Ва нюжмардий «Черновик» кказитрал редакциялий хьунни вайннал сакин бувсса Дагъусттаннал лишаннан (символика) хас бувсса «ккуркки стол». Микку гьуртту хьунни: кказитрал хъунама редактор Маирбек Агъаев; Дагъусттаннал Композитортурал союзрал хъунама Рамазан Фаталиев; Оьруснал театрданул хъунама режиссер
Скандарбек Тулпаров; Дагъусттаннал политехнический университетрал преподаватель Жанна Абуева; Аьрасатнал лайкь хьусса артистка Фаина Графченко; Дагъусттаннал Халкьуннал артистка Лариса ХIажиева; композитор МахIаммад ХIусайнов; Дагъусттаннал паччахIлугърал филармониялул каялувчи Ирина Нахтигаль ва хъунмур дирижер Зарифа Аьбдуллаева; Жяматийсса деятель Сулайман Уладиев; Дагъусттаннал Художниктурал союзрал выставочный залданул директор Амирхан Амирханов; «Единство» ДРООНС-лул хъунама Альберт Эседов; «Мавраев» луттирду итабакьайсса идаралул хъунама Сяид Ниналавов; «Черновик» кказитрал журналист МахIаммад ХанмахIаммадов; искусствовед Мариян Чалабова; «Море – ТВ» ООО – лул директор Мурад Аьбдуулмуъминов ва цаймигу журналистал.

Зулайхат Тахакьаева
Бачин бувну ия «ккуркки стол» «Черновик» кказитрал хъунама редакторнал хъиривчу Эдуард Уразаев.
Ванал кIицI лавгуна ларгсса шинал декабрь зурул 23-нний бувкшиву паччахIлугърал лишаннал агьамшиву гьарта-гьарза даврийн багьайсса Аьрасатнал Президентнал хIукму – школарттай ва цаймигу паччахIлугърал идарарттай хъанахъисса агьамсса шадлугъру дайдишаван гимн учаврия ва ттугъ гьаз баврия.
— Бугьлагьиссарив хIакьинусса жулла республикалул оьрмулуву паччахIлугърал лишаннал бугьан аьркинсса кIану? Республикалул бакIчи Рамазан АьбдуллатIиповлул паччахIлугърал гимн даххана дансса пикрилул ялув зу ци учару? – вай суаллу бия «ккуркки столданул» тема.
ХьхьичI ккаккан дуруна Бразилиянаву футболданул матчрай тайннал команда ххув хьуну махъ тIутIисса паччахIлугърал гимн. Футболисталгу, болельщикталгу гимн тIий бия ххаришиврул чавжравун лавгун, каругу кIутIу-кIутIу дуллай, тIанкI-шанкIлий.
Стадиондалийцириннан кIул­шиву дакъасса, цурда гимнрал ттуйн цукунчIавсса асар биян къабувуна. Цанчирча жулва билаятрал цимирагу ник хъунна хьуну дия кьабакIрава байбивхьуну, чIанччаннавун бияннин чурххал гьарца базулувун духлахисса, иттав макь дучIан дуллалисса СССР – данул яла Аьрасатнал гимнрай. Му гимнрахун шанурдая бизлай. Иттату макьгу му пашман­сса дуну тIий къадачайхьунссияча, совет агьалинал кIулшилувугу, дакIурдивугу цIакь дан бювхъу­сса патриотизм оьтту-ттурчIаву, къюкIливу дуну тIий дачайхьунссия. Мукунна дурчIин къашайсса макь дачайва «Вставай страна огромная, вставай на смертный бой!» тIисса ва цаймигу дяъвилул шиннардий чивчусса балайрду школалий жува тIутIисса чIумалгу, таний ми балайрдал мяъна-мурад щаллуну дурчIлай къадиркIхьурчагу. Душман ччянива ххит увну, дунияллий тачIав дяъви къахьунтIиссар тIий кьянкьасса вихшала дишин бувну бивкIсса заманнай. Му музыкалул бияла бухьунссар. Дагъусттанналмур гимнгу ттун танихара лащай, музыкалул чулуха бакъача, жанралул чулуха. Жува та бюхттулсса билаятрал ца бутIа хъанай бухьувкун, кьадаргу ца бухьувкун, гимнрал автор цувагу та гимнрай хъуна хьуну ухьувкун, жулламур гимн цамур жанралий чичингу къахьунссия. Музыкалул чулухарив ттунна жулламур гимн авадан дизай, дакIнин ва оьтту-ттурчIан гъансса дуну тIийрив къакIулли. Ттул аькьлу-кIулшилулгу кьукьлай бур гимн дикIан аьркин­сса кунма вичIидирхьума микIлачIун уллалисса. Билаятрал лавгмур цукунсса бурив, муниха лархьхьусса. Асар къабивну иттату макьгу къадуккайссар, чурххал базугу зурзу къачайссар. Мукунсса асарданущал (иттату макь най) бия тIар ХIаписат ХIамзатовагу гимн кьамул дуллалисса комиссиялул ххалбигьаврий Ширвани Чаллаевлухь ганал бюх­ттулсса гьунарданухлу барчаллагь тIий.
Ва ялагу, Бразилиянал «Ламбада» тIисса балай лап сийлувун багьну, гьарца хъатIай тIутIисса чIумалгу, ттуйн цукунчIавсса асар къабияйва. Жунна ятмур ттун тачIаврарагу нахIу къаларчIссар. ХIакьину жува личIи-личIисса культурардал ялун бигьавриву, гьайта-гьуралул музыкалул ясир бувну бушаврил гимнгу мукуннасса дикIан багьлай бакъахьунссар. Гимн ттуршукурдай ишла дулланнур чичайсса. ХIакьинусса никиран тIалавмур гьунттийсса никиран къакьамулну лякъинтIиссар. Жулла оьттучIан гъанмурдив ттуршукурдая ттуршукурдайн дияннин чанссаннан духьурчагу нахIунугу, тIааьннугу, тIалавнугу, кьамулнугу личIантIиссар.
Сулайман Уладиевлул кIицI лавгуна кьатIаллил билаятир­ттайнсса аьрххирдаву цанна даин хIисав шайсса диркIшиву тайнначIа паччахIлугърал лишаннал хIурмат бюхттулсса бушиву, Совет заманнай жучIава кунмасса.
— Ттизаманнул Дагъусттаннай магьирлугърал ва литературалул кьадру бакъар. Идеология даххана хьуну дур. Лишаннахсса хIурмат, паччахIлугърахсса хIурматри. Политикалул тагьар саргъунну да­къасса обществалуву паччахIлугърал лишаннахсса хIурматгу бикIан къабюхъайссар, — тIий ур ва.
Мурад Аьбдулмуъминовлулгу кIицI лавгуна цува ивсса билаятирттай паччахIлугърал лишанну брендруну хъанай душиву.
Маирбек Агъаевлул бувсуна, «Черновик» кказитрал интернетраву бувсса цIухху-бусулийн бувну, 73 процент инсантурал бушиву гимн даххана давриву цан цукунчIавсса чарабакъашиву чIалай дакъар тIий; 15 процент — гимнраяр хьхьичIун ласунсса хъуни-хъунисса мурадру чIявур Дагъусттаннай тIий; 11 процент — гимн «похоронкалуха» лархьхьусса дур тIий.
Яла лархъуна жулламур гимн, «ккуркки столданий» гьур­тту хъа­нахъиминнал, экспертътал хIи­саврай, бикъавзунма вичIи­дишин­шиврул. Амма чIявуми лавай бивзуна. ХьхьичIа-хьхьичI — Альберт Эседов:
— Шикку къабизан бучIину бунувагума на ттуйва бияла бакъа ивзра. Официальныйну кьамул дурния мукьах мунил хIурмат бикIан аьркин­ссар. На ттулва оьрчIругу мукунма тарбия буллай ура. Ттул хъунмасса умуд бур мунил лагмасса къабагьавайсса аьлагъужалулгу ахир хьуну, жулла ххаллилсса гимнрай жулва оьрчIругу лавай бизлантIишиврий. Махъру бухьурча хъинни, бакъахьурчагу, гимнрал музыкалул ххуйшиву чан хъанай дакъар.
Ирина Нахтигаль:
— Кьура шинал хьхьичIсса иширттаву гьурттуну бивкIсса музыкалул пишакар хIисаврай буслай бура ттулва пикри. Республикалул гимнрал автор Дагъусттаннал акъа­ссагу, щалла дунияллул кьимат бивщусса композиторди. Ттун дакIних кIулли Ширвани Рамазановичлул музыка. Ччя-ччяни вичIидишара. Мяйжаннугу, ттуршукурдай личIантIисса музыка бур. На гьарца кIанттай сивсуну угу-учара. Гимнрал хIакъираву – микку дуссар жанралул хасшивур­тту, тIалавшиннарду, жанраясса бувчIинбавуртту.
Бразилияналмунищал лащан дуллангу циванни? Дагъусттаннал гимн куртIссагу, бюхттулссагу, аьчух­ссагу дур. Жува му тIий бакъару так ахирданийн къадурцуну душиврийн бувну. Жущава къабювхъуну бур му Бразилиянал кунна хъун хъанахъисса никиран ххира хьун дан. Хъуниминнал биялалийсса иш бур му. Иш музыкалувугу бакъар, музыкалул даражалийсса махъру бакъашивруву бур. Авадансса, бюхттулсса музыкалий аьйрду къаляхълай, лякъин багьлай бур му музыкалун лайкьсса махъру.
Фаина Графченко:
— ЧIявусса салкьи хьуну бур ттуву гимнрал ялув. Билаятрай ци-бунугу хьун аьркинссар гимн тIуншиврул. Бразилия, жухва бурувгун, хъинну лащинну ялапар хъанай буссар. Амма тай ххарину бур цалва мархрая – миллатрал лишанну хьусса футболданий цIунилгу ххувшаву ласаврия. Дагъусттаннал концертирттай тIутIисса балайрдал хIисав ласарув зу тачIав? Оьвхъусса жагьил уссар: «Вила кару, вила хъачIру пишкаш дува абадлий» тIий. Муниярва пашмансса иш цамурди бусса. Бусурманнал билаятрай ца тарбия буллалиссару жува? Транспортраву жагьилтал бугьараминнал лувату къабизай тIисса чIявусса хьунабакьай. Мури зун хъинсса! ЧачIав бувкIссаннал бакъар Ккавкказуллал ужагъ ппив буллай! Бургияра лагма хъанахъимуних — жулла карунних жува бухлаган буллай буру жула ялун бучIантIимур, гьунар бакъаминнан ххуллу тIитIлатIаврийну.
Бачияра мяълумну гъалгъа тIуннуча. Жулва хьхьичI бур «ххаллилсса текст». Дагъусттаннал паччахIлугърал гимнрансса неофициальныйсса текст. Зун бувчIлай бурив — цумур билаятрайри бусса гимнран неофициальныйсса махъру? ЦIана жува ва текст гьарца мукъуй бавцIуну ххалбигьинну.
Бургияра музыкалух, мунивусса гужрах, битавшиврух, загълуншиврух. Ванил чIарав текстгу бишара, цуксса къуркъасса бурив мяъналулгу, рифмалулгу.
Гимнрансса шеъри таржума бува увкукун: «Муксса жаваблувсса даву бакIрайн ласун на къасисинссара», — куну, Станислав Сущевский махъаллил хьувкун, Расул ХIамзатовлун къаччангума бивкIуна. Наум Гребнев тани сагъну акъая, Яков Козловский инжитну ия. Яла Марина АхIмадова бакъа шеъри таржума бансса цама акъая. Агарда му цуппа шикку буния, на учин дакIнийсса цимурца учинтIиссия, махъа гъалгъа тIун ччай бакъар мунил таржумар­ттая. Ми лап хьхьарасса дур. Гимнрая ихтилатвагу бакъар. Ва дур анжагъ подстрочныйсса таржума. На ва таржума дан дулунтIиссия гьунар ххисса шаэр Миясат Муслимова­хьхьун ягу Москавлив цIадурксса таржумачитурахьхьун. Лапва хъинну хьунссия ва шеъри таржума бансса конкурс баян барча.
Эдуард Уразаев:
— Гимнрал музыкалухун махъру багьан бан жапану бур тIий бурхха.
Фаина Графченко:
— Вайнна шикку пишакартал, вайннал тасттикь бантIиссар гимн­рал музыкалухун багьантIисса 10-11 слограйсса шеъри.
Скандарбек Тулпаров:
— Ттун махъру ттинин къакIул­ссия. Вай бувккуну махъ дакI пашмансса пикрирдал дургьунни. Жува укунмагу махъун багьсса инсантуран ккалли буллай буру цайми шагьрурдай. Ва текстрал жуявасса къалпсса пикрирду хъиннува исват буллай бур. На махIаттал уллай ура гимнрал музыкалул ялув аваза гьаз шаврил! ХIакьину, билаятрал цIанихсса композитортал: «Чаллаев, хIакьсса художник хIисаврай, цимирагу ацIра шинал жуяра хьхьичIунай лавгун ур», — тIисса чIумал, хъунасса композиторнал музыка къабагьавай зума-ккарччулун бутаврий! Мяйжаннугу, Ширвани Рамазанович муксса хьхьичIунай лавгун урхха, мунал бюхттулшивручIан жулла ка диллай дакъар. Ванал музыкалучIан биян хIарачат бансса кIанттай, жува буру жула даражалун лавхьхьумур кьамул даврийну хъунасса композитор кьюкьин ан ччай. Ваксса лащинсса текстраясса ихтилатру сукку банмагу цукун бюхъайссар?
ТIайлану тIий ур «Анжилул» тренер Тетрадзе: «Дагъусттаннай гьарзад дур, амма цичIар дакъар. Шанма стадион бухьурчагу, бакъар жулва футболистал. Хьхьири бур эмаратсса – щинавун бучIансса кIану бакъар. Шаттирал бакIрах ресторанну бур, бур учинсса цавагу бакъар». Мяжаннугу, мукун бугу — бур. Бур Оьруснал театр, ххаллилсса актертал, авадансса репертуар. Тамашачиталлив кIункIу бан къашай. Амма концертирдай заллу бувцIуну бур. Гьарзад дур, цирив диял хъанай дакъар.
Гимнрал суал — хIакьину лап агьамсса масъалар. Макьандалий щилтагъшиву цукунчIавсса дакъар. Багьлай бур музыкалун лайкьсса махъру лякъин. Ттун жулла хIакьинусса гимнрачIан дияйсса цамур чIалай дакъар.
Мурад Къажлаевлул чулухасса инсантурайнгу оьвчин дакIний бунува, ганал цала заявлениялуву учин бумур учав куну бухьувкун, къаоьвкушивугу кIицI лавгун, Эдуад Уразаевлул дурккуна композиторнал «Дагестанская правда» кказит­райсса макьала.
Зарифа Аьбдуллаева:
— Щялмахъри комиссиялуву магьирлугърал деятельтал къабивкIссар тIутIаву. На буссияв комиссиялуву. Уссия цIанихсса дирижер Шамил Ханмурзаев ва цаймигу хьхьичIунсса музыкалул деятельтал. Конкурсрайн буллусса циняв произведенияртту лайкьсса бия. Язи бувгьусса ххуйминнувагу яла ххуймурди. Ва ялагу, царагу паччахIлугърай гимн «всенародныйну» ххал къадигьайссар. Ххалдигьайссар пишакартурал, кьамул дайссар жяматрал.
Жува паракьатну, саргъунну, дусшиврий, цашиврий ялапар хъанай байбивхьусса чIумал гимнрал хIакъираву цукунчIавсса суал гьаз къахьунтIиссар. Цинявппа лавай бизавантIиссар.
Совет Созрал гимн гьарцаннан кIулну диркIшиврия гъалгъа тIий бур чIявусса. Циван кIулну къадикIави билаятрай гьарца кIюрх гимнрая дайдихьлай дуний.
Лариса ХIажиева:
— Спортсментурал ххувшавур­ттая, экономикалул хьхьичIуннай­шивурттая гъалгъа тIуннин, ттул пикрилий, яла хъунмур къулагъас, Ирина Германовнал увкусса ку­ццуй, дуллан аьркинссар хъун хъанахъисса ник тарбия даврих.
Ларгсса шинал Миясат Муслимоващал биялсса делегация лавгру Къазахъисттаннал Актау шагьрулийн. Жу бувцунав садикирттайн, школарттайн. БухкIулу лахъайтува асар хъанай бия тайнначIа патриотизмалул кьимат хъунмасса бушиву — лавхъун бур билаятрал ттугъ, герб ва гимнрал махъру. Гьарца кIюрххил детсадрайсса оьрчIрува тIий бур гимн. Зулва билаятрал гимн ххуй дизайрив, куну цIувххукун, ца жагьилнал ттухь тIива: «Мунил пикри банмагу къабагьссар тачIав. Ххуй къадизансса, ххира къахьунсса чара бакъассар — на муний хъуна хьуссара. Агарда гимн тIутIисса чIумал урчIамур ка къюкIлицI къадиширча, му гимн кьюкьин давур.Гимнрайн махъ учин шайссарив яла?»
Совет заманнай жувагу мукун тарбия буллай бияв. ЦIанакул? Жагьилсса никиран къакIулну дур тIун циванни? «Цан гимнрал макьан цаллагу къабавссар», — тIий ур хIурмат бусса Мурад МахIаммадович. Гьунар бусса оьрчIансса школалийн заназисса оьрчIаннарагу лахьхьин къадуллалийни, щинни яла му кIулну дикIантIисса?
Рамазан Фаталиев:
— Шикку ттунма бавмунил жям дуллай, ттула чулуха ххибавияв жунма дакIний бухьурчагу, кIицI къалавгун ливчIсса зат — этикалул чул. Дагъусттаннал пахрулул лишанну хьусса республикалул гражданин, бюхттулсса композитор – бусса оьрму щалва дагъусттаннал музыка ахттар баврин, му дуллу-дунияллийх машгьур баврин буллусса, цувагу, мунал щалла творчествагу визитная карточкану хьусса Ширвани Чаллаев лайкь дакъасса калимар­ттайну бунияла кьюкьин уллалисса. Шикку щябивкIсса цума-цаннангу кIулссар цуксса бюхттулсса даражалийн гьаз бувссарив дагъусттаннал музыка мунал.
Мяълумну муния гъалгъа тIурча, курьезныйсса ишну чIалай бур гимн даххана дан-къадан тIисса хаварду. На укун тIий ура гимнрал макьан ттунна ххуйну кIулну тIий. На нава комиссиялуву къаивкIхьурчагу, гьуртту хьуссара обсуждениярттай. Халкьуннал Мажлисрал трибуналия ттулва пикригу бувсъссар. Ттун хъинну ххуйну дакIний бур цими этапрай ххалдиргьуссарив, цукун ххалдигьлай диркIссарив гимн. Му хъинну жаваблувсса иш бия.
Скандарбек Данияловичлул тIайлану увкунни, жува аьркинссару ларайсса магьирлугърачIан хъит тIун, инсантал муничIан гъан буллан. Ирина Германовнал пикрилуцIунгу акьлай ура.
ХIакьину гимн жагьилтуран циван къакIулссарив аьлтта чIалай бур – му чувчIав тIутIи къадуллай тIий. Республикалул каялувчитурал хIуччагу къабувчIлачIисса бур. Кьамул дурну мукьах цила багьайсса куццуй дуручлангу аьркинну бухьунссия, гьарца мероприятияр­ттай Аьрасатнал гимнрал хъирив руцлай. ЖучIара тIурча нажагь дакъа къабаяйва. Ца-ца чIумал так Аьрасатналсса руцаврийну гьашиву дайва. Жяматгу вардиш хьуну бия агьаммур гимн Аьрасатналсса душиврийн.
Жулла гимнрал музыка да­гъус­ттаннал гьарца миллатрал такьва дусса, авадансса бур.
Лариса ХIажиева:
-2003 шинал на Санкт-Петер­бурграй консерваториялувун бухлахисса чIумал Мариинский театрданул каялувчи Валерий Гергиевлул увкуна: «Дагъусттаннал гимн дунияллий яла ххуймурди». Цайми билаятирттал гимнру, махъру бакъа вичIидиширча хъинну ссуссукьусса дуссар.
Рамазан Фаталиев:
— Ттигъанну Экономикалул ва культуралул форумрайн бувкIсса Москавлиясса делегациялул вакилтал бия ссаха зий ура тIий, цIухлай. Гимнрал масъалалиягу бувсун, Композитортурал союзрал цIаниясса чагъар хIадур буллай ура учайхту: «Зул ххаллилсса гимн дур, жугу къулбас данну», — тIий бия.
Ва масъала сукку шаврил савав – махъру бакъашивур. ХьхьичI махъруя кьамул бан аьркинсса. Ширвани Рамазановичлул макьан чирчуна махъру бакъанма. Творчествалувугу дуссар цанна хасъсса законну. Макьан чичайсса мукъурттинни. Жулва тIурча, макьандалун махъру лащу-щаллу буллан багьунни. Ххаллилсса музыка ссал тахсирлуври? Композиторнайссагу тахсир цир музыка цимигу даражалул мукъур­ттияр лавайсса бушиврул? — Му тIий бакъашиву? ЧIявусса билаятирттал гимнругу махъру бакъасса дуссар, ттун му ххуйну кIулли. Му балайлий тIунсса аьркиншиву личIисса да­къассар. Лавай бизавугу гьассар.
МахIаммад ХанмахIаммадов:
— Жунма ккавккунни стадиондалийцири Бразилиянал гимн тIутIисса куц. Тай бур цалла ххувшаву билаятрацIун дахIлай.
Гимн — магьирлугърал ирсри. Циван сукку хьуссар мунил хIакъиравусса ихтилатру? Цанчирча жучIава магьирлугърал кьимат бакъа тIий, рувхIанийсса ирсирал кьимат бакъа тIий. Мукунмасса кьадар ялун бучIантIимунилгур бусса. Жулва оьрчIал гимн къатIунтIиссар, цала хьхьичIуннайшивуртту би­лаятрацIун къадархIуссаксса.
Жанна Абуева:
— Американувунсса аьрххилий ссалчIав махIаттал къабувсса ца иширал махIаттал бувнав — пат­риотизмалул. Гимн тIисса чIумал гьарца паркираву, пляжирттай халкь лавай бизлай бия. ДакI мяшну ливчIунав.
Жува тIурча, вайксса буруккин­тту бусса республикалий, щиннив ххуй къадирзуннича тIий, гимнрал масъала сукку буллай буру. Ниттил накIлищалла татан дуллан аьркин­ссар гимнрахссагу, ватандалухссагу ччаву.
Гимнрал хIакъиравусса хавар баяйхтува, интернетраву луглан бивкIра цIунилгу вичIидишин. Иманшяпи МахIаммадов тIисса оьрчI увккунни цамур балай тIий. Гимнри тIий ва ци балайри интернетраву бивхьусса? Му ци хIурмат бакъашивур паччахIлугърал лишандалул?
На зий бура студентътуращал. ЧIярусса давуртту дуллай бура ми ватан ххирану тарбия баврил ялув. Ца ххуллух дурссия Ширвани Ча­ллаев­лущалсса хьунабакьаву. Барчаллагьрай бура учIаврихлу — ххаллилсса мероприятие хьуна. Гимн лахъайхту цинявппа варх куну лавай бивзуна, къуртал хьунцIа чIитI бакъа бавцIуну бия. ЛичIлулну вичIидирхьуну бия композиторнал ихтилатрах. Рязину ливчIуна хьунабакьаврия. Шаппай бувкIукун интернетраву ххал дурну дия гимн, щиллив лявкъуну бия гимнрансса махъру. Учин ччисса цира? Жулва жагьилтурая ка ласлан аьркин бакъассар. Гай жува тарбия бувсса куццуйсса бур.
МахIаммад ХIусайнов:
— Дагъусттаннал паччахIлугърал Гимнрал конкурсрай нагу дирхьу­ссия ттулламур макьан. Комиссиялул язи дургьуна бюхттулсса композитор, ттул хIурмат лавайсса уртакь Ширвани Чаллаевлулсса. Муния мукьах ттучIа гимнрал хIурмат хъунмассар. Мяйжаннугу, махъру кьамул къабувну бушиву музыкалийсса аьй дакъархха.
Расул ХIамзатов Дагъусттаннал поэзиялул ттугъну хъанай ухьурча, Ширвани Чаллаев — Дагъусттаннал музыкалул ттугъри. Мунийн бувну, нагуДагъусттаннал хIакьинусса Гимнрал чул бувгьумара. Расул ХIамзатовлул шеъри гьунар бу­сса таржумачитурахьхьун булун аьркинссар тIисса пикрилуцIунгу акьлай ура.
Вава пикри буслай бия Сяид Ниналавов, Амирхан Амирханов, Мурад Аьбдулмуъминовгу.
-Дунияллул хъунасса композитор Ширвани Чаллаевлухлу ва мунал гимнрахлу буклансса аьркиншиннарагу чIалай дакъар. Жува Чаллаевлуннияр, Чаллаев аьркинсса жунар, мунал ххаллилсса гимнрая махIрум бан ччисса Да­гъусттаннал халкьуннан, — тIий бия Мариян Чалабова.
Эдуард Уразаевлул, телефон лахъсса связьрай дирхьуну, оьвкуна Ширвани ЧаллаевлучIангу. Ванал цалвамур пикри жу ттинингу бусарду, мунияту тикрал къахъананну.