Августрал 15-нний МахIачкъалалив хьунни 2020 шинайннинсса ДР-лул вацIлул хозяйствалул масъалартту ххалбигьлагьисса «ккуркки стол». БатIаврий гьуртту хьунни ДР-лул ХIукуматрал Председательнал хъиривчу Шарип Шарипов, ДР-лул ВацIлул хозяйствалул комитетрал председатель Аьлибаг ХIажиев, МахIачкъалаллал тIабиаьт дуруччаврил прокуратуралул каялувчи Аьли НурмахIаммадов ва цаймигу.
«Ккуркки стол» тIитIлай, Шарип Шариповлул бувсунни цIанасса ппурттуву Дагъусттаннал вацIлул хозяйствалуву тамансса душиву щаллу къадурсса давуртту ва захIматнийн багьсса масъалартту.
«1980-ку шиннардий республикалий жува бугьайссия 12 азарда гектар лесополосардал, цIанасса чIумал тIурча сайки 1 азарда гектар. ЦIанасса ппурттуву Дагъусттаннай вацIрал бувгьусса кIанттурдал бувагу 10 процент бур, ми лап чанссар.
ВацIлул хозяйствалул гьарца зузалал хьхьичI хIакьину бур ца масъала – цалла даврил мюнпат ххи баву», — увкунни Ш. Шариповлул.
ВацIлул хозяйствалул масъаларттал хIакъираву ва ми щаллу бансса ххуллурдая бувсунни ДР-лул ВацIлул хозяйствалул комитетрал вацIрал сакиншинналул управлениялул отделданул хъунама СултанахIмад Исрапиловлул.
Ганал бувсунни, мукунма, ДР-лул ХIукуматрал хIукмулийну цIакь дурну душиву «Развитие лесного хозяйства Республики Дагестан на 2013-2020 годы» тIисса программа. Га программа ишакаш даврийну бюхъантIиссар 2020 шинайннин республикалий вацIри гьарза бан 15 процентрал.
Ганалва бувсмунийн бувну, цIанасса ппурттуву вацIлул фондрал циняв аьрщив хIисавну дур 450 азарда гектар, миннува вацIри бур 364 азарда гектарданий. ВацIлул фондравун къадурхсса аьрщив хъанай дур 211,7 азарда гектар.
ХIадур дурссар ХI. Аьдиловлул
