Зума ритаврил Эдрал кьини – хъинну ххирасса кьинири. ХIатта, Аллагьу Тааьланал Алжан му кьинири ляхъан бувсса. ТIуба тIисса Алжаннавусса яла хъунмур мурхь му кьинири бивщусса. Жабраил малаик вахIишиврин ихтияр увсса му кьинири.

Мунивусса фазиларду, хъиншивуртту чIяруссар. Му кьини хъинсса аьмал баву, Аллагь чIявуну кIицI лагаву хъинссар. Дуаьлухьхьун жаваб дулайсса, бунагьру шюшайсса, Аллагь цIимилийну ургайсса кьинири.
Му хьхьуну баргъ лавгун махъ, Эдрал чак булланнин, кIичIирттаву, мизитирттаву, къатраву, чу бухьурчагу, такбирду бишавугу суннатссар, баянну оьвкуну, Эдрал кьинилул аьламат загьир дуван. Му такбиргу бишайссар «Аллагьу акбар, Аллагьу акбар, Аллагьу акбар. Ля илягьа илляЛлагьу ваЛлагьу акбар. Аллагьу акбар ва лиЛлагьял хIамд» — куну.
Му хьхьу уттара давугу хъинссар, шанан къаивкIун, тIааьт-эбадат дуллай, Кьуръан буклай, зикри-ссалават ккалай. Щалла хьхьу мукун гьан дан къабюхъайманал, мунил хъунмур чIун эбадатрай гьан дувача. Мугу къабюхъайманал ца ссятгу дурну, хъатIан чак ва кIюрххил чак жамааьтрай бан хIарачат бувача.
КIюрххил Эдрал чаклин ачиннин чурх шювшуну, марцIшиву дурну, ххаллилсса янна лаххаву, нахIусса кьанкь даву суннатссар.
Эдрал кьини чак баннин мукьттуршва: «Ля илягьа илла Ллагьу вахIдагьу ля шарика лагьу, лагьул мулку, ва лагьул-хIамду юхIьи ва юмиту ва гьува аьла кулли шайин къадир» учирча, мукьттуршва бакI тархъан бивтссаксса чири буссар, ва цайми даражарттугу буссар.
Эдрал хьхьу дуркIукун, гьарца ливтIусса муъминтурал рухIру ссаврунная лухччинийн лирккун, цалла къатрал лагма щядиркIун, лагмара ккуранну дурну оьвтIун дикIайссар, инсантуран къабаярчагу: «Жугу, зу кунма дунияллий вай къат­рал, ми хъуслил заллухъруну бивкIссару, жугу дакIнийн багьияра, жухлуну цадакьагу бувара, жул гьаттайн зияратгу бувара, дуаь дувара, жунгу жува бувсса хъинсса аьмал бакъа къалявкъунни» — тIий диркIун кIюрххилнин, яла цалла кIанайн кIура даяйссар. Миннал гьаттайн зияратгу бувну, миннахлу цадакьагу барча, ххарину лагайссар, къабарча, пашманну лагайссар. Му кьини ливтIуминнал гьа­ттайн зияратгу бувну, миннаяту цадакьагу бувну, ххуйсса яннагу ларххун, ххуйсса хIалалсса дук­ра дурну кулпатрангу, махъминнангу аваданшивугу дурну, кунначIан кув зияратрайгу лавгун, хIалалшивугу ласаву хъинссар, ссуннатссар. Амма му кьини чIярусса дукра дуркуну, чIярусса хIан хIарчIун, оьккисса махсартту, хъярчру буллай, иблис рязий бувну, Заннан сси бизан баву къахъинссар. ХIатта, гьарца Эдрал кьини иблис-ляънатуллагьнал оьвкуну цилва аьрал бавтIун учайссар: «ХIакьину МухIаммад Идавсил (с.аь.с.) умматиннал байрандалул кьинири, зу хIарачат бара, ми дукралухун, хIачIиялухун, махсара-хъярчирахун машхул бувну, бунагьру бан бувну. Аллагьнан сси бизан бансса» — куну. Мукун бухьувкун, му кьини дукралухун, хIачIиялухун, аьсив­шивурттахун машгьул хьуну, иблис рязий бувну дургьусса зумагу зия къадурну. Аллагь* рязи хьунсса хъинсса аьмаллу чIявусса бан аьркинссар. Аллагьнал тавпикь булуннав!