МАХIАММАДАЛ АРС МАХIАММАДОВ СИРАЖУТТИН
Уттигъанну дунияллия лавгунни ххаллилсса лаккучу, фронтовик, Кьубиял шяравасса МахIаммадал арс МахIаммадов Сиражуттин.
Сиражуттин увссар 1925 шинал Кьубиял шяраву.
Хъунмасса Буттал КIанттул цIанийсса дяъви байбивхьусса чIумал Кьубиял шярава хушрай дяъвилийн лавгминнавасса ца Сиражуттин ивкIссар. Миннавугу му яла оьрмулул чIивима ивкIун ур. Дяъвилул ххуллурду битлай, ва лавгун ур Германнавун ияннин. Сиражуттиннул дур дяъвилийссагу, махъ дуллуссагу ацIнияхъайсса медаллу, бур ваначIа хIукуматрал хъуниминнаясса барчаллагьрал чагъарду. Сиражуттин дяъвилий талай уна, 1943 шинал хар-хавар бакъа ивкIуну ур ванал ппу. Усса ца арсгу дяъвилий, ласгу ялату лавгун, мукьва душнищал лирчIсса ванал ниттин СалихIатлунгу тамансса захIматшивуртту ккарккун дур. Амма циняр захIматшивуртту хъамаритан дансса ххаришиву хьуну дур дяъви къуртал хьуну махъ арс зана шаву.
Дяъвилия увкIун махъ, тай шиннардий, Кьубиял школалий дарс дихьлахьисса, Ккурклиясса Сумайшат тIисса жагьилсса учительницагу бувцуну, Сиражуттин ивзун ур ЦIусса ЧIурттахьхьун. Уссал цехгу тIивтIуну, микку зий ивкIун ур. Мунияр махъ мува пишалий зий ивкIун ур Дянивмур Азиянаву. Тиха зана хьуну махъ зий ивкIун ур Къалмукьнаву.
ХIукумат даххана шайхту, Сиражуттин ивзун ур цала арсначIан Щурагьун. Сиражуттиннул арс МахIаммада ур Щурагьгу, МахIачкъалаливгу ххуйну кIулсса, цIа дурксса хIакин, хирург. Жаваблувсса, захIматсса даврий цува унугу, МахIаммадал хъисрагу чан къадунни буттахсса аякьа. Ва буттал лавай авцIусса куц чIалай, цинявппагу нитти-буттан укунсса арсру булаваннав тIун бикIайва вайнначIан бухху-букку хъанахъими, вайннал кулпат кIулми.
Сиражуттин аьпалул шаврил кьурчIишиву кIидачIлай, жижара буллай буру арснахь МахIаммадахь, ванал кулпатрахь, оьрчIахь, махъсса гъан-маччанахь. Цал бунагьирттал аьпа баннав, алжаннул ххари аннав, гьав нурданул дуцIиннав.
Кьубиял, Ккурккуллал, ЧIурттащиял жямат
…………………
ГЪАЗИЛ АРС ГЪАЗИЕВ САЭД
Дагъусттан Республикалул Машлул ва промышленностьрал палаталул чулухату хъуннасса пашманшиврий кIицI лаглай буру оьрмулул дурагу 40 шинаву му палаталул президент Гъазил арс Гъазиев Саэд жуятува батIул шаврил хавар.
Гъазиев Саэд увссар 1973 шинал МахIачкъалалив. 1989 шинал МахIачкъалаллал 13-мур дянивмур даражалул школагу къуртал бувну, увххун ур Дагъусттаннал строительный техникумравун. Муния махъ бувккуну бур Дагъусттаннал паччахIлугърал университет – менеджментнал пиша. Хъиривва бувккуну бур Экономия хьхьичIуннай нанаврил министерствалучIасса Щалагу Аьрасатнал КьатIаллил машлул академия.
Цала захIматрал ххуллу Саэдлул байбивхьуну бур 1993 шинал «Дагъусттан-Ритм» МКПТП-луву къатридуву-усттар хIисаврай. 1997 шинал зун ивкIун ур «Систематехникнал» НПП-лул хъунама инженерну. Микку зий ца шингу дурну, му ивтссар ДР-лул ПаччахIлугърал Советрал ва ХIукуматрал хьхьичIунсса специалистну. 1999 шинал зун ивкIссар «Кавтрансстрой» АО-лул СМП-179-ннил начальникну. 2002 шинал увчIуссар МахIачкъалаллал Шагьрулул Мажлисрал депутатну.
2000 шинал, ирглий бакъасса съездрал хIукмулийн бувну, Саэд увчIуссар ДР-лул Машлул ва промышленностьрал палаталул председательну. Мунал каялувшиву дуллалиссаксса хIаллай палаталул иширттаву ва давурттаву хьуссар ккалли дансса ххуй-ххуйсса хьхьичIуннайшивуртту.
Саэдлул даврил цинявппагу уртакьтурал, дазу-зума дакъасса къумашивугу кIидачIлай, дакIнийхтунусса жижара буллай буру буттахь, ниттихь ва махъсса щалвагу агьлу-авладрахь!
Цал бунагьирттал аьпа баннав, рухI бигьаний дишиннав!
ДР-лул Машлул ва промышленностьрал палаталул коллектив
…………………
Кьадинал арс Аьбдуллаев ХIамзат
Август зурул ахирданий, оьрмулул 77 шинаву, жуятува личIи хьунни ххишала акъа дугърисса чув, цала миллат ва буттахъал улча ххирасса, Гъумучиял Явюбукухъал Кьадинал арс ХIамзат.
Аьбдуллаев ХIамзат увну ур Гъумук 1936 шинал Аьбдуллаев Кьадинал кулпатраву. Гъумук школагу къуртал бувну, увххун ур Буйнакскаллал механизациялул техникумравун. Ххуйсса ккаккиялий гагу къуртал бувну, зун лавгун ур Тарумовский райондалийн инженер-механикну. ХIамзат чIярусса шиннардий ва райондалул ва Кочубеллал зоналул шяраваллил хозяйстварттал гостехнадзорну зий ия. Цала пиша лавайну кIулсса, карчI дакъасса, аьркиннан кумаг бан хIадурсса ХIамзат цува зузисса даврийгу, кIулминначIагу ххишала акъа лавайсса хIурматрай, бусрав буну ия.
ХIамзатлул бивкIулул кьурчIишиву кIидачIлай, жижара буллай буру ванал кулпатрахь, душваврахь, уссурссуннахь цинявппагу гъан-маччаминнахь. Цал гьав нурданул дуцIиннав. Ванан бакъамур оьрчIан, махъминнан булуннав.
Гъумучиял ва Хьурттал жямат
…………….
МУСАЛ ДУШ МАХIАММАДОВА КЛАРА
Вай махъсса шиннардий къашавайгу бивкIун, уттигъанну аьпалул хьунни ххаллилсса хъамитайпа, нину, Шахьуйннал шяравасса Мусал душ МахIаммадова (Мусаева) Клара.
Клара бувссар 1938 шинал Шахьуйннал шяраву педагог, фронтовик Мусаев Мусал ва ПатIималул кулпатраву. Школалий дуклай бивкIун бур КIундив ва Къайтагъуллал раондалий Маджалислив зунттал душварансса интернатраву. ЦIанагу дакIний буссар миккусса инсантуран Клара, миккугу аьтIий буссар Кларал хъирив архIал дуклай бивкIми ва му кIулну бивкIми.
Маджалислив 10 классгу къуртал бувну, Клара Украиннайн лавгун бур. Кулпатрал хьуну, махъунмай Дагъусттаннайн бувкIун, бувххун бур Буйнакскаллал педтехникумравун. Мугу къуртал бувну, Кларал цилва оьрму хас бувну бур оьрчIан тарбия дулаврин. Ванил 40-ллихъайсса шинну хьуну дур тарбиячину зий. Ва бия захIматрал ветеран. Бувсса дакIнийхтунусса захIматрахлу гай шиннардийра ванин дуллуну дия «СССР-данул лайкь хьусса педагог» тIисса цIа. Ва бия ляличIийссара хасиятрал инсан, ванин цава-цану ххирая цилва лякьлул оьрчIругу, тарбия буллалими оьрчIругу. ТачIав къабавссар ванил щийн-бунугу чIу лахъ буллай, къаккавкссар ва тачIав я-бакI бувтун. Ванил гъилисса ужагърал нузкьунттив мудангу тIиртIунна дикIайва, ванил чаннасса симандалия пиш тачIав чан къашайва.
Клара аьпалул шаврил кьурчIишивугу кIидачIлай, жижара буллай буру ласнахь Ссаланнухь, арснахь Сашахь, душнихь Маринахь, душнил душнихь Ленахь, ссурваврахь Раяхь ва АьтIикIатлухь, уссурваврахь ХIасаннухь, ХIусайннухь, Арсеннухь, МихIаммадахь, махъсса цинявппагу гъан-маччанахь, щалвавагу агьлу-авладрахь. Кларал чаннасса симан, кIукIлусса хасият ва кIулну бивкIнал дакIурдия тачIавгу къагьантIиссар. Бунагьирттал аьпа баннав, рухI чаннаний, хъинний дишиннав, пирдавс-алжан нясив баннав.
Шахьуйннал жямат
……………….
МЯММАЛ ДУШ ОЬМАРИЕВА ПАТIИМА
Сентябрьданул 19-нний оьрмулул 102 шинаву, цалвагу азарханалийнгу къабагьна, паракьатну ахиратрал хьунни Оьмариева ПатIима.
Аьпа биву, ПатIима бувну бур 1912-кусса шинал ЧукIуннал шяраву Мяммал ва Уммул кулпатраву.
Оьрмулул чIивину бунува ванин нитти-буттал лахьхьин бувну бур даву дуллан, ляхъиндалущал, чIахху-чIаравминнащал ва даврийсса агьалинащал нахIуну-хIалимну бикIан. Мунияту бухьунссия, аьпа бивул, оьрмулул 102 шин хьунцIакул я шяраву, я шагьрурдай щихьчIав жагъаласса махъ увкуну бакъар, рагьан дурну дакъар. Биялсса захIмат бивхьуну бур ЧукIуннал «Стахановлул» («Лениннул») цIанийсса колхоз ччаннай дацIан дуван, Буттал КIанттул цIанийсса дяъвилул шиннардий Анжиллал ва Каспийск шагьрурдал лагма окопру дуклай.
Ванил бувсса захIматран лавайсса кьимат бивщуну, Совет хIукуматрал Президиумрал хIукмулийн бувну, 1947-кусса шинал дуллуну дур медаль «За доблестный труд в Великой Отечественной войне 1941-45 г.г.».
Мунияр махъ ласнащал архIал хIалтIилухун занай чIявусса Аьрасатнал шагьрурдайн бивну бур. Мукун бувсса маэшатрах Гьанжилив ларсун къатригу, ахиратрал хьуннин буссия шилу ялапар хъанай. Ванияр ххюра шинал хьхьичI, оьрмулул 99 шинаву, ванил лас Мяммагу, мукуна цалагу азарханалийн къаагьна, паракьатну аьпалул хьуссия.
Я Раппий, я Аллагь! Ванил гьав нурданун лахъаннав, рухI хъинний дишиннав, махъ ливчIсса авладрайгу Аллагьу-тааьланал цIими бишиннав, вай кунма оьрмурдал буччиннин битаннав ва къушлийгу барачат бишиннав. Амин!
ЧукIуннал ва Ккурккуллал жяматрал цIания МахIаммадов Арбухана
……………….
Къумасса дакIурдива жижара буллай буру Гъазиев Гъазихь ва мунал щалва кулпатрахь чIун дакъа, хар-хавар бакъа ахиратрал хьусса ххирасса арс Саэдлул
цинявппагу бунагьирттал аьпа баннав тIий. Цибанссар, чичрулун чаран бакъассар учай. Зухьхьун Аллагьнал му кьурчIишиврул къюву духIансса ссавур дулуннав. Саэдлул рухI Алжаннул ххари даннав, гьав нурданул дуцIиннав. Саэдлун бакъасса оьрму махъминнан булуннав, вания тихунмай зуй Заннал цIими бишиннав, чири ххи баннав. Амин.
«Илчи» кказитрал редакция
