ДР-лул БакIчи Рамазан АьбдуллатIипов ва ДР-лул ХIукуматрал Председатель Аьбдуссамад ХIамидов гьуртту хьунни Ухссавнил Ккавкказуллал федерал округрал социал-экономикалул масъаларттан хасъсса ХIукуматрал комиссиялул заседаниялий.
Заседание дунни АьФ-лул ХIукуматрал Председатель Дмитрий Медведевлул Ухссавнил АьсатIиннаву. Тиккува ххалбивгьунни СКФО-рай паччахIлугърал промышленностьрал политика ишакаш дуллалаврил масъалагу.
Регионнал каялувчитурал хьхьичI махъ лахълай, Дмитрий Медведевлул бувсунни СКФО-рал промышленность лядуккан дуллай бушиву АьФ-лул ХIукуматрал цIакь дурсса 2025 шинайннинсса СКФО-рал социал-экономика хьхьичIуннай даврил стратегиялул хахливу.
«Стратегиялул приоритетсса масъаларттуну хъанахъиссар обрабатывающая промышленностьрал предприятиярттан модернизациялул чулухасса кумаг баву ва миннул даву лядуккан даву; обрабатывающая промышленностьрал цIусса ттизаманнул предприятияртту баву», — увкунни Д. Медведевлул.
Ганал, мукунма, бувсунни Дагъусттан Республикалий 4 промышленностьрал парк цIуну буллай бушиву.
Заседаниялий гьуртту хьунни ХIукуматрал Председательнал хъиривчу Александр Хлопонин, АьФ-лул Президентнал СКФО-райсса вакил Сергей Меликов, АьФ-лул Ухссавнил Ккавкказуллал иширттал министр Лев Кузнецов ва цаймигу министртал.
