Ларгсса нюжмардий Кировский райондалийсса Семендердай Барият Мурадовал цIанийсса кIичIиравалу бакьин буллалисса давурттив дайдирхьунни. Ваниннин хьхьичI шиккун бивну бур, хъуншагьрулул бакIчинал хъиривчу Камил Изиев, МахIачкъалаллал УЖКХ-лул хъунама Зубайру Мусттапаев ва Кировский райондалул хъунама СалихI Сагидов гьурттусса, хасъсса комиссия.
Шиккува дакIнийн бутан, ларгмур шинал гъинттул Семендердай ялапар хъанахъисса халкьуннащал хьусса хьунабакьаврий шагьрулул бакIчи МахIаммад Сулаймановлул махъ буллуну бивкIссар поселокрай чIярусса шиннардил мутталий салкьи хьусса захIматсса масъалартту чан-чанну тIий щаллу буллан. Поселокрай ялапар хъанахъисса халкьуннал бусаврийн бувну, цимилгу бивну бур вай личIи-личIисса аьрзирдащал Семендердал бакIчиначIан. Амма цува зузисса 4 зурул дянив ванан чIун ляркъуну дакъар халкьуннал тIимуних къулагъас дувансса. Поселокрайсса халкьуннал аьрзардал хъирив увккун ур Кировский райондалул хъунама СалихI Сагидов.
Утти ялув кIицI лавгсса комиссиялул чIалачIи бунни цалчинма-цалчин поселокрай кIичIиртту ччюркливун ва щинахьхьун лагаврил масъаларттаха зун багьлай бушиву.
УЖКХ-лул хъунаманал бусаврийн бувну, вайннал зузалтрал хIисав бан тIий бусса бур щинал бургъурду баххана бувну, ми аьрщараву куртIну буччаврил давуртту ссан дацIан тIий дурив.
— 700-ксса метрардайсса, щин гьансса бургъурдал манзил цIубан ва ми аьрщараву куртIну буччин чIярусса арцу харж хьунтIиссар. Шагьрулул бюджетраву цIана вай давурттан ккаккан дурсса арцу дакъахьувкун, шикку хъунмасса махъ бусан къахьунссар. Халкьуннал ччи-ччикун къатри дуллай бивкIун тIий поселокрайсса кIичIиртту щинал гьузунтIиссар ва канализациялул масъала щаллу къабарча, -бувсунни ванал.
Комиссия канализациялул масъалалуха зий буна, СалихI Сагидовлул каялувшиннаралусса Кировский администрациялул зузалтрал Б. Мурадовал цIанийсса кIичIираву субботник дурну, мадарасса КАМАЗ-ру ччюрклил экьиливчунни.
Вания гихуннайгу, щалва шагьрулий кунна, Семендердайгу субботникру дуллантIиссар.
