Ва зурул 14-15-нний шин ккуру ларгунни Лакку улча вай ряха хIакьсса зунтталчунацIа хьуну. Шинал лажиндарай бат бунни вайннал оьрмурдайн кьаст лархIусса ххюя къачагъ. Райондалул полицанал отделданул зузалтрал хIарачатрацIух бувгьунни ми къачагътуран кумаг буллай ивкIсса 12 инсан. Гьай-гьай, мунийну вайннал кулпатирттал къюву хъисрагу рахIат къахьурчагу
абадшиврувунни лавгсса, вайннайн луркIан дуркминнал кьюкьалалул мугьру тIурча цимигу никирай яла къагьантIиссар.

Зулайхат Тахакьаева
Лаккуй шану нахIусса бияй. ЦIан-чаннаву бизарчагу, чурхгу таза-тяхъану бикIай. Амма ва кьинирив чурхгу кIуну бия, дакIгу къуману. ЧIавахьулу тIитIайтува кIюрхнил дюх­лулул ттюнгъану ках кунни лажиндаравух. Бургъил тIинттугу дур зунттал мицIайн хъямала дагьлай. МарцIну някIсса ссавнийх ппив хьуну дур памма кунна кIукIлусса ттуруллал къурхъру. Ххирар ттун Лаккуйсса кIюрх. ХIакьинумурдив да­къар вайминнуха лархьхьу­сса — чIаврдайх ккуру най бур мукьал кIунтIру. Тарихрал цIа ларгсса Ла­кку билаятрайн вилаххав душмантурал ккуллардал чявхъа бувтIусса кьинир хIакьину. Аьрщи-чарура щавари дурсса, гъидядизулий тIуркIу тIисса уртту-тIутIира някI микIиран даркьусса кьинир. Лакку улча язисса арсурваврацIа хьусса, ряхва жагьилсса кулпатрал оьрмурдайх бурса бавкьусса, 15 оьрчI ятинну ливчIсса кьинир.
ЦIусса шинал ттухьхьунма нава махъ буллуссия кIунтI бишин ва оьттул гъулуртусса темалий, ххишала муничIан кIурагу къабаян. Муниятуя цIусса шин олимпиадалун хас дур­сса макьаларттая чичлай дайдирхьуссагу, олимпий даражалул бюхттулшивурттайн Лакку улчагу, щалва Дагъусттангу бияннав тIий дуаьрттай. Амма гьар Гъумукун лавгтари, лухIи лархсса ниттихъул, щахъами, ссурвал, оьрчIру хьунабавкьукун, дакI ччучлан дикIайва. Ирглийсса лачIун буккаврил турнирданий гьуртту хьун нанитари чIирайн лархъсса буттал суратрахгу цIитI бивкIун буруглай: «Мяммай, ина жун кумаг бува», — тIий буссар Апаннинал арсру Башир ва Батир. Телевизордануву полицанал янналувусса жагьил ккаккайхту: «Мямма! Мямма!» — тIий, тиккун ххяхлай буссар Абакардул кIира шинавусса душ Амина.
«Щукру полицанал отдел дяшярава зуманийн дизан дурсса. «Ттул мямма чуври?» — тIий, Идрислул душ бувкIтари, дакI шиши дагьайва», — тIий ур Идрислул гьалмахчу. Ваналмур Аминал оьрмулуву цуппа бувсса кьини личIантIиссар абадул абадлий дягъулулну. Ниттил бувсса кьини барча дан мямма торт лавсун учIаннин яру личавай бивкIссар ва.
Бюхъайссарив кIунтI бишин? Ва райондалул тарихраву дагьсса хъякрур, цимил душларчагу чатIа багьлантIисса. Кисайлулу кIучI дарча дакъасса оьрмул-оьрмулухун хъин къахьунтIисса щавур, ссахун-дунугу дахчуну, кисай яла­ту дагьну чIаракIлу щурча, цIунтIисса, цIурхьхьу тIунтIисса. Так каленьдарданува дакъа, оьрмулува руцан дан къахьунтIисса кьинир.