Вай гьантрай МахIачкъалаллал администрациялийн Дусшиврул паркраву халкь бигьалаган щябикIайсса скамейкарду бакIракъутталий бувтун лякъаврил хIакъираву халкьуннаясса, хъирив буккира тIисса, телефондалийнсса оьвчавуртту хьуну дур.
Мардимазаншиву дурсса кIанайн бувкIсса администрациялул зузалт махIаттал хьуну ливчIун бур бишайнивагу гуж-хужрай 5-6 битавсса адаминаща бакъа бишин къабюхъайсса, бетондалул ччаннугу дусса скамейкарду гъагъари бувну аьрщарай лявкъукун.
Цукунсса, ци тарбиялул ва духIи-дуциндарал халкь бикIан аьркинни укунсса зияншивуртту даврия, цаманал захIмат лиян баврия хIаз ласайсса.
МахIачкъалаллал паркирдаву укунсса журалул мардимазаншивуртту чан къашайссар. Паркирдаву ва сквердаву фонарьдайсса лампочкарду ва цIинцI дичинсса урнарду гъавгъун лякъаву муданмасса ишрур. Мукунма мардимазантурал итталун къабагьну къаличIай тIутIив дургьусса кIанттурдугу. Лякъайсса бур тIутIив ва къатIри мархлуцIакула бувккун, бавцуну. Дацин къархьуни, ялун лавхъун, тIутIив ккуччу дурну лякъайссагу дур. Веб-камерарду бакъану тIий, чIявуми иширттал хъирив къалавну, зиянчитал ца буссарив кIул бан къабюхъайсса бур.
Мунияту, жулва халкьуннахь шагьрулул администрация тавакъю буллай бур, чув-бунугу кIичIираву шагьрулул хъус зия дуллай, гъагълай хIисав хьурча, мугьлат бакъа цайн оьвчара, баян бувара тIий.
