Сентябрьданул 3-нний ДР-лул Президентнал кIанайма Рамазан АьбдуллатIипов увкIунни Дагъусттаннал медициналул академиялийн. Тикку га кьини тIитIлай бия цIуну бакьин бувсса биологиялул корпус. Ганин дирзунни хьхьичIунсса хирург, оперативная хирургиялул кафедралул доцент ХIажи МахIаммадовлул цIа.

ДакIнийн бутанну, дукIу августрай цIу дагьния махъ га корпусрайн мадарасса зарал бивну бивкIссар. Га корпус цIубуккан бансса харж буккан бувну бивкIссар ХIажи МахIаммадовлул арсваврал Зиявуттиннул, МахIаммадлул ва душнил Наидал.
ЦIубуккан бувсса лекциярттал залдануву республикалул бакIчи хьунаавкьунни академиялул преподавательтуращал ва студентътуращал.
Рамазан АьбдуллатIиповлул барчаллагь увкунни МахIам­мадовхъал кулпатрахь академиялун кумаг баврихлу, ганал бувсунни цивппагу кьянкьану ччаннай бавцIуну, Дагъусттаннангу кумаг буллай бушиву.
Ганал бувсунни ДГМА-Дагъусттаннан хъинну агьамсса дуккаврил заведение хъанай бушиву, ца чIумал ва бивкIшиву билаят­рай ца яла хьхьичIунмурну. Шичча бувксса духтуртал гьарца кIанай зий бивкIшиву. Ганал мукъурттийн бувну, утти Аьрасатнал цаппара регионнай къакьамул буллай бур ДГМА бувккусса духтуртал, масалдаран, Тюменнай ванияр 10 шинал хьхьичIва баян бувну бивкIун бур мунил хIакъираву.
Р. АьбдуллатIиповлул бувсмунийн бувну, дагъусттанлувтал рязину бакъар Дагъусттаннайсса духтуртураяту, миннал лулттурасри ласласаврияту.
Республикалул бакIчинал бувсунни иш-тагьар даххана даншиврул, 15 хъунама духтур даврия укьан увну ушиву ва цайми кIанттурдая буцлай бушиву касававсса хIакинтал. Ганал умуд бивхьунни цIанасса ДГМА-лул ректор МахIаммад ХIусмановлул хIарачатрайну тагьар даххана даншиврий.
ДГМА-лул ректор Аьбду­рахIман ХIусмановлул барчаллагь увкунни МахIаммадовхъайн кумаг баврихлу. Республикалул бакIчинал тIурча Наида МахIаммадован бахшиш дуллунни.