Ххуллун кьини Республикалул бакIчи Рамазан АьбдуллатIипов лавгунни
Лакрал ва Ккуллал районнайн.

Мунащал бия ДР-лул Президентнал виваллил политикалул управлениялул каялувчи Артур Исрапилов, цаппара министерстварттал ва ведомстварттал каялувчитал. Лаккуйн нанисса хIукуматрал хъамал бавцIуна Дагъусттаннал миллатирттал дусшиврул ва цашиврул лишанну хъанахъисса мемориалданучIа, Гъази-Гъумучиял Хан-Муртазяли бакIчину, Дагъусттаннал аьралуннал цачIуну Надир-шагьнал аьрал ххит бувну 270 шин шаврин хасну дацIан дурсса гьайкалданучIа тIутIив дишин.

ЦIусса къатраву цIу-цIусса шартIирдай зунтIиссару

Гъумук хьунни цIуну дур­сса Аьрасатнал МВД-лул Лакрал ва Ккуллал районнал виваллил иширттал отделданул къатри тапшур дуллалисса батIаву.
Виваллил иширттал отделданул къатри дурну дур ца шинал дянив, зузалтрал захIматрал шартIру ххуй дансса федерал целевой программалул лагрулуву. Техникалул махъра-махъсса цIушиннардай дурсса ОВД-лул къатраву, зузалтрал кабинетирттацIун бур ттизаманнул матахIрал лащу-щаллу бувсса аьра­ли хIадуршиннарал классру. Бур кинологиялул корпус. Лархьхьусса къатри дуллай бусса бур шанна райондалий ттигу, миннувух Рутуллал райондалийгу.
Виваллил иширттал зузалт барча буллай, республикалул бакIчинал районнал дянивсса отделданун тапшур дунни «Патриот» автомобильданул кIулли.
Лакрал виваллил отделданул зузалт барча бувуна Аьрасатнал МВД — лул СКФО-лул Хъунмур управлениялул каялувчи Сергей Ченчиклул. Ванал кIицI лавгуна ттизаманнул техникалул лащу-щаллусса къатраву къуллугърал буржру лавайсса даражалий би­ттур буллансса бюхъурду ххи хьушиву. «Вай шартIирдаву жулва зузалтран аьркинссар асар хьун паччахIлугърал ка-кумаг ва ххишаласса жаваблувшиннарай биттур буллан аьркинссар ми Ватандалул хьхьичIсса цалва бурж», — увкуна Сергей Ченчиклул Лакрал ОВД-лул зузалтран тIайлабацIу чIа тIий.
ДР-лул МВД-лул министр Аьбдурашид МахIаммадовлул ОВД-лул къатри дурну дацIан дурсса «УМС-2» (Управление механизации строительства) ООО-лул каялувчи Рамазан Къушиевлун ва цаппарасса зузалтран дуллуна наградартту. Му бакъассагу, ванал ОВД-лул каялувчи Марат МахIмудовлун тапшур дуруна кIива автомобильданул кIулли.
«Лакрал район» МР-данул бакIчи Юсуп МахIаммадовлул кIицI лавгуна ттизаманнул шартIирдал дузалсса отделданул цIусса къатраву низам дуруччаврил даража гьаз бансса каширду ххи шаврицIун цIакь хьун аьркиншиву райондалийсса низам, муния гъалгъа тIийна ушиву республикалул бакIчи Рамазан АьбдуллатIиповгу. Ми мурадру хьхьичI бихьлахьисса бушиву «Правопорядок и безопасность в Дагестане» тIисса Президентнал приоритетсса проектирдавасса ца.
Бувсуна райондалул жяматрал цIания барчаллагь баян буллай ушиву Аьрасатнал Виваллил иширттал министерствалул каялувчитурайн райондалул отделданух дуллалисса къулагъасрахлу.
КIицI лавгуна Дагъусттаннал низам дуруччай органнал зузалт гужлан дурсса кьаралданий зий бушиву махъсса шиннардий, кIанттул отделлал зузалтран ччя-ччяни багьайшиву хьхьу-кьини дакъа къачагътал бугьлагьисса спецоперациярдаву гьуртту хъанан.
«Цуксса хIайпнугу, махъсса шиннардий Дагъусттаннай чIявусса низам дуруччай органнал зузалт ливтIунни. Му щавщи жулла райондалийнгу бивунни. Лакрал отдел яла язими зузалтрацIа хьунни. Амма миннал чаннасса аьпа жула дакIурдиву абадлий яхьунтIиссар.
Жу багьавай пахрулий буссару дакI марцIну цалва къуллугъ биттур буллай, къачагътуращал талатисса МВД-лул зузалтрая. ДакI дарцIуну ура зул къучагъшиврийну ва пишакаршиврийну жяматраву полицанал хIурмат лавай хьунтIишиврий.
ЧIа тIий ура отделданул зу­залт­ран къуллугъраву хьхьичIунсса ккаккияртту, шиккун бавтIцириннан республикалул ялун бучIантIимунил цIаний зий, захIмат буллансса тIайлабацIу ва дакьаву», — увкуна Юсуп МахIаммадовлул. ОВД-лул къатрал хIаятраву тIиртIунни тти­гъанну Буршай къачагътурал канища ва спецоперациялуву ливтIусса полицанал зузалтрансса гьайкал. Ми дакIнийн бичин гиккун бавтIми ца минутIрайсса пахъ багьуна.
Лента кьувкьуну махъ Респуб­ликалул бакIчинал ва мунащал бувкIминнал ххал дуруна ОВД-лул къатри. Къатравух уклай унува, Аьрасатнал МВД-лул СКФО-лул Хъунмур управлениялул каялувчи Сергей Ченчиклущал Президентнал ххалбивгьуна «Безопасный город» тIисса проект щалла респуб­ликалий зузи баврил хIакъиравусса суаллу. Ихтилат бия ярагъ ласлансса ихтиярду дусса ЧОП-ирдал (частные охранные предприятия) даврил ялув бацIаву кьянкьа давриягу.

Пахрулун лайкьсса 100 шинал мутта

Вара кьини Республикалул бакIчи гьуртту хьуна ШавкIуллал школалун 100 шин шаврил юбилейран хас дурсса шадлугърайгу. Аьрасатнал Федерациялул Конституциялул Судрал судья ХIадис ХIажиевлущал тIиртIуна школа сакин бувсса ХIадис ХIажиевлул аьпалул ула.
Республикалул бакIчинал бувсуна цала чулуха школалун бахшишран буллалишиву ца миллион къуруширттал, отопление дуцин.
Шиккува кIицI бан республикалул кIулшиву дулаврил министерствалул школалун буллунни компьютерный класс.
Школа сакин бувманал цIа лайкьну дуручлачисса арснал арс ХIадис ХIажиевлун Республикалул бакIчинал дуллуна паччахIлугърал лараймур награда – орден «За заслуги перед Республикой Дагестан».
ХIадис ХIажиевлун ва шяравухсса ххуллия школалул хIаятравун бияннин асфальтгу бувтIуну, юбилей дан хъунмур хъар цайнна ларсъсса Москавливсса ишбажаранчи ХIажи ХIажиевлун дуллуна ДР- лул Президентнал цIа чирчусса ссятру.
«Лакрал район» МР-да­нул бакIчи Юсуп Ма­хIаммадовлул цалва ихтилатраву кI­ицI лавгуна ШавкIуллал школалул ва шяраваллил тарих хIурматран лайкьсса бушиву.
«КIулсса куццуй, тарих сакин байсса яргсса личностирдалли. ШавкIуллал школалул тарбия був­ссар республикалул бакъассагу, щалва Аьрасатнал даражалийсса ишккаккулт. ШавкIуллал жяматрал вакилтал гьар мудангу бивкIссар лакрал аьрщарай хъанахъисса иширттаву яла хьхьичIунминнавух. Зуву мудангу хьхьичIххуттай диркIссар ватан ххирашиву, цIушиннардайнсса хъит тIутIаву. Ми хасиятру зул ватанлувтураву тарбия дурссар ШавкIуллал школалул. Школа къуртал бувминнава бувккун бур кьунниха ливчусса элмурдал доктортал ва кандидатътал, кIулшиву дулаврил, цIуллу-сагъшиву дуруччаврил, халкьуннал хозяйствалул ва магьирлугърал зузалт, паччахIлугърал ва политикалул деятельтал.
Зулгу, щалла Лакрал райондалул жяматралгу пахрулун лайкьссар Аьрасатнал Конституциялул Судрал судия ХIадис ХIажиев, жуна хъамакъаитайсса Аьбдуллагь ХIажиевлул арс ва зул школалул гьану бивзсса ХIадис ХIажиевлул арснал арс.
Зул шяравучу МухIсин Жалаев чIярусса шиннардий ивкIссар ООН-далул вакилну. Мадагаскардай зий, цала буттал кIану ва щалва Аьрасат лайкьну ккаккан бувссар зул школа къуртал бувсса ХIасан Айгуновлул. Мукун пахрулун лайкьсса ва учительтурал цIусса никиран ва ялун нанисса жагьилтуран эбратрансса выпускниктал шичча чIявусса цаймигу бувкссар. Ябувара зула дянива лавгминнал аьпа, дуруччара школалулгу, щарнилгу цIа-кьини», — увкуна Юсуп МахIаммадовлул.
Школалул яргсса тарихрая бувсуна юбилей даврил Сакиншиннарал комитетрал хъунама МахIаммад Айгуновлул. Ванал барчаллагь увкуна байрандалийн бувкIсса хъамаллурахь.
Муния махъ республикалул бакIчи ва мунащалсса делегация лавгуна Ккуллал райондалийн «Агрофирма Цовкра-2» тIитIин. ШавкIуллал школалул байран гихуннай най дия.
Райондалул кIулшиву дулаврил управлениялул каялувчи Явсупи ХIамзаевлул школалул коллектив, дуклаки оьрчIру ва щалвагу жямат барчагу бувну, школалул директор Асли Какваеван дуллуна «Аьрасатнал аьмсса кIулшиву дулаврил бусравсса зузалал» цIаницIунсса лишан, учитель Гуламан Исяеван дуллуна «Дагъус­ттан Республикалул кIулшиву дулаврил отличник» тIисса цIаницIунсса лишан. ДР-лул КIулшиву дулаврил чулухасса ХIурматрал грамотарду дуллуна Эфендиева Валентинан ва ЦIургъулова Гульнаран.
ДР-лул кIулшиву дулаврил министрнал чулуха ШавкIуллал жямат барча бувуна министерствалул отделданул хъунмур ва школа къуртал бувсса Ирина ХIабибуллаевал.
ЧIярусса шиннардий Гъумучиял школалул директорну зий ивкIсса Будайчи Будайчиевлул кIицI лавгуна цалва захIматрал ххуллу ШавкIуллал школалия байбивхьушиву.
ДР-лул Халкьуннал Мажлисрал депутат Гъази Гъазиевлул цIания жяматгу барча бувну, школалун компьютер буллалишиву бувсуна ванал кумагчи Гьарун Ххирамановлул. ХIасан-ХIусайн Камаловлул кIицI лавгуна ШавкIуллал школа лагма щархъавасса оьрчIал кIулшиврул кюруну хьушиву, мукунма Читтурдал шяравасса оьрчIругу дуклай бивкIшиву. ХIасан Айгуновлул кIицI лавгуна Италиянал виричу ХIасан-ХIусайн Камалов цала школалий дуклай ивкIшиврия цанма хъунмасса пахру бушиву.
ПартIу ПатIимал ва Хан-Мур­тазялил гьайкаллу дурсса скульптор МахIаммадаьли Аьлиевлул школалун пишкаш дуруна Гьухъаллал къурув дацIан дурсса куннасса чIирисса гьайкал, ШавкIуллал школалия Хан-Муртазялил дакI дусса вирттал букканнав, тIий.
Лакрал райондалул школарттал директортурал цIания бавтIми байрандалущал барча бувуна Ккур­ккуллал школалул директор Даниял Магьдиевлул. Ванал кIицI лавгуна Асли Какваева директортурал дянив бувагу бусса ца хъамитайпа лайкьсса даражалий дачин дурну най бушиву цилла даву.
Асли Какваевал барчаллагь увкуна личIи-личIисса шиннардий школалий зий бивкIсса ва хIакьину зузисса учительтурахь, юбилей дан чIарав бавцIуцириннахь.
Дагъусттаннал Журналистурал союзрал хъунама Аьли Камаловлул кIицI лавгуна цалва хьхьичIунсса дустураву бушиву ШавкIуллал уздансса чиваркIгу.
«Илчи» кказитрал хъунмур редактор Качар ХIусайнаевал бувсуна ШавкIуллал жяматрал чулухунмай цила хIурмат гьаз хьушиву цинма чIярусса шиннардий архIал зун нясив хьусса Лакрал театрданул режиссер, аьпа биву, Валерий Эфендиевлуйхчил. КIицI лавгуна ганал даражалийсса режиссер Дагъус­ттаннай хIакьинусса кьининин къаувкшиву ва ялагу чIявусса шавкIул цаймигу бушиву цивппа зузисса кIанттурдай лакрал цIа-кьинигу лайкьну дуручлай, республикалул жяматравугу бусравсса.
ДР-лул Президентнал виваллил политикалул управлениялул каялувчи Артур Исрапиловлул кIицI лавгуна ШавкIуллал школалул республикалун буллушиву цIанихсса арсру. ЧIа увкуна ялун нанисса никираву школалун цIа дирзсса ХIадис ХIажиевлун лайкьсса варис­тал буккаву.
ШавкIуллал школалул савлугърая ялагу ихтилатру бувуна ДР-лул Халкьуннал Мажлисрал депутат Камил Давдиевлул, Жяматийсса Палаталул хъунаманал хъиривчу Сапар Аьбдуллаевлул, печатьрал ва информациялул министрнал хъиривчу Миясат Муслимовал, Ккуллал райондалул администрациялул бакIчи Саэд Сулаймановлул, ишбажаранчи Аьбдулмажид МахIарамовлул, ШавкIуллал администрациялул бакIчи Аьбдул Аьлиевлул, СПК-лул хъунама Шяъван ХIусайновлул, ва школалий зий бивкIсса Сарижат ХIусайновал.
ШавкIуллал школалул юбилей хьуссар Лаккуй оьзру хьуния мукьах цалчинсса байранну. Ва му байран унгу-унгусса хьунни. Му хъиннура чIюлу дунни Дагъусттаннал лайкь хьусса артистка Лариса ХIажиевал, дунияллийх машгьурсса «Лезгинка» ансамбльданул, Дагъусттаннал халкьуннал артистка Луиза Шагьдиловал, Гъумучиял оьрчIал магьирлугърал школалул къавтIалтрал, Райондалул Магьирлугърал къатлул зузалт – Гулизар МахIаммадовал ва Мариян Жамалуттиновал.
Байран къуртал дуруна яргсса салютрайну.

Зулайхат Тахакьаева