Владимир Высоцкий

Ттулмур бущи чиха бакъар лавхьхьусса –
Чарттайх, щинайх,
хьхьемайх бигьлай нанисса…
ЦIа дувай, бур учай на юргъа бусса,
Буну тIий ттул бущи экьинанисса.

 

Так мудан бурттигьу уссар ттул бянив.
Бишлай уссар чуллайх нихъри цIалхъанну.
Ттуннив ччива лечлай илхъилул дянив,
Я кIили, я хьхьури дакъа, тархъанну.

Дурккун дакъассаксса хьуйлува ххаржан,
Ганил щийнчIав зарал биянгу къабай.
Вана мютIи дурну хьхьурттарайн ттул жан,
Вана кьацI бурхIулттал кIиххябуккавай.

Ттул бурхIай щавурду шайссар ччя-ччяни.
Зурзу тIийгу дуссар ттул иттархъенну…
Ттуннив ччива лечлай илхъилул дянив,
Я кIили, я хьхьури дакъа, тархъанну.

ХIакьину на ччалли буккантIиссара.
Ххув хьунтIиминнувух
цIа хьхьичIну дуссар.
Багьлулгу бюхттулссар бяст-ччаллил ара.
Ттухлугу хирхи тIий бурттигьу уссар.

Вана тти бищавай мархь ттул хъурттарайх.
Тайнна вев-гьарай тIий гьалаксса агьлу…
Ттуннив ччива занай щюлли бизанттайх,
ЩийнчIав къамютIисса кьинирдал шагьну.

Хъит тIий, кIибуцавай, бавчуссар дучри,
Гъирарал ва сситтул вибуцIин бувсса.
Личлачигу бувну чIаннала чIучIри,
Бавчуссар, бакьиннин хьамарал бурса.

ЦIакьсса цIа дусса ур ттуйсса бурттигьу,
Бусала хьуну бур мунал гьунардал.
Ттуннив занай ччива, ттуйнма мютIину,
Дазу-зума дуллай илкинсса ардал.

Юх, левкьун насийча мусил зунттурду,
АьщучIан бучIанна хъиривппа-хъирив.
На вин зана банна мурхьхьал чуттурду,
Хъап тIий личIан анна аршилул хъирив.

Бивщунни гюнгутIи, парх кунни гьавас,
Пахрулий гьаз хьунни ттул кIиллувума…
Агь, ттуннив ца ччива илкинсса гьава,
БивчIангу, буккангу, илхъилий буна.

Вагь, цири ттун хьумур, щилли ттул балжин
Ттуща зехлахисса? Къахъанай бурхха
Ххувшаврил аьщучIан къабучIан цалчин.
Къабитлай бурахха ххув къахьун чурххал.

Тти цири на байсса? Щях ищун анна
КIиллуву ххаралий лахъну гьаз хьума.
КIутIу тIий кьамагу, чIун ххинил данна,
ИлхъилуцIух нава нанисса кунма.

Вана, бувкIра цалчин. Ивщума тIурча,
Хъап-щап тIий, най уссар ххуллийх,
ххиттувух…
Багъишлагу бара, ххувшаврил мурчал
Бивщуну тIий гьавас цал ттигу ттувух.

Оьрус мазрая таржума бувссар
Руслан Башаевлул

Хьхьириву инсан
Анатолий Гарагулан

Буран бия хьхьирий. Муххал хьхьуттардил
ликлай бия бурчу каруннаяту
Хъармуххах архъангу щяйтIаннул чIуний,
чIурду буллай дия хьхьирил
гъаглуву
Иблисрал балайлий щютIа тIисса марч.
Му хIалатраву
Цакуну баяй чIу: «Хьхьириву инсан!»

Гассят бавнни амру: Махъунмай бачин! БацIан бан жами!
Чялиш буккияра га ххассал уван!
Ва гъили уван!
Чув ухьурча, — чара бакъа ца буцIин,
Акъахьурча – чярхний ссуку бан хIанттий!

ХIайп, нама так лухччайх занай ушиву,
ЩилчIав ттун кумаггу къабантIишиву.
Къаххяхханссар цучIав на ххассал уван,
Ттулшиврий леххаву къарутантIиссар.

УчинтIиссар: Ссур ба жами хьхьичIунмай!
Марчгу ттиликIрахун хъапри бишланссар!
УчинтIиссар: хъинсса къелли чиплагънан,
Ххассал хьувча цува, итира цува!

Ттул жамигу чIарах бувккун гьантIиссар, —
Бюхъай муний бикIан кьини дюрхъуми.
ХьхьичIун уругайма ургай так хьхьичIун,
Мунан ци бур хьхьирий цу ухьурчагу!

ЧIалай бур ттун: чIарах най бур жамирду,
Ялугьлай бухьунссар зуманицIсса порт.
Ци-цикссагу личIай инсантал кьатIув,
Агьаммур ххуллия ша личин увну!

ЩатIал кIункIу ача нагу хьхьиривун –
Гужсса мурчал буран гьанай бикIувча!
На кьирийн личин ан, гьаз ан, ттул хъирив
Капитаннал шлюпка гьан бувантIиссар.

Янналухун цичIар дахчингу дурну,
Гьаз анссара. Щукру – янна ттуй дусса!
ШлюпкалуцIун цIакьну лачIунтIиссара
Нагу, авай цIакьну лачIунтIиссара.

Гьаз унна на бортрайн. Ххуллу бувгьуну,
Жамигу найнма бур цуппа нанинийн.
ДакI дарцIуну ура, къахьунмур хьурча –
Ххассал уванссара на матростурал.

Гьай-гьай, бигьа бакъар жамичитуран,
Мурчал ми ссихI бигьин битлайгу бакъар!
Так инсан жамилул кьатIув личIарча, —
Гьич оькьан къаитай миннал хьхьиривун!

Таржума ПатIимат Рамазановал