На зий бура Лакрал райондалийсса оьрчIал творчествалул къатлуву, «ссихIир бусса синааьрщи» кружокрал дарсру дихьлай. ТтучIа ур Гъумучиял школданийсса 11 дуклаки оьрчI. Жу лахьлай буру бархъаллал тIахIунттив дан, щавщилул мурхьирал къяртрая хъурзилтту дан, хIаятрал лагма чапар щащан ва цаймигу канил давуртту дуллан. Вайннува хъинну гъирарай лахьлай бур ттул оьрчIан тIахIунтту дувултрал пиша. Амма жун хъинну захIмат хъанай бия ва даврия жунма ххуйну къакIулшиврия.

ДачIи шинъя жул тIахIунттал мина-гьану, бакI-щаращину хъанахъисса, щалла дунияллийх тIиссакссагу, цIа ларгсса Бархъаллал тIахIунтту дай заводрайн биян ччай, гъанну кIул хьун тIахIунтту дувултращал, бурган, ккаккан гайннал паргалсса каруннах дуллалимур, дурну тиннай дирхьу­сса эмаратирттах бурган, гайннах буруглай жуннагу лахьхьин. Махъва-махъгу жул мурад бартлавгуна, мартрал 4-нний, УНО-рал хъунаманал хIарачатрайну. Явсупи МахIаммадовлул жу, транспортгу ляркъуну, тIайла бувккунну аьрххилий. Бархъалавгу оьвкуну, бувсун бия жу бучIантIишивугу. Хъунмасса барчаллагь хьуннав цан учительтураягу, оьрчIаягу, оьрчIал нитти-буттаягу.
Шяравун буххайхтува жул хьунийн бувккуна учительтал, дуклаки оьрчIру, шяраваллил агьлу. Жу хъинну ххари хьуссияв, жува Маккалив бивсса ххива.
Бархъаллал школа, шагьрулийсса школа кунма, лази-лавкьусса, классру аьркинмунил, чIалачIи пособиялул балгусса, оьрчIан куртIсса кIулшиву ва ххуйсса тарбия дулунсса шартIру дузал дурсса бия. Ххуллийх бувкIсса жу ххуйну кьамулгу бувнав, хъамалугу бувнав, дуклаки оьрчIал жун хъуннасса концертгу ккаккан дурна. Шиккува учин, Бархъаллал хъами-душру бакIрал ххуйсса, чурххавагу бювхъусса, ччинал ябацIансса бия, мунияту ттулва мукъувугу кIицI бувссия шамагу ттула оьрчIал оьрчIан душру ххал бан Бархъалав бучIанна куну. Учительтурал коллективгу тикку куннал ку бувгьусса, цIанихсса учительтурая сакин хьусса бия. Гайннавух бия «Отличник народного просвещения РФ», 1990 шинал Москавлий цинявппа школардал дянив цалчинмур кIану бувгьусса математикалул учительница Сулайманова Ххадижат Маммаевна. Ххадижат МаммаевначIа дия 2 тIахIунттал кружокрал дарсругу. Мунил кабинетравун бувхсса чIумал ябатIин къашайва оьрчIал карунних синааьрщарая дурсса эмаратир­ттая. ЦIанасса чIумуву Дагъус­ттаннай тIахIунтту дайсса кIану бур так Бархъалав. 1936 шинал тIивтIуссар тIахIунтту дайсса артель, утти бур дахьа 6 инсан зузисса завод. Микку синааьрщарая дурсса эмаратирттая жу махIрум хьуну ливчIру. Амма, райондалул аякьа дакъа тIий, завод щаллуну зузи бан хъанай бакъар тIий бия.
Буслай бия чIявусса хъами бушиву тIахIунттай хъинну лавайсса даражалийсса суратру дишайсса. Миннавух бия ПатIимат Амирхановагу. 1936 шинал Москавлий выставкалий цалчинмур кIану бувгьусса ПатIимат Амирхановал накьичирттал альбом ттигу бусса бур А. С. Пушкиннул цIанийсса Москавуллал музейрал архивраву ябуллай.
Гуламан Исаевал буслай, чивчуссар Т. ХIажиевал