КIирисса гъинтнил гьантрай республикалул агьалинансса тирхханну шай чIараввасса хьхьири. Хьхьирил щиная ва къундалия инсаннал цIуллу-сагъшиврун хъунмасса мюнпат бушиврия буслайнма бур хIакинталгу. Бигьагу лаган, цIуллушивугу цIакь дан, хьхьирия неъмат ласун букIлакIиминнал бувцIуну бур шагьрулул пляжругу.
Амма хьхьириясса нигьачIавугу хъуннасса дур. Чансса къашай инсантал, цалва пикри бакъашиврийн бувну, бала-апатIрахьхьун биривсса кьурчIисса ишру.
Мунийн бувну, гьарица шинах гьузун бучIайсса сезон дайдишайхту, июнь зуруя сентябрь зуруйн бияннин, ГИМС-рал (Государственная Инспекция по маломерным судам) ва Граждан обороналул учебно-методический центрданул (ГКОУ РД «УМЦ по ГО и ЧС») дувай ми ишру къашаву мурадрайсса профилактикалул мероприятияртту.
Андриана Аьбдуллаева
Вай гьантрайгу Граждан обороналул учебно-методический центрданул къатраву хьунни гьузун бучIайсса кIанттурдай инсантурал мюхчаншиву дузал даврил хIакъиравусса элмийсса конференция. Шикку гьуртту хьунни «Центр ГО и ЧС» ГУ-лул хъунаманал хъиривчу Р.Г. МахIаммадов, мура центрданул отделданул (отдел медицинской защиты) хъунама О. В. Рындин, МахIачкъалаллал ГО-лул ва ЧС-дал иширттал управлениялул хъунама А. О. Оьмаров, МахIачкъалаллал Ленинский райондалул ГО отделданул хъунама Г.Т. ХIусманов, Советский райондалул мура отделданул хъунама Б. А. Буташев, Кировский райондалул мура отделданул хъунама Ш. А. Мажидов, Граждан обороналул учебно-методический центрданул хъунама ХI. МахIаммадов, мунал заместительтал Н.Т. ХIажиев ва А. Г. Казыханов, центрданул преподавательтал.
Инсантал хьхьирийн бюкьлакьисса иширттая ва ми мюхчан бансса чаран лякъаврия бусласисса ихтилат бунни центрданул хъунама преподаватель Залимхан Давудовлул.
Статистикалул бусласимунийн бувну, 2013 шинал Дагъусттаннай щинавун оьвкьун ур 35 инсан (хьхьичIмур шинал — 36). Махъсса цаппара шиннардий бювкьсса инсантурал ккал укун даххана хьуну дур.
2008 ш. – 76
2009 ш. – 41
2010 ш. – 40
2011 ш. – 38
2012 ш. – 36
2013 ш. – 35
Нанисса шинал зарал бивсса 21 инсан ур, миннаву 5 мюрщисса оьрчI.
Ххассал увну ур 10 инсан, миннава 2 мюрщисса оьрчI. ИвкIуну ур 9 инсан, миннава 3 мюрщисса оьрчI.
Вай укунсса иширттал хIакъи-хIисав дуллалиний, чIалай бур вайннун багьана хъанахъишиву щинавун бучIлачIиминнал хасъсса тIалавшиннарду къадуруччаву, марч бусса, дарщу-дарккусса чIумал, ккаккан къабувсса кIанттурдай ягу хIарчIун гьузун бучIлачIаву, щинавун бувхсса оьрчIру хъуниминнал иттала буккан битаву.
ЧIявуми бюкьлай бур ГИМС-рал подразделенияртту ва ххассал бувулт бакъасса кIанттурдай. Махъсса цаппара шиннардий ххассал бувсса инсантурал ккал укунсса дур:
2008 ш. – 36
2009 ш – 38
2010 ш. – 45
2011 ш. – 46
2012 ш. – 41
2013 ш. – 9
Шиккува кIицI бан, 2013 шиналсса иширттаву мюрщи къаехъирдацIун бавхIусса цавагу иш бакъар.
Щинавун бювкьсса инсантурал ккал чан хьуну дур агьалинал дянив, республикалул школардай ва жяматийсса организациярдай профилактикалул давуртту дуллай буну тIий, мукунма ГИМС-рал инспектортал ялув бавцIуну бивкIун тIий.
2013 шинал Граждан обороналул центрданул ххассал бувултрал бувну бур бювкьсса инсантал ххассал баву мурадрай 43 операция. Ххассал увну ур 22 инсан.
Хьхьирий бала-апатIру къашаву мурадрай цIакь дурну дур мюрщи къаехъирттай гьузун ччиминнансса низам. ГИМС-рал сияхIрай (2013 шинал декабрь зурул 30-ннийнсса) бур 7545 мюрщи къаяхъ ва ми бацIан бансса 46 база. Бур агьали бигьалагансса 104 кIану.
СияхIрайн лавсъсса къаехъирттал ккал чан хьуну дур миннул хIакъиравусса закон дурккун махъ.
Му закондалийн бувну, паччахIлугърал сияхIрайн къаласлай бур 200 ва ххишаласса килорду дусса, двигательданул гуж (установкардугу хIисавну) 8 киловаттрая ливчусса къаехъру. Мукунма сияхIрайн ласлай бакъар метралияр ххишаласса лахъишиву дусса, двигательлу дакъасса ва бигьалагансса кIанттурду бакъасса парусращалсса спортрал къаехъру.
Ларгсса шинал гьузун бучIан ккаккан къабувсса кIанттурдай 16 инсан ивкIуну ур. Вай хьхьичIмур шинал вара чIумуву ливтIуминнаяр 18,8%-рал чансса бур. ЛивтIуминнавух бур 17 шинавун къабивсса 3 оьрчI. ХьхьичIмур шинал вара чIумувугу микссава бивкIун бур.
ХIасил, щинавун бучIлачIими мюхчан баву мурадрай, инсантал бигьалагайсса кIанттурдал заллухърунначIан ва каялувчитурачIан тIайла дурккун дур хьхьирийн бучIаврил сезон бала-апатI къавхьуна лагаву мурадрайсса тIалавшиннарду. Мува мурадрай, кIантту-кIанттурдайсса каялувшиннарал органнайн тапшур бунни муниципал сакиншиннарду дусса кIанттурдай ххассал бувултрал хасъсса, мобильный, подразделенияртту сакин дан, агьали щинавун бучIан нигьачIаву дакъасса кIанттурду дузал бансса чаран лякъин.
Дагъусттаннай 104 кIану бур щинал чIарав агьали бигьалагансса. Миннава 13 оьрчIру бигьалагансса ва цIуллушиву цIакь дансса лагерьду бур.
2014 шин дайдирхьуния шихунмай сияхIрайн лавсун бур 101 мюрщи къаехъру.
ДР-лул МЧС-рал агьаммур управлениялул ва муниципал сакиншиннардал каялувчитурал личIи бувну бур чIумуйсса ххассалбувултрал постру бацIан бансса кIанттурду. Щинавун бюкьансса нигьачIаву дусса кIанттурдай дирхьуну дур къадагъа дуллалисса 58 аншлаг. ОьрчIал лагерьдай бувккуну бур ми мюхчан баву мурадрайсса лекциярду.
Умуд бур вай давурттая агьалинан мюнпат хьунссар, гьузун бучIлачIимигу бала-апатIрая мурахас банссар тIисса.
