Январьданул 20-нний Дагъусттаннал бакIчи Рамазан АьбдуллатIипов хьунаавкьунни республикалийн увкIун ивкIсса «Курорты Северного Кавказа» ОАО-рал гендиректор Сергей Верещагиннущал ва дунни республикалий туристшиврул кластер баврин хасъсса совещание.
«Дагъусттаннай ляличIисса каширду дур, ми Совет заманнайгу ишла дуллай бивкIссар. Дагъусттаннайн бучIайсса бивкIсса азарахъул инсантурал ххуй дайсса диркIссар цалла цIуллушиву. Туристшиврул хъуннасса мяъна дуссар Дагъусттаннан, му лядуккан даврийну чIявусса масъалартту щаллу бан бюхъанссар, миннувух экстремистшиврул ишругу», — увкунни Рамазан АьбдуллатIиповлул.
Сергей Верещагиннул бувсмунийн бувну, Дагъусттаннай дур бальнеологиялул ва туристшиврул каширду, ми аьркинссар ишла дуллан. ЛяличIисса мюнпат ласун хьунссар Каспий хьхьирил зумардацIухсса кластердания.
С. Верещагиннул мукъурттийн бувну, захIматшиву хъанай дур аьрщарацIун бавхIусса масъаларттан хасну. Ми щаллу баншиврул компаниялун аьркинни республикалул бакIчинащал уртакьну зун. Мукунма хIала-гьурттуну зун аьркинни мурадлувсса ведомстварттащал ва муниципалитетирттал бакIчитуращал.
ДР-лул Туристшиврул комитетрал председатель МахIаммад Исяевлул бувсунни республикалий 10 приоритетсса проект хIадур дурну душиву. Ганал увкусса куццуй, федерал программарттал ва паччахIлугърал компаниярттал чулуха ка-кумаг бакъа проектру ишакаш дуллан захIмат хьунссар. Совещаниялий ихтилатру бунни цайминналгу.
Хьунабакьаврил хIасиллу дунни республикалул бакIчинал.
