Къучагъшиврий жанну дуллусса аьралитал

Жува уттинингу цимилгу чичарду ЦIуссалакрал райондалийн ярагъуннищалсса къачагътурал кьюкьри ххярхсса чIумал, Ватан дуручлай, къучагъшиврий жанну дуллусса милицанал зузалтрая. Жулла аьрщарал цIаний талай бивкIсса, жанну дуллусса Аьрасатнал саллатIтурая ва хIаписартурая. ЦIуссалакрал райондалул Аьхъардал школалул краеведениялул группалул кIул бувмур чичлай буру. Мукун телевышкалий жанну харж дурну дур Краснодардал крайраясса ВВ15 «Вятич» в/ч 6761 Армавирский спецназравасса 19 оьрчIал.

• Антон Тихонов ххюва гьантлий ччаннайн щаву дирну, ливтIуминнавух кьаивтун ивкIун ур.
Антон ниттил ца акъа-акъа­сса арс ивкIун ур. Увну ур Антон Тюменнал областьрайсса Ханты-Мансийск тIисса шагьрулий. Антон ниттил ласгу чIарав акъа цилалу хъуна увну ур. Арс аьралуннаву къуллугъ бан гьан къаитан ниттил бюхъаймур бувну бур. Арснан нигьачIаву дусса ниттил дакIнил буслай бухьун­ссия. Антон цува хъинну гъирарай ивкIун ур аьралуннаву къуллугъ буван гьан, хIарачат бувну бур спецназравун агьанмур буллай. 1998 шинал июньдалул 5-нний увцуну ур «Армавирский спецназ» 15-й ОСН в/ч 6761. 1999 шинал сентябрьданул 15-нний телевышкалучIа дяъвилул махъра-махъсса кьини цала хъирив бувкIсса оьрчIал жан дуллуссар. Сентябрь зурул 10-нний Антоннул ччаннайн щаву дирну, ххюва гьантлий ивкIуминнавух кьаивтун ивкIун ур.
Архивравусса ванал №141001001999Д «Гибель «Вятича» уголовный делолува: Антоннул щаву чурххан нигьачIаву дусса дакъаннагу, ххюва гьантлий кумаграх ялугьлай, чан-чанну тIий чурххая хIал ласлай ивкIун ур. Антоннул ялун бивсса оьрчIал бусаврийн бувну, цува миннан лякъаврия рязийшиврул пишгу увкуну, каруннаву ивкIуну ур. Антоннул ниттищал дахIаву дурсса Аьхъардал школалул краеведтурал ча­гъардава:
— Ттуща нара ва дард-хIасрат цукун духIлай буссарив бусан къахьунссар. Тания шихунмай нигьа бусай хьунна телефондалул звонокрая, цукунчIав дяъвилул кинорду ххал дуван къахъанай, комуфляж формалувусса оьрчIру ккавккукун, арс дакIнин агьлай дуниял кьаритансса бакъа цамур пикрилул рахIат къабара. Арснал нава кьабивтун махъ, нагу ва дуниялгу, оьрмугу кьабивтун ттувунма нава бувхра. ХIатталлийн арсначIан лавгун буччиннинсса аьтIаву дуркун шанавух лагара. Мукун мудан хIатталлив занай, ца ппурттуву ттулла ка дургьуну хъюлчу-кIутIу бувра. Ттуйнма нава бучIайхту, лагма бурувгун цучIав чIалай акъар. Ттун бувчIуна му ивкIшиву ттула арс Антон, мунангу ттул бивкIу къаччишиву. На хъиннува къума лавгун, арснайн оьвтIун бивкIра. Му хьхьуну ттун арс макIра хьунни госпитальданий аьсавр­ттай занай, «На ххуйну ура, ттул пикри мабара нину» тIий. Ва макI ккаркния шихунмай на арс рязи уван, чансса бунугу паракьат хьуну, ттулва нава каруннавун лавсра.
Ттущал ттул дакIниву куртIсса оьттун руцлайннасса щаву оьр­мулухун дикIантIиссар.

• Станислав Николаевич Власовлул жан дуллуссар 1999 шинал сентябрьданул 10-нний телевышкалучIа.
Станиславлун диркIун дур 19 шин. Увну ур Станислав Иорш-кала шагьрулий. Цувагу хъуна увну ур буттал. Ца акъа-акъасса арс ивкIушивриясса хавар ванал буттан бавну бур ца нюжмардува. Сайки нюжмар хьуну дур арс морграва уцинсса хIадуршинна щаллу дуллай. Цалла аьрщарай арснал жаназа дуччин ларсун нанисса Станиславлул буттал чIарав бацIансса пикривагу хьуну бакъар аьралийтуран.
Станислав Власовлул дурсса чувшиврун кьимат бишлай военкоматрал дуллуну дур «Орден мужества» ва 1600 къуруш.
Станислав буттал цалалу хъунагу увну, угу цалалу увччуну ур. Цалла дард-хажалатращалгу ливчIун ур цувалу.
Цалла республикалийсса «Право матери» фондрал тIалав бувсса компенсациягу Станиславлул буттал Чачаннал дяъвилия мушакъат хьуну бувкIсса арснал чIунархIал оьрчIан инвалидтурал коляскарду ласун дуллуну дур.

•Александр Слесаренко — Рязаннал областьраясса. Аьра­луннаву къуллугъ буллан увцуну ур 1999 шинал июльданул 16-нний. Арс ивкIуну махъ 45 шинавусса ванал нину кIул дакъасса азарданул къашавай хьуну дур. Арснал аьралуннаву къуллугъ буллалийни дурсса якьамасса чичрурдащалсса дневникгу ниттин ккаккан къабивтун бур. «Утти на дунияллий яхъанай дунурагу, диркIуссаннун ккалли­ссара, ттул кьатIувппайсса ххуллугу так арсначIан хIатталливссар ливчIсса», — тIий дур Слесаренкол нину, щивухчIав хIала къадухлай, зумакъадахълай.

•Олег Проценко увну ур 1979 шинал январьданул 20-нний Краснодардал крайрай. Лабинский сельхозтехникум къуртал бувну махъ къуллугъ буллай ивкIун ур ОСН 15 ВВ «Вятич» 6761 военный частьраву. Олег Проценко телевышкалучIасса талатавриву боевиктурал лагма рургьуну, ччаннайн ккуллалул щаву дирну дунура, виричуну талай ивкIун ур. Цува боевиктураща ххассал хьун къабюхъайшиву бувчIукун, махъра-махъсса граната пIякь учин дурну, лагма рургьусса боевиктуравух ивкIуну ур.

•Ковалев Александр хIала­сса саллатI боевиктурал дурсса луркIанналухьхьун биривну бур. АрхIала циняв саллатI боевиктурахьхьун бириян къабитан, цувагу щаву дирну, оьлицIал хъанай унува, боеприпасру къуртал хьунцIа, сайки ца ссятрай боевиктуращал талай ивкIун ур. Боеприпасру къуртал хьуну, боевиктурал канихьхьун къагьаншиврул махъра-махънин риртсса граната пIякь учин дурну ивкIуссар.

• Сергей Богдаченко 1999 шинал сентябрьданул 9-нний кIюрххил ссят 6-нний телевышкалучIасса талатавриву кIусса щаву дирну дунура талай ивкIссар.
Жандалия ка ларсун талай бивкIсса Сергей Богдаченкон, Александр Ковалевлун, Олег Проценкон Аьрасатнал Президентнал хIукмулийн бувну Аьрасатнал Виричунал цIа дуллуссар ливтIуну махъ.
Имара Саидова
2009 ш.