Уттигъанну МахIачкъалалив бувкIун бия «Мосфильм» Киноконцерн ФГУП-рал режиссернал ассистент Полина Григоренко.
Зулайхат Тахакьаева
Ва ФГУП-рал гьанулий «Русская киностудия» ООО-лул ласлай бусса бур «Один за всех» тIисса полнометражныйсса художественный фильм. Фильмрал сюжет бусса бур бусурманчу ва ягьуди оьрчIру куннащал кув кIул бувну, минная дустал бувсса ххачпарас душниясса. Фильмрал гьанумур мурад бур кулпатрал гьану ккаккан баву, личIи-личIисса миллатирттал ва диннал инсантурал дянив куннал кунначIансса хIурмат ва ссавур тарбия даву, аьрасатлувтураву миллатирттал дянивсса дусшиву цIудуккан даву.
Полина Григоренкол аьрххилул мурад бия ва фильмраву бусурман оьрчIал роль дугьансса 25 – 35 шинал оьрмулувусса актер увчIинсса.
— Жул режиссер Н. Петровал пикри хъинчулий ккавккун, мунин тIайлабацIу чIа увкунни шаннагу конфессиялул (бусурман, ххачпарас ва ягьуди) диндалул къуллугъчитурал, — увкунни Полина Григоренкол.
ДР-лул культуралул министр Зарема Буттаевал тапшур бувну, Яруссаннал театрдануву хьунни дагъусттаннал театрдал актертуращал ва ДР-лул жагьилтурал иширттал министр Заур Кьурбановлул гьан увсса 10 жагьилнащалсса кастинг.
Кастинграй гьуртту хьуну бур Лакрал театрданувасса актерталгу. Москавлив режиссернал ассистент ларсъсса материаллая гихунмайгу зун тIий бур Жяъпардул роль дугьансса жагьил ххал уллалавриха.
