«Илчи» кказитрал 24-мур номерданий жу рирщуссия А. Невскийл орден ларсъсса лакрал хIаписартурал сияхI. Му сияхIраву дия 8 лаккучунал цIа. Вай гьантрай цала буттая бусан жучIан редакциялийн увкIунни му орден лайкь дурсса Муслимов Зиявуттин Шапиюллаевичлул (кказитрай Шафшаевич тIий чивчуну буссар – А. А.) арс Каламадин Муслимов.
А. Невскийл орден лайкь дурсса Зиявуттин Муслимов ТIулизуннал шяравасса ур. Дяъвилийн увцуну ивкIун ур МахIачкъала шагьрулул военкоматрал. Дяъвилийн уциннин Буйнакскалий рабфакраву ккалай ивкIун ур. 1939 шинал увцуну ур аьралуннавун. Муния тинай 1946 шинайн ияннин талай ивкIун ур. Хъунама лейтенант Зиявуттин Муслимов цимилагу гьуртту хьуну ур душманнащалсса къизгъинсса талатавурттавух. Шамилла щавурду дирну ивкIун ур.
1941 шинал январь зуруй Новосокольники тIисса кIанттурдай хьусса талатавриву батареялул командир Муслимов Зиявуттиннул ккаккан дурну дур къучагъшиву ва аьралуннай каялувшиву дан кIулшиву.
Ванал аьралитурал чIявусса душмангу ххит бувну, жулла танкарду къагьан дацIан дурсса дайгьузанну ппив дурну дур. Мунийн бувну, жулва бахьттагьалтраща анаварсса бущилий хьхьичIунмай бачин бювхъуну бур. Ва талатавриву Зиявуттиннуйн захIматсса щаву дирну дур. Шикку ккаккан дурсса къучагъшиврухлу Зиявуттиннун ЯтIул ЦIукул орден дуллуну дур.
А. Невскийл орден тIурча къучагъсса лаккучунал лайкь дурну дур 1944 шинал. Душманнайн гьужум бувну, ванал цалва аьралитуращал бат бувну бур душманнал 3 пулемет, 2 кьайлул бувцIусса машина, 30-ннийн бивсса немецнал саллатI. Тири-хъири бувну бур 1 минометный батарея. Му чIумал дулун ккаккан дурну дур ванан А. Невскийл орден.
— Лу буссар «Ночь перед парадом» тIисса (белоруснал издание) Савицкийл чивчусса. Му дяъвилий буттащал ивкIун ур. Дяъви къуртал хьуну махъ Гомель шагьрулий ялапар хъанай икIайссия.
Мунал бутта чув уссарив кIул бувну, ганан гьан бувну бия му лу. Луттираву жул буттаягу чивчуну бур. Гьарица талатавриву ххув хьутари, му исвагьину тIащилий къавтIey изайва. Хъярч-махсартту ххирасса ия тIий чичлай ур автор жул буттая, — тIий буслай ур Зиявуттиннул арс Каламадин.
Дяъвилия Зиявуттин зана хьуну ур капитаннал чиндалуву. Бувккуну бур МВД-лул лавайсса курсру. Зий ивкIун ур личIи-личIисса идарарттай жаваблувсса къуллугъирттай, МВД-лул пожарный частьрал хъунаману, яла 4-мур колониялул хъунаману. 1961 шинал подполковникнал чиндалуву, пенсиялийн увккун, органнал давриягу увкьун, зун ивкIун ур железобетонный конструкциярдал заводрай отделданул хъунаману. Яла нерудный материаллал заводрал директорну ивкIун ур.
Яла Зиявуттин ивкIун ур «Дагсельстрой» тIисса строительный трестрал хъунаманал хъиривчуну. Мунияр махъ УПТК-лул (Управление производства технологических комплектаций) хъунаману. Зиявуттин аьпалул хьуну ур 1997 шинал оьрмулул 77 шинаву. Ванал бур 4 оьрчI – 2 арс, 2 душ.
