Ва нюжмардий «Дагестан» РИА-лул пресс-центрданий хьунни, «Открытая власть» проектрал хахливусса, ДР-лул кIулшивуртту дулаврил ва элмулул министр Шахабас Шагьовлущалсса пресс-конференция.
Шикку министрнал гьарта-гьарзану бувсунни гьашину республикардал школардай аьмну ЕГЭ дулаврия ва чIал къавхьуну дайдишинтIисса цIусса дуккаврил шинал дувансса давурттая.
«Гьашину яла лахъмур балл бур оьрус мазрал 40,37, хъирив биологиялул – дянивну 38,31, обществознаниялул – 38, 13.
Яла лагьми баллу бия информатикалул ва тарихрал дарсирдал.
Ларгмур шинал, тIурча, яла лахъсса балл бивкIун бур биологиялул ва химиялул дарсирдал. Масалдаран, дукIу химиялул ЕГЭ-рал балл бивкIун бур дянивну 72, гьашину тIурча бия 32. Биологиялул бивкIхьурча 68, 5, гьашину бур 38,4. ХIасиллах бурувгун, ми кIилийну лагь хьуну бур», — бувсунни Ш. Шагьовлул.
Дянивсса балл лавсун Аьрасатнал регионнай дагъусттаннал выпусниктурал бусса бур яла лагьми баллу. Министрнал бусаврийн бувну, ваний махIаттал хъанан аьркиншиву дакъасса дур, цанчирча укунсса хIасиллу дикIаншиву жунма кIулye бивкIун тIий бакIрайва.
«Оьрус мазрал 20-ннийн бивсса баллу лавсун бур 1819 выпускникнал, математикалул 20 баллданийн къадирсса хIасиллу ккаккан дурну дур 5 азаллий 329 дуклаки оьрчIал. Гьашину аттестатру къабуллуну личIантIиссар 1580 дуклаки оьрчI», — бувсунни ванал.
Шахабас Шагьовлул кIицI лавгунни гьашину республикалий ЕГЭ дулаврил масъалалух хъуннасса къулагъас диркIшиврий хIукуматралгу, обществалулгу чулуха.
«ЕГЭ-рал чIун дучIаннин жу чIявусса школардайн бивну, нитти-буттащал, оьрчIащал ихтилатру бувссия. БувчIин буллай буссияв оьрчIал цалла дулун битира экзаменну, махIалабухларди тIий. Республикалул БакIчиналгу кьянкьасса тIалавшинна душиву буслай буссияв. ХIакьину щинкIуй щак къабагьантIиссар жула оьрчIал цала кIулшивурттайхчIин школарду къуртал бувшиврийy. ХIакьину жунма чIалай бур жулва вузирдал, сузирдал выпускниктал. ЧIалай бур цукунсса кIулшивурттащал ми букIлай буссарив школардайн, азарханардайн ва цайми идарарттайн зун. Лахъсса кIулшивуртту дусса ххуйсса пишакартал биял хъанай бакъар хIакьину республикалул сайки циняр арардаву. Ва тагьар цахъирагу къулай дуваншиврул, жунма цIунилгу зана хьун багьлай бур махъунмай школардайн, микку сукку хьун багьлай бур низам дуллай. ХьхьичIва-хьхьичI ва даву дайдишин дур жула оьрчIахь кIулшивуртту дакъа оьрмулул ххуллийн буккан къахьунтIишиврия буслай. Уттинин ссаятур миннал байбихьулул ххуллу тIитIлай бивкIсса? Нитти-буттал тIалав бувсса щялмахърая, гьарзат машан ласун бюхъайссар тIисса хIуччалия? Умуд бур гьашинуния гихунмай нитти-буттал цала хIарачатру цала оьрчIан мяйжаннугу кIулшивуртту дулун буллантIишиврийн. ЕГЭ машан ласун датIлансса арцу цалва оьрчIан репетитортал бугьан ягу цайми мюнпатсса давурттан харж дувантIишиврийн. Вания гихуннай ва тагьар укун дитан къабучIину тIийри республикалул каялувшинна хъирив дурксса», — бувсунни Шахабас КьурамахIаммадовичлул.
Министрнал, мукунма, бувсунни гьашину ЕГЭ дуллай бивкIсса шартIирдая ва ЕГЭ цила багьайкун дачин дувансса харж-хуржгу федерал бюджетравасса бивкIшиву.
Ванал чIурчIав дунни цIусса шин дайдишаврищал байбишинтIишиву кIулшивуртту дулаврил идарарттал зузалтрал квалификация лахъ дуллай, ми курсирдайн бучIан буллай. Мукунма ванал кIицI лавгунни республикалул бюджетрава кIулшивуртту дулаврил аралун 32 млрд арцул итадаркьушиву, миннува 4 млрд. арцул министерствалун ккаккан бувну бушиву, ливчIми тIурча школарду цIубуккан бан, модернизировать бан муниципалитетирттайх дачIинтIишиву. Мукунма Шахабас Шагьовлул бувсунни, цIана министерствалул вакилтал профтехучилищарду цукун зий бурив ххал буллай ва учительтурал аттестация дуван хIадур хъанай бушиву ва цувагу чIявусса школардайн иллай ушиву.
Учительтурал аттестация дурну махъ яла лагьми хIасиллу ккаккан дурми учительтал давурттая букьан бантIиссарив, тIисса суалданун министрнал бувсунни, цукIуй даврия укьан къаантIишиву, амма миннал кIулшивурттал даража лахъ буллансса цайми давурттив дуллантIишиву. Бувсунни уттинин жулла республикалий дуллай бивкIсса учительтурал аттестация вания гихуннай цамур журалийсса дикIантIишиву. Уттинин учительтал аьркинсса кIанайн чагъарду тIайла бувккун щаллу хъанай бивкIхьурча, утти ми цивппа гьуртту къавхьуну аттестация дулун къабюхъан тIий бусса бур. Учительтурансса аттестация дикIан тIий дуссар дур ЕГЭ-дал журалийсса, так ца учительтуран куну сакин дурсса.
Министрнал мукунма бувсунни Республикалул БакIчинал тIалав бувну бушиву министерствалия, билаятрал цайми регионная жучIанма оьрус мазрал дарсру дихьлансса учительтал бучIан бан.
Шахабас Шагьовлул ялагу кIицI лавгунни, тIайлану, низамрай зун гъирарайсса школардащал ва учительтуращал цивппагу зун хIадурну бушиву. Учительтурал харжругу пишакар хIисаврай миннал квалификациялух, миннал кIулшивурттал даражалух бурувгун буллантIишиву.
