Август зурул 1-нний МахIачкъалалия ЦIуссалакрал райондалул (Новостройрал) шяраваллавун Аьхъарав, Шушияв, ЦIуссачIурттахьхьун, Гьамияхьхьун, ТIюхчарав, ЦIуссалаккуйн, Чапаеволийн, ЦIуссаккулув халкь бувцуну занансса №111 маршрут зузи дурссия.

Ва Новостройрал агьулданун чара бакъа аьркинсса, нукIура тIитIин багьлай бивкIсса маршрутри. Жу жуламур бацIан буллантIиссару, — тIий ур Новостройрал ма­съалартталсса буллалисса ЦIуссалакрал райондалул хъунаманал хъиривчу А. Исрапилов.

ЦIусса маршрут тIиртIуна ЦIуссалакрал райондалул жяматийсса советрал сипталийну. Амма ва маршрут тIитIаву тIааьн къабивзунни «Махачкалатранс» МУП-ран. ЦIуссалакрал райондалул вакилтурал ва миннал дянив къалмакъал хьуну кIия инсаннан зарал хьуна.
ЦIуссалакрал райондалул жяматийсса организациялул председатель Сагид Сагидовлул бусласимунийн бувну, ва цIана тIиртIусса маршрут нукIура аьркинну диркIун дур Новостройрал агьулданун.
-Новостройрал чулухунмай­сса Махачкала-Кривая балка, Махачкала-Сулак, №69, №88, №103 маршруткарттал шяраваллил агьали шяраваллавун биян буллай бакъар. Вайннан федерал трассалий бувчIун, цала-цала шяравун дирирмуний щябикIлай биллан багьлай бур. Мукун ци-дунугу дириянцIа ссятурдий бацIлан багьлай бур. Жул агьалинан ва маршрут (№111) чара бакъа аьркинссар, — тIий ур Сагид Сагидов.
Ялув кIицI лавгсса куццуй Новостройрайн занансса цIусса маршрут тIитIаву тIааьн къабивзун бур шагьрулийх заназисса маршруткартталсса буллалисса «Махачкалатранс» МУП-ран бакъассагу, Новостройрал чулухунмай заназисса маршруткарттал шупIиртурангу. Цанчирча, миннал бувцуну заназисса пассажир утти чан хьун тIий бур. Новостройрал агьулданун тIурча ва маршрутрая хъуннасса куклушинна дур. Агьали цала шяраваллавун биян баву бакъассагу, ванил багьа, уттинин Новостройрал агьлу занай бивкIсса маршруткарттаяр кьювкьусса бур.
Кривая балкалийн, Сулакьрайн нанисса маршруткар­ттай вайннал 30 къуруш дуллай бивкIхьурча, утти цIусса маршрут­рай дуллан тIий бур 25 къуруш.
Цала клиентътурацIа хъа­на­хъисса маршруткарттал шу­пIиртурал цIуну бувкIминнащал къалмакъал дурна август зурул 6-нний. Сагид Сагидовлул бусласимунийн бувну, цIусса маршрутрал шупIиртал Рамазан Муслимов ва Рамазан Хайдакьов ххюя инсан ххявххун («Махачкала-Кривая балка» маршрутрал шупIиртал, «Махачкала-транс» МУП-рал ва МахIачкъалаллал транспортрал Космитетрал вакилтал – С. С.) бавттун бур.
Муслимов нанисса маршрутка Красноармейскаллал чIаравсса ламуй бацIан бувну, ххюя инсаннал мунаща документругу зевххуну, му авттун ур.
Мукунмасса иш хьуну бур ГАИ-лул пост кьабивтсса кIанттурдай Хайдакьовлущалгу. Ва питналуву Муслимовлул бакIран цIунцIия хьуну дур. ЦIунцIия куклусса дакъашиврийн бувну, ва райондалул азарханалия МахIачкъалаливсса азарханалийн иян увну ур. ТалихIиннаран, Хайдакьовлун захIматсса цIунцIия хьуну дакъар.
-№111 маршрут зузи даврил масъала шагьрулул мэрнал кIанайсса Муртазааьли Рабадановлущал ххалбивгьуну бивкIссар. Ттула пикрилий, ва къалмакъал сукку даврин багьана хьуссар «Махачкала-транс» МУП-рал гендиректорнал хъиривчу М. Ибрагьимов, — тIий ур С. Сагидов. М. Ибрагьимов тIурча ур цала идара ми иширттавух хIала бакъассар. Жу миннаща документругу къазевххуссар, я ми зеххинсса ихтияр жухь дакъассар тIий.
Шагьрулул хъунаманалгу му маршрут зузи дан рязишинна къадуллуссар. Жу ми шупIиртуран оьвкуну бувчIин барду шагьрулувух занан миннахь ихтияр дакъашиву, шагьрулувух укуннагу диялсса транспорт занай душиву. Агана миннан Новостройрал агьлу цала шяраваллавун биян буллан ччай бухьурча, тIитIача рейс ЦIусса автостанциялия гихун заназисса, — тIий ур М. Ибрагимов.
Шагьрулул мэрнал кIанайма М. Рабаданов ур аьркинсса документру щаллу хьунцIа бавцIуну бивкIссания цIусса маршрут­рал шупIиртал ва къалмакъал къахьунтIиссия тIий.
Амма ЦIуссалакрал райондалул агьлугу цалами ихтиярду дурурччуну ччай бур. Цалва агьалинан укунсса куклушиву дуллалаву му райондалийн багьайсса масъалар, тIий бур, «Махачкала-транспортралми» багьраягу вай рязину бакъар. Цалсса №111 маршрут зий дур.
-Ва Новостройрал агьулданун чара бакъа аьркинсса, нукIура тIитIин багьлай бивкIсса маршрутри. Жу жуламур бацIан буллантIиссару, — тIий ур Новостройрал масъалартталсса буллалисса ЦIуссалакрал райондалул хъунаманал хъиривчу А. Исрапилов.
Лажин хIадур дурссар П. Рамазановал ва А. Аьбдуллаевал