Жулва билаятрай рынокрал арарду цIакь хьуннин Бархъаллал шяравасса Ширвани Мяммаев зий ивкIун ур П. Плешаковлул цIанийсса Избербашуллал радиозаводрай хъунама конструкторну.
Зийгу ивкIун ур цалла давугу кIулну, хъинну гъирарай, аьрали ва граждан авиациялуву ишла дувайсса радиолокаторду ва пеленгаторду дувайсса даврий. Ванан хъинну ххуйну дакIний дур цалла цалчинсса изделие дартIсса чIун. Му диркIун дур цалла даврил уртакьтуращал ЦIусса шинал байран хьунадакьин хъунма хIал къаливчIсса чIун.

Ширванинал къуртал бувну бур Новочеркасскаллал политехнический институт. КIира шин дурну дур зенитно-ракетный полкраву аьрали бурж лахълай. Ванаву цукунссарив тIабиаьтралла дуллусса кIункIутIаву диркIун дур радиотехникалучIан, ми дакьин дуллан, датIлан. Муниву чIалай бивкIун бур Ширванинан цалва оьрмулул ва захIматрал ххуллугу. Хъинну пиша ххирасса, муниву цалла дакI дирхьусса Ширванинал ва ванащал зузиминнал бакIраву такIуйвагу хIасул къашайсса бивкIун бур заводгу лавкьуну, цивппа мунил кьатIув пишабакъулт кунма личIансса пик­ри. Базаллул арардайн хIукумат дуркIукун, мукун хьугу-хьуну бур. Заводрал итадакьлай бивкIсса хъус тIалав къадуллан бивкIукун, производствагу дарцIуну, азарахъул пишакартал ва зузалт давурттацIа хьуну бур.
Цал архIал пиша бакъа ливчIсса Ширванигу цIубакIрай ссаха зун­ссарив къакIулну ливчIун ур. Циняв кунма дахху-ласулухун агьан ванан ччан бивкIун бакъар. Ширванинащагу бюхъанссия цала ппу Гьимматлуща куна Избербашуллал цания ца школалий математикалул дарс дихьлан. Бархъарату Избербашлив ивзсса ванал ппу хьхьувайсса школалул директорну зий ивкIун ур.
Ширванинаву гьич цукунчIав цалва пишарайн хаиншиву къадурну, муниха зунсса гъира лешлай бивкIун бакъар. Цува кунма дахху-ласулувун кIункIу къатIисса цаймигу шама цачIун хьуну, тIивтIуну бур, радиозаводрал общежитиегу арендалий лавсун, «Импульс» тIисса кооператив. Шикку вай дуллай байбивхьуну бур радиотехникумрансса стендру, дакьин дуллан бивкIун бур радиотехника ва школардай лингафонный кабинетру дузал буллалисса ва радиоузеллал монтажрал давуртту дуллай сукку хьуну бур. Заводрай зий уна ДагЗЭТО-лул дуллалисса продукциялущал кIулсса ва республикалул кьатIувсса промышленный предприятиярдай электротермиялул пачру бихьлахьисса монтажрал давурттивгу дан лагайсса ивкIун ур.
Телевидениелул вещание дециметриялул диапазондалий дуркIсса ппурттуву Ширвани цал­ва уртакьтуращал айивхьуну ур ганиннин заводирттай дуллайвагу къабайбивхьусса дециметриялул антеннарду дуллай. Цалва шагьрулий дакъасса ми чIаххуврайсса районнайгу даххан диян дайсса диркIун дур.
Укун хIарачат буллай, дуллалимур дакIнийхтуну, шавкьирай дуллалисса Ширвани сававну, кооперативгу тIутIайх бичлай, ххуйсса маэшат хъанан бивкIун бур. Амма муниярдагу къулайсса давурттайн лавгсса Ширванинал кIия соучредительтал лавгун махъ, кооперативрал даву пахъ дагьлан диркIун дур. Радиозаводрал каялувчиталгу къарязий хьуну бур кооперативращал цIакь дурсса арендалул кьутIилул чIун гихуннайгу лахъи дан.
Ширванинан пикри хьуну бур нитти-буттал къатрал хIаятраву, шагьрулул № 8-сса школалучIату арх бакъа, телевизионный антеннарду дуллансса хъунбакъасса мастерская тIитIин. Ми дуллай айишин хьхьичI Къаяккантуллал, Дахадаевуллал, Ахъушиял, Сергокъалаллал районнайх увккун, микку телевизионный каналлу цукун дугьлай дурив ххал бувну, Ширванинал 30-ксса модификация антеннардал дурну дур. Ми датIлатIисса давурттавух мунал цалва арсругу щурущи бувну бур, ялагу цаппара жагьилтуран зунсса кIанттурду хьуну бур.
Антеннарду диркIун дур хъинну ххуйсса ва даххангу захIмат къашай­сса бивкIун бур. ЗахIматшивуртту дайдирхьуну дур базаллаву чил хIукуматирттаясса спутникрал антеннарду дахлан байбивхьукун. Базаллул хIал бувчIусса Ширванинан пикри хьуну бур цала кооперативрал чIарав телевизион хъус дахлансса ттучан тIитIин. Телевизор ххал бан антеннарду ва цаймигу оборудование ларсъсса, ласун ччисса гьарма ваначIан кумаграл хъирив гъан шайсса бивкIун бур. Даврил чIун дунугу дакъанугу, телефондалувух оьвкунахьгу аьркинмур бувсун, цащава шайсса кумаг байсса бивкIун бур.
Ва аралуву зий Ширванинал 26 шин хьуну дур. Ванан хъинну ххуйну лархьхьуну дур ишбажаранчинал даву, цаллагу хIукуматрая налогру кьюлтI дуллалисса, «теневая экономика» тIисса затрал чIарах увккун акъар. Ванал бусаврийну, шиная шинайн ишбажаранчишиву дуллангу бигьа хьуну бур, чан хьуну бур хьхьичIва вайннал даву ххал дан букIлай бивкIсса хIат-хIисав дакъа­сса ялув бавцIусса къуллугъирттал вакилтал. Чан хьуну бур вайнная тIалав буллалисса чагъардугу ва индивидуалсса ишбажаранчишиву сияхIрайн ласайсса куцгу.
Укун тIайлану зузисса, хIуку­матрая цикIуй кьюлтI къабуллали­сса ишбажаранчитурал яхI гъагъай «ххютулусса машлуха» зузисса цува кунасса цама ишбажаранчи налог­ругу къаласлай ивтун ххал хьувкун. ХIукуматрал буржри ми ялун личин бувангу. Масалдаран, ларгсса шинал хасъсса постановление кьамул бувну бур ишбажаранчитурал Пенсионный фондран дулайсса отчисленияртту лахъ дан. Ширвани ва укунсса цайми-цаймигу ишбажаранчитурал мурадгу бур ласларча укунсса арцурду цаяту, низамрай, цинявнная цакуцну тIалав дуллан. Ялар республикалий ишбажаранчишиврул гьанугу, вайннал чулуха хIукуматрайнсса вихшалагу цIакь хьунтIисса.
ТIайлабацIу баннав инава буллалисса захIматраву вин, Ширваний!
Аь. МахIаммадов,
ш. Избербаш