъан-маччанахь ва щалвагу ЦIувкIуллал жяматрахь.
Ванин бакъамур оьрму махънан булуннав, оьрмурдай барачат бишиннав, бунагьирттал аьпа баннав, рухI алжаннул ххари даннав, гьав нурданул дуцIиннав.
Ясупи, Зарема